Arjun Reddy: అర్జున్ రెడ్డి సినిమాకు ఏడేళ్లు.. సందీప్ రెడ్డి వంగాకు ఓ రిక్వెస్ట్ చేసిన విజయ్ దేవరకొండ

విజయ్ దేవరకొండ హీరోగా నటించిన అర్జున్ రెడ్డి సినిమా సెన్సేషన్ క్రియేట్ చేసింది. సందీప్ రెడ్డి వంగా దర్శకత్వం వహించిన ఈ మూవీ కల్ట్ మాస్టర్‌పీస్‍గా నిలిచిపోయింది. తొలి మూవీతోనే ఫార్ములాలను బద్దలుకొడుతూ సందీప్ తెరకెక్కించిన ఈ బోల్డ్ రొమాంటిక్ డ్రామా బ్లాక్‍బస్టర్ అవడంతో పాటు ప్రశంసలను దక్కించుకుంది. సినీ ఇండస్ట్రీలో గేమ్ ఛేంజర్ అంటూ పిలిపించుకుంది. విజయ్ దేవరకొండ టాలెంట్‍ను ప్రపంచానికి పూర్తిస్థాయిలో ప్రపంచానికి పరిచయం చేసింది అర్జున్ రెడ్డి. అలాంటి సెన్సేషనల్ మూవీకి నేటి (ఆగస్టు 25)తో ఏడేళ్లు నిండాయి.

అర్జున్ రెడ్డి సినిమా 2017 ఆగస్టు 25వ తేదీన థియేటర్లలో రిలీజ్ అయింది. పోస్టర్లు, ట్రైలర్‌తోనే అప్పట్లో ఈ మూవీపై ఫుల్ బజ్ క్రియేట్ అయింది. వివాదాలు కూడా తలెత్తాయి. అయితే, అన్నింటినీ దాటుకొని ఈ మూవీ హిట్ అయింది. సందీప్ రెడ్డి వంగా, విజయ్ దేవరకొండ పేర్లు టాలీవుడ్‍తో పాటు దేశవ్యాప్తంగా సినీ ఇండస్ట్రీల్లో మారుమోగిపోయాయి. అర్జున్ రెడ్డికి ఏడేళ్లు నిండిన సందర్భంగా నేడు (ఆగస్టు 25) ట్వీట్ చేశారు విజయ్ దేవరకొండ. గతేడాదే జరిగిందన్నట్టుగా ఉందని రాసుకొచ్చారు.

అప్పుడు ఫుల్ కట్ తేవాలి

అర్జున్ రెడ్డి సినిమాకు ఏడేళ్లు నిండిన సందర్భంగా అప్పటి షూటింగ్ వర్క్ స్టిల్స్‌కు సంబంధించిన ఫొటోలను విజయ్ దేవరకొండ పోస్ట్ చేశారు. అలాగే, పదేళ్లు నిండినప్పుడు ప్రజలకు ఈ సినిమా ఫుల్ కట్ అందుబాటులోకి తేవాలని డైరెక్టర్ సందీప్ రెడ్డి వంగాను రిక్వెస్ట్ చేశారు.

అర్జున్ రెడ్డి సినిమా వచ్చి అప్పుడే ఏడేళ్లు అయిందంటే నమ్మలేకపోతున్నానని విజయ్ దేవరకొండ పోస్ట్ చేశారు. “10వ యానివర్సరీకి 'సందీప్ రెడ్డి వంగా' అర్జున్ రెడ్డి ఫుల్ కట్ జనాలకు ఇవ్వాలి. ఇప్పటికే ఏడు సంవత్సరాలు గడిచాయంటే నమ్మలేకపోతున్నా. గతేడాదే జరిగినట్టు చాలా విషయాలు గుర్తు ఉన్నాయి” అని విజయ్ దేవరకొండ ట్వీట్ చేశారు.

అర్జున్ రెడ్డి సినిమాలో విజయ్ దేవరకొండ సరసన షాలినీ పాండే హీరోయిన్‍గా నటించారు. సందీప్ రెడ్డి వంగా ఈ మూవీని తెరకెక్కించిన తీరు ప్రేక్షకులతో పాటు అధిక శాతం మంది విమర్శకులను కూడా మెప్పించింది. ఇండస్ట్రీలో ఈ మూవీని గేమ్ ఛేంజర్ అని కూడా కొందరు ప్రశంసించారు. తాను చెప్పాలనుకున్న కథను అనుకున్న విధంగానే బోల్డ్‌గా, ఇంటెన్స్‌గా చూపించారు సందీప్.

అర్జున్ రెడ్డి చిత్రంలో విజయ్, షాలినీతో పాటు రాహుల్ రామకృష్ణ, సంజయ్ స్వరూప్, జియా శర్మ, కమల్ కామరాజు, కాంచన కీలకపాత్రలు పోషించారు. ఈ మూవీకి రధన్, హర్షవర్దన్ రామేశ్వర్ అందించిన సంగీతం కూడా చాలా ప్లస్ అయింది. ఈ చిత్రాన్ని సందీప్ రెడ్డి వంగా సోదరుడు ప్రణయ్ రెడ్డి నిర్మించారు.

అర్జున్ రెడ్డి కలెక్షన్లు

అర్జున్ రెడ్డి సినిమా రూ.5కోట్ల బడ్జెట్‍తోనే రూపొందింది. ఈ మూవీకి సుమారు రూ.51కోట్ల కలెక్షన్లు వచ్చాయి. బాక్సాఫీస్ వద్ద ఈ మూవీ బంపర్ హిట్ కొట్టింది. తొలి మూవీతోనే సందీప్ సంచలనం సృష్టించారు.

హిందీలో అర్జున్ రెడ్డి చిత్రాన్ని కబీర్ సింగ్ పేరుతో రీమేక్ చేశారు సందీప్ రెడ్డి వంగా. షాహిద్ కపూర్, కియారా అద్వానీ ప్రధాన పాత్రలు పోషించిన ఈ మూవీకి కూడా సూపర్ హిట్ అయింది.

సందీప్ రెడ్డి వంగా గతేడాది యానిమల్ చిత్రంతో మరో బ్లాక్‍బస్టర్ కొట్టారు. తదుపరి రెబల్ స్టార్ ప్రభాస్‍తో స్పిరిట్ చిత్రం చేయనున్నారు. విజయ్ దేవరకొండ ప్రస్తుతం గౌతమ్ తిన్ననూరి దర్శకత్వంలో ఓ యాక్షన్ థ్రిల్లర్ మూవీ చేస్తున్నారు.