Bigg Boss 7 Telugu : తేజతో నామినేషన్ చేయించుకుంటున్న కంటెస్టెంట్లు.. హౌస్‍లో ఉండాలనిపించడం లేదా?

బిగ్ బాస్ 7 తెలుగు(Bigg Boss 7 Telugu) 9వ వారం కొంతమంది కంటెస్టెంట్ల నామినేషన్స్ జరిగాయి. అంతకుముందు షో మెుదలుకాగానే.. డిప్యూటీలను కెప్టెన్ గౌతమ్ ఎంపిక చేసుకున్నాడు. ఈ సందర్భంగా రతికా, శోభా శెట్టిని సెలక్ట్ చేసుకున్నారు. ఇల్లు నడవాలంటే ఆడవాళ్లు చేసే పనే ముఖ్యమని, అందుకే ఈ వీక్ ఆడవాళ్లకు సెలవు అని ప్రకటించాడు గౌతమ్. ఈ వారం ఉమెన్ వీక్ సెలబ్రేట్ చేయాలని చెప్పాడు. మగవాళ్లు పని చేయాలని, ఆ రోజు కష్టపడిన వ్యక్తికి కష్టజీవి అని బిరుదు ఇవ్వాలని, పని చేయని వ్యక్తికి పని దొంగ అని బిరుదు ఇస్తామని తెలిపాడు. ఆ తర్వాత నామినేషన్స్ ప్రక్రియ మెుదలైంది.

పల్లవి ప్రశాంత్‍తో(Pallavi Prashanth) నామినేషన్స్ ప్రక్రియ మెుదలుపెట్టాడు బిగ్ బాస్. అమర్, తేజను నామినేట్ చేశాడు ప్రశాంత్. చివరి వారం తనను కెప్టెన్సీ రేసు నుంచి తీసేసినందుకు నామినేట్ చేస్తున్నట్టుగా ప్రకటించాడు. తర్వాత డ్రాగన్ తల దగ్గరకు తీసుకెళ్లగా.. అమర్ మీద రంగు పడింది. ఈ సందర్భంగా జరిగిన వాదనల్లో ఒక్కసారి కెప్టెన్ అయిన వాడిని మళ్లీ కెప్టెన్ అవ్వనివ్వను అని తెలిపాడు అమర్. కెప్టెన్సీ కంటెండర్ల విషయంపై తేజను నామినేట్ చేశాడు. అయితే కిందటి నామినేషన్స్ సమయంలో ఉన్నట్టుగా ప్రశాంత్ ప్రవర్తన లేదు. పెద్దగా గొడవకు దిగకుండానే నామినేట్ చేశాడు.

ప్రియాంక వంతు వచ్చినప్పుడు రతికాను నామినేట్ చేసింది. తర్వాత బోలేకు వేసింది. రతికా గురించి చెబుతూ.. వైల్డ్ కార్డ్ ఎంట్రీ ద్వారా వచ్చావని బాంబులాగా ఆడుతావని అనుకుంటే.. ఆట కనిపించడం లేదని చెప్పింది ప్రియాంక. అర్జున్ శోభా శెట్టి, అమర్‍దీప్‍ను నామినేట్ చేశాడు. శివాజీ వచ్చి అమర్‍దీప్, తేజను నామినేట్ చేశాడు. ఈ సందర్భంగా నాకు చెప్పిన కారణాలే.. నీకు కావాల్సిన వాళ్ల దగ్గర కూడా ఉన్నాయని, కానీ వారిని నామినేట్ చేయలేదు ఎందుకు అని అమర్ ప్రశ్నించాడు. ఇక తేజ వంతు వచ్చినప్పుడు నువ్ నామినేట్ చేసిన కారణంగా మంచి ప్లేయర్ వెళ్లిపోయాడని తెలిపాడు. సరైన కారణం లేకుండా నామినేట్ చేశావని తెలిపాడు. అయితే సందీప్ కావాలనే తనతో నామినేషన్ వేయించుకున్నాడని రీజన్ చెప్పాడు తేజ.

రతికా.. ప్రియాంక, శోభాను నామినేట్ చేసింది. మీరు గ్రూపుగా ఆడుతున్నారని తెలిపింది. సింగిల్ గేమ్‍లో గ్రూపుగా ఎలా ఆడామని ప్రియంక డిఫెండ్ చేసుకుంది. కాసేపు వాదన జరిగింది. తర్వాత శోభాశెట్టిని రతికా నామినేట్ చేసింది. ఫౌల్ గేమ్ ఆడావని తెలిపింది.

తేజ వచ్చి అర్జున్, రతికాను నామినేట్ చేశాడు. వచ్చి మూడు వారాలు అవుతున్నా.. నామినేషన్స్ లో లేవు అని, ఆట రసవత్తరంగా కావాలని నామినేట్ చేస్తున్నట్టుగా తెలిపాడు. అయితే అర్జున్ మాత్రం.. ఇది కారణం కాదు అని చెప్పాడు. నీకు ఇష్టం లేకుంటే.. నిన్ను నామినేట్ చేయను అని చెప్పాడు తేజ. నేనేదో జోక్‍గా నన్ను నామినేట్ చేయమంటే.. చేశావని అర్జున్ అన్నాడు. అంటే టేస్టీ తేజను అడిగిమరి కంటెస్టెంట్లు నామినేషన్ చేయించుకుంటున్నారు. లాస్ట్ వీక్ ఆట సందీప్ కుడా అలాగే చేశాడు. ఈసారి అర్జున్ కూడా తేజను నామినేషన్ చేయమన్నాడు. తేజ నామినేట్ చేసిన వ్యక్తి.. బయటకు వెళ్లిపోతున్నాడని హౌస్‍లో అభిప్రాయం ఉంది.

తర్వాత భోలే వచ్చి.. ప్రియాంక, అమర్ దీప్‍ను నామినేట్ చేశాడు. ఈ సందర్భంగా భోలే, అమర్ మధ్య వాగ్వాదం జరిగింది. మా మీద రివేంజ్ తీర్చుకుంటున్నారని తెలిపాడు అమర్. తర్వాత మీరు ఏం పీకారు అని మాట వదిలాడు. వెంటనే సారీ చెప్పాడు. నువ్ బూతులు ఎందుకు వాడుతున్నావని భోలే ప్రశ్నించాడు. మధ్యలోకి ప్రియాంక కూడా వచ్చింది. అలా మాట్లాడకూడదని తెలిపింది. కాసేపు భోలే, అమర్ వెటకారంగా మాట్లాడుకున్నారు. మరికొందరి నామినేషన్స్ జరగాల్సిఉంది.