Infosys offer letters : ఎట్టకేలకు.. రెండున్నరేళ్ల తర్వాత వారికి ఆఫర్​ లెటర్స్​ పంపిన ఇన్ఫోసిస్​!

రెండున్నరేళ్లకు పైగా జాప్యం తర్వాత ఇన్ఫోసిస్ ఎట్టకేలకు 2022 నుంచి క్యాంపస్ నియామకాలకు 1,000కు పైగా ఆఫర్ లెటర్లను జారీ చేసింది. ఈ విషయాన్ని ఐటీ ఎంప్లాయీస్ యూనియన్ ఇన్ఫర్మేషన్ టెక్నాలజీ ఎంప్లాయీస్ సెనేట్ (ఎన్ఐటీఈఎస్) సెప్టెంబర్ 2న తెలిపింది.

దాదాపు రెండేళ్లుగా ఎదురు చూస్తున్న ఈ యువ ఇంజినీర్లకు ఇప్పుడు 2024 అక్టోబర్ 7న జాయినింగ్ డేట్ ఖరారైంది. “అనిశ్చితి, జాప్యం మధ్య బలంగా నిలిచిన ఎన్ఐటీఈఎస్, విద్యార్థులందరికీ ఇది గొప్ప విజయం,” అని ఎన్ఐటీఈఎస్ అధ్యక్షుడు హర్​పీత్​ సింగ్ సలూజా అన్నారు.

ఈ ఆఫర్​ లెటర్స్​ సిస్టెమ్​ ఇంజినీర్లకు సంబంధించినవి! జాయినింగ్ తేదీ అక్టోబర్ 7, 2024 గా నిర్ణయించారు. బెంగళూరు కేంద్రంగా పనిచేస్తున్న ఈ కంపెనీలో తొలుత 2022లో ఉద్యోగాలు లభించిన ఈ సాఫ్ట్​వేర్​ ఇంజినీర్లు 2024లో రెండు ప్రీ-ట్రైనింగ్ సెషన్లను పూర్తి చేయాల్సి ఉంది.

ఇదీ చూడండి:- Goldman Sachs Layoffs : దిగ్గజ ఇన్​వెస్ట్​మెంట్​ బ్యాంక్​లో ఉద్యోగాల కోత! ఏకంగా 8శాతం లేఆఫ్​?

అయితే తాము అప్రమత్తంగానే ఉన్నామని సలూజా తెలిపారు. ఇన్ఫోసిస్ ఈ హామీని గౌరవించడంలో విఫలమై, జాయినింగ్ తేదీని ఉల్లంఘిస్తే, తాము ఇన్ఫోసిస్ కార్యాలయం ముందు నిరసనను నిర్వహించడానికి వెనుకాడమని తేల్చిచెప్పారు.

2022-23 రిక్రూట్మెంట్ డ్రైవ్​లో సిస్టమ్ ఇంజినీర్, డిజిటల్ స్పెషలిస్ట్ ఇంజినీర్ పోస్టులకు ఎంపికైన 2,000 మంది ఇంజినీరింగ్ గ్రాడ్యుయేట్ల ఆన్​బోర్డింగ్​ని వాయిదా వేసినందుకు ఇన్ఫోసిస్​పై ఎన్ఐటీఈఎస్ గతంలో కార్మిక, ఉపాధి మంత్రిత్వ శాఖకు సైతం ఫిర్యాదు చేసింది.

జాయినింగ్ తేదీల్లో కొన్ని సర్దుబాట్లు ఉన్నప్పటికీ ఫ్రెషర్లకు ఇచ్చే ఆఫర్లను గౌరవిస్తామని, వారి ఆన్ బోర్డింగ్​ను కొనసాగిస్తామని ఇన్ఫోసిస్ సీఈఓ సలీల్ పరేఖ్ ఇటీవల చెప్పారు.

"మేము ఇచ్చిన ప్రతి ఆఫర్, ఆ ఆఫర్ కంపెనీలో చేరే వారి కోసం ఉంటుంది. మేము కొన్ని తేదీలను మార్చాము, కానీ అందరూ ఇన్ఫోసిస్​లో చేరుతారు. ఆ విధానంలో ఎటువంటి మార్పు లేదు," అని ఇన్ఫోసిస్ సీఈఓ సలీల్ పరేఖ్ పీటీఐకి తెలిపారు.

కొన్ని నెలల క్రితం కంపెనీ 2020లో ఉద్యోగాలు పొందిన అభ్యర్థులను సంప్రదించడంతో ఈ కథ మొదలైంది. అప్పటి నుంచి, ఈ అభ్యర్థులు అనేక ప్రీ-ట్రైనింగ్ సెషన్లు, మదింపుల గురించి ఆందోళన వ్యక్తం చేశారు. ఇది మొత్తం నియామక ప్రక్రియ గురించి వారిని అసౌకర్యానికి గురిచేసింది.

సిస్టెమ్ ఇంజనీర్ వేతనం ఏడాదికి రూ.3.6 లక్షలు కాగా, డిజిటల్ స్పెషలిస్ట్ ఇంజినీర్ వేతనం రూ.6.5 లక్షలుగా నిర్ణయించారు.

2022-23 రిక్రూట్మెంట్ డ్రైవ్​లో సిస్టమ్ ఇంజినీర్, డిజిటల్ స్పెషలిస్ట్ ఇంజినీర్ పోస్టులకు ఎంపికైన 2,000 మంది ఇంజనీరింగ్ గ్రాడ్యుయేట్లపై కొనసాగుతున్న దోపిడీ, అన్​ప్రొఫెషనల్ ట్రీట్​మెంట్​పై దర్యాప్తు చేయాలని పుణెకు చెందిన ఐటీ ఎంప్లాయీ యూనియన్ ఎన్ఐటీఈఎస్ కార్మిక, ఉపాధి మంత్రిత్వ శాఖను కోరింది.