LIC Q1 Results: క్యూ1 లో ఎల్ఐసీ నికర లాభం రూ.10,544 కోట్లు

లైఫ్ ఇన్సూరెన్స్ కార్పొరేషన్ ఆఫ్ ఇండియా (LIC) 2024-25 ఆర్థిక సంవత్సరానికి ఏప్రిల్-జూన్ త్రైమాసిక (Q1FY25) ఫలితాలను గురువారం ప్రకటించింది. దేశీయ అతిపెద్ద బీమా సంస్థ అయిన ఎల్ఐసీ మొత్తం ఆదాయం గత జూన్ త్రైమాసికం (Q1FY24) లో రూ.1,88,749 కోట్లు కాగా, ఈ సంవత్సరం తొలి త్రైమాసికంలో రూ.2,10,910 కోట్లకు పెరిగింది. జూన్ త్రైమాసికంలో ఎల్ఐసీ మొదటి సంవత్సరం ప్రీమియం రూ.6,811 కోట్ల నుంచి రూ.7,470 కోట్లకు పెరిగింది. రెన్యువల్ ప్రీమియంల ద్వారా ఎల్ఐసీ రూ.56,429 కోట్లు ఆర్జించింది.

ఎల్ఐసీ క్యూ1 ఫలితాలు: కీలక కొలమానాలు

జూన్ త్రైమాసికంలో ఎల్ఐసీ (Life Insurance Corporation -LIC)) నికర లాభం వృద్ధికి అధిక మార్జిన్ నాన్ పార్టిసిపేటింగ్ పాలసీల అమ్మకాలు పెరగడం, గ్రూప్ వ్యాపారంలో బలమైన వృద్ధి దోహదపడ్డాయి. జూన్ త్రైమాసికంలో పెట్టుబడుల ద్వారా వచ్చిన నికర ఆదాయం రూ.90,309 కోట్లు కాగా, ఈ క్యూ 1 లో రూ.96,183 కోట్లకు పెరిగింది. ఈ త్రైమాసికం (Q1FY25) లో గ్రూప్ బిజినెస్ మొత్తం ప్రీమియం ఆదాయం ఏడాది ప్రాతిపదికన 30.9 శాతం పెరిగింది. గ్రూప్ ఇన్సూరెన్స్ ఒకే పథకంలో ఉన్న వ్యక్తులను కవర్ చేస్తుంది. సాధారణంగా కంపెనీలు తమ ఉద్యోగులకు బీమా కవరేజీని అందించడానికి ఈ గ్రూప్ ఇన్సూరెన్స్ తీసుకుంటాయి.

వీఎన్బీ లో వృద్ధి

కొత్త ప్రీమియంల నుంచి వచ్చిన లాభాన్ని కొలిచే ‘వ్యాల్యూ న్యూ బిజినెస్ (VNB) విలువ జూన్ త్రైమాసికంలో 23.7 శాతం పెరిగింది. నికర వీఎన్బీ మార్జిన్ 13.7 శాతం నుంచి 13.9 శాతానికి పెరిగింది. గ్రూప్ వ్యాపారంలో బలహీనత కారణంగా ఎల్ఐసీ వీఎన్బీ గత త్రైమాసికంలో క్షీణించింది. దీర్ఘకాలిక రుణ బాధ్యతలను తీర్చే బీమా సంస్థ సామర్థ్యానికి కొలమానమైన కంపెనీ సాల్వెన్సీ నిష్పత్తి ఏడాది క్రితం 1.89 ఉండగా, ఇప్పుడు 1.99కి పెరిగింది.

పెరిగిన మార్కెట్ వాటా

ఈ త్రైమాసికంలో ఎల్ఐసీ (LIC) స్థూల నిరర్థక ఆస్తుల నాణ్యత (GNPA) 1.95 శాతంగా నమోదైంది. ఈ ఆర్థిక సంవత్సరం తొలి త్రైమాసికంలో తమ మార్కెట్ వాటా 61.42 శాతం నుంచి 64.02 శాతానికి, 2024 మార్చి 31తో ముగిసిన పూర్తి సంవత్సరానికి 58.87 శాతానికి పెరిగిందని ఎల్ఐసీ సీఈవో, ఎండీ సిద్ధార్థ మొహంతి తెలిపారు. జూన్ త్రైమాసికంలో వ్యక్తిగత విభాగంలో మొత్తం 35,65,519 పాలసీలను విక్రయించగా, అంతకుముందు త్రైమాసికంలో విక్రయించిన 32,16,301 పాలసీలతో పోలిస్తే 10.86 శాతం వృద్ధి నమోదైంది. ఎల్ఐసీ అండర్ మేనేజ్మెంట్ (AUM) ఆస్తులు రూ.46,11,067 కోట్ల నుంచి రూ.53,58,781 కోట్లకు పెరిగాయి.

ఎల్ఐసీ షేరు ధర

ఫలితాల ప్రకటనకు ముందు గురువారం స్టాక్ మార్కెట్ లో ఎల్ఐసీ షేరు 0.16 శాతం పెరిగి రూ.1,125.70 వద్ద స్థిరపడింది. బంగ్లాదేశ్ లోని తమ కార్యాలయం పాక్షికంగా కార్యకలాపాలను తిరిగి ప్రారంభించిందని, అయితే దేశ పరిస్థితి ఇంకా సాధారణ స్థితికి చేరుకోలేదని ఎల్ఐసీ రెండో స్టాక్ ఎక్స్ఛేంజ్ ఫైలింగ్ లో తెలిపింది.