శని జయంతి రోజు ఈ తప్పులు చేయకండి

హిందూమతంలో శని జయంతికి ప్రత్యేక ప్రాముఖ్యత ఉంది. దీన్నే 'శని అమావాస్య' అని కూడా అంటారు. శని దేవుడు సూర్యభగవానుడు, ఛాయా దేవిల కుమారుడు. శనిదేవుడిని కర్మఫలాదత అని కూడా అంటారు.

ఈ ఏడాది శని జయంతిని రేపు అంటే మే 19న జరుపుకుంటున్నారు. ఈ రోజున పూజలు, వ్రతాలు, ఉపవాసాల ద్వారా భక్తిశ్రద్ధలతో జరుపుకుంటారు. శనీశ్వరుని జన్మదినాన్ని గంగానదిలో స్నానం చేసి జరుపుకోవడం ఆనవాయితీ. దీనితో పాటు ఉపవాసం ఉండి హనుమాన్ చాలీసా చదవడం ద్వారా కూడా శనిదేవుని అనుగ్రహం పొందవచ్చు. శనిగ్రహం యొక్క దుష్ప్రభావాలను తగ్గించడానికి భక్తులు శని శాంతి, శని జపం వంటి పూజలు చేయడం ద్వారా ఆయన ఆశీర్వాదం పొందుతారు. శనివారం రోజున ఉపవాసం ఉండి శని దేవుడిని పూజించాలి.

శని జయంతి నాడు చేయాల్సినవి

• నదిలో పవిత్ర స్నానం. నదిలో స్నానం చేయలేని వారు సముద్ర స్నానం చేయవచ్చు.
• శని దేవుడి విగ్రహానికి తైలాభిషేకం చేయాలి. పూలతో అలంకరించాలి. నైవేద్యం సమర్పించాలి. నల్ల మినప్పప్పు, నల్ల నువ్వులు శని పాదాల వద్ద సమర్పించాలి. ఇనుప మేకులు కూడా సమర్పించాలి.
• నూనెతో దీపం వెలగించాలి. అనంతరం శని చాలీసా చదువుకోవాలి. రోజంతా ఉపవాసం ఉండడం వల్ల శని దేవుడి అనుగ్రహం లభిస్తుంది.
• శని దోష నివారణ కోసం హనుమాన్ చాలీసాను 11 సార్లు పఠించాలి.
• దానధర్మాలు చేయడం ద్వారా శని అనుగ్రహం పొందవచ్చు.
• ఈ రోజున నల్ల నువ్వులు, నల్ల మినప్పప్పు దానం చేయడం మంచిది.
• ఈ పవిత్రమైన రోజున బ్రహ్మచర్యం పాటించడం చాలా ముఖ్యం.
• సాత్విక ఆహారంతో ఉపవాసాన్ని ముగించవచ్చు.

శని జయంతి రోజున చేయకూడనివి

• ఎవరినీ బాధపెట్టవద్దు. అవమానించవద్దు.
• ఇంటి పనివారు, మీతో పనిచేసే వ్యక్తులు, మీ సహాయకులతో దురుసుగా ప్రవర్తించవద్దు.
• శనిదేవుని అనుగ్రహం పొందాలనుకునే వారు ఎట్టి పరిస్థితుల్లోనూ మాంసాహారం, మద్యం తీసుకోకూడదు.
• మాటల్లో చెడు, అనుచిత పదాలను ఉపయోగించవద్దు.
• ఖాళీగా కూర్చొని మీ సమయాన్ని వృథా చేయకండి. భవిష్యత్తు కోసం మంచి పనులు చేయండి.
• ఇనుప వస్తువులను కొనకూడదు.

శని దేవుని మంత్రం

ఓం నీలాంజన సమాభాసం..

రవిపుత్రం యమాగ్రజం..

ఛాయామార్తాండ సంభూతం..

తం నమామి శనైశ్చరం..

ఓం శం శనైశ్చరాయ నమః

అనే మంత్రాన్ని పఠించడం ద్వారా శనీశ్వరుడి అనుగ్రహం పొందవచ్చు.