Bigg Boss Telugu: కంటెస్టెంట్లకు పాత టాస్క్‌లతో తంటా.. శివాజీ వల్ల నష్టపోయిన అమర్‌

Bigg Boss 7 Telugu Day 102 Episode Highlights: బిగ్ బాస్ 7 తెలుగు సీజన్ మరో మూడు రోజుల్లో ముగియనుంది. డిసెంబర్ 17న గ్రాండ్ ఫినాలే నిర్వహించి టైటిల్ విన్నర్‌ను ప్రకటించనున్నారు. ప్రస్తుతం హౌజ్‌లో ఆరుగురు కంటెస్టెంట్స్ ఉన్నారు. అంటే ఈ సీజన్‌లో టాప్ 6 కంటెస్టెంట్స్‌గా శివాజీ, అమర్ దీప్, పల్లవి ప్రశాంత్, అర్జున్ అంబటి, ప్రియాంక జైన్, ప్రిన్స్ యావర్ నిలిచారు.

హౌజ్‌మేట్స్‌కు సరదాగా పాత టాస్క్‌లు ఇచ్చాడు. కంటెస్టెంట్స్ ఇంట్లో వాళ్లను మిస్ అవ్వడమే కాకుండా ఇంటి ఫుడ్ కూడా మిస్ అవుతున్నారని, ఆ ఇంటి ఫుడ్‌ను తినేందుకు ఒకరి తరఫున మరొక కంటెస్టెంట్ టాస్క్ గెలవాలి. అందుకు పాత టాస్క్‌లను మళ్లీ పెట్టాడు బిగ్ బాస్. ముందుగా అర్జున్ కోసం ఫుడ్ వస్తుంది. అది తను తినాలంటే యావర్‌ షేక్ బేబీ షేక్ టాస్క్ గెలవాల్సి ఉంటుంది.

ఇదివరకు ఫౌల్ ఆడిన ఈ టాస్క్‌లో మరోసారి యావర్ ఆడి గెలిచాడు. దీంతో అర్జున్‌కు ఇంటి ఫుడ్ తినే అవకాశం వచ్చింది. తర్వాత శివాజీ కోసం ప్రియాంక టాస్క్ ఆడి గెలవాలి. ఎవిక్షన్ ఫ్రీ పాస్ టాస్క్ సమయంలో శివాజీ, ప్రియాంక, యావర్ ఆడిన విల్లుపై బాల్స్ బ్యాలెన్స్ చేసే టాస్క్ ఇచ్చారు. ఈ టాస్క్‌లో ప్రియాంక గెలిచింది. అనంతరం అమర్ దీప్ కోసం శివాజీ గేమ్ ఆడాల్సి వచ్చింది. ఓటింగ్ అప్పీల్ సమయంలో శివాజీ గెలిచిన బెలూన్ టాస్క్‌ను మళ్లీ ఇచ్చాడు బిగ్ బాస్.

మూడు నిమిషాల్లో అన్ని బెలూన్స్ పగులగొడితే టాస్క్ గెలిచినట్లు అని అనౌన్స్ చేశారు. దానికి ఈజీగా పగులగొడతాను అన్నట్లుగా శివాజీ ఎక్స్‌ప్రెషన్ ఇచ్చాడు. కానీ, టాస్క్‌ను శివాజీ గెలవనట్లుగా ప్రోమోలో చూపించారు. శివాజీ గెలవకపోవడంతో అమర్‌కు తన ఇంటి ఆహారాన్ని అందుకోలేకపోయాడేమో అనిపిస్తోంది. దీంతో శివాజీ వల్ల అమర్‌కు నష్టం కలిగినట్లుగా తెలుస్తోంది.