TVS NTORQ 125 Blue Price। టీవీఎస్ రేసింగ్ స్కూటర్.. ఇప్పుడు ఇంకా స్టైలిష్!

TVS మోటార్ కంపెనీ తమ పాపులర్ స్కూటర్ మోడల్ TVS NTORQ 125 రేస్ ఎడిషన్‌లో సరికొత్త మెరైన్ బ్లూ కలర్‌ను విడుదల చేసింది. ఈ స్కూటర్ ఇప్పుడు ఆకర్షణీయమైన బ్లూ పెయింట్ స్కీమ్‌లో కూడా లభ్యమవుతోంది. రెడ్ వెర్షన్ మాదిరిగానే బ్లూ వెర్షన్‌లో కూడా ఫ్లాగ్ రేస్-ప్రేరేపిత గ్రాఫిక్‌లు అందించారు. NTorq 125 స్కూటర్ వివిధ వేరియంట్‌లను కలిగి ఉంది, వాటిలో ఒకటి ఈ రేస్ ఎడిషన్. ఇది చాలా కాలం పాటు ఎరుపు, నలుపు కలర్ షేడ్లలో మాత్రమే అందించారు. కొంత కాలం పాటు పసుపు, నలుపు షేడ్లలోనూ అందించారు. అయితే ద్విచక్ర వాహన మార్కెట్లో హోండా కంటే టీవీఎస్ వెనకబడింది. ఈ నేపథ్యంలో ఎలాగైనా తమ సేల్స్ పెంచుకోవాలనే ఉద్దేశ్యంతో రానున్న పండగ సీజన్ ను దృష్టిలో ఉంచుకొని కొనుగోలుదారులను ఆకర్షించే ప్రయత్నం చేస్తుంది.

TVS NTORQ 125 కొత్త కలర్ వేరియంట్ కూడా 3-టోన్ కాంబినేషన్‌తో లభిస్తుంది. ఇందులో భాగంగా బ్లాక్, మెటాలిక్ బ్లాక్, మెటాలిక్ బ్లూ అనే షేడ్లలో ఎంచుకోవచ్చు. ఈ స్కూటర్ రేస్ ఎడిషన్ LED టెయిల్, హెడ్‌ల్యాంప్‌లను కలిగి ఉంది. 'రేస్ ఎడిషన్' లోగో కూడా ఇచ్చారు. ఈ కలర్ వేరియంట్ స్కూటర్ ఇంకా స్టబ్ మఫ్లర్, టెక్స్‌చర్డ్ ఫ్లోర్‌బోర్డ్, డైమండ్-కట్ అల్లాయ్ వీల్స్‌ను కలిగి ఉంటుంది.

మెరైన్ బ్లూ కలర్‌లో కొత్త TVS NTORQ 125 రేస్ ఎడిషన్ ధర రూ. 87,011/- (ఎక్స్-షోరూమ్). భారతదేశంలోని అన్నీ TVS మోటార్ డీలర్‌షిప్‌లలో ఇప్పుడు కొత్త షేడ్ కోసం బుకింగ్‌లు ప్రారంభమయ్యాయి.

TVS NTORQ 125 రేస్ ఎడిషన్ స్పెక్స్- ఫీచర్స్

TVS NTORQ 125 రేస్ ఎడిషన్ స్కూటర్‌లో 124.8 cc సామర్థ్యం కల సింగిల్-సిలిండర్ 4-స్ట్రోక్, 3-వాల్వ్, ఎయిర్-కూల్డ్ SOHC, ఫ్యూయల్-ఇంజెక్టెడ్ ఇంజన్ ఉంటుంది. ఇది గరిష్టంగా 6.9 kW శక్తిని, 10.5 Nm గరిష్ట టార్కును ఉత్పత్తి చేస్తుంది. ఈ రేస్ ఎడిషన్ స్కూటర్ గంటకు 95 కిలోమీటర్ల వేగంతో దూసుకెళ్లగలదు. ఇది కేవలం 9 సెకన్లలో 0-60 kmph వేగాన్ని అందుకోగలదు.

ఇంకా ఈ స్కూటర్‌లో పాస్-బై స్విచ్, డ్యూయల్ సైడ్ స్టీరింగ్ లాక్, పార్కింగ్ బ్రేక్, ఇంజన్ కిల్ స్విచ్ వంటి కీలక ఫీచర్లు లభిస్తాయి. అదనంగా, USB ఛార్జర్, 20-లీటర్ బూట్ సామర్థ్యం, TVS EZ సెంటర్ స్టాండ్‌ను కలిగి ఉంటుంది. TVS NTORQ 125 స్కూటర్‌ను బ్లూటూత్ ద్వారా TVS SmartXonnectTMతో కనెక్ట్ చేసుకొని 60కి పైగా ఫీచర్లను డిజిటల్ ఇన్‌స్ట్రుమెంట్ క్లస్టర్ ద్వారా యాక్సెస్ చేయవచ్చు.