Monsoon children health: వర్షాకాలంలో పిల్లల్ని ఇన్ఫెక్షన్స్ నుంచి ఎలా రక్షించాలి..
Monsoon children health: వర్షాకాలం చాలా ప్రాంతాల్లో మొదలైనట్లే కనిపిస్తోంది. ఈ కాలంలో పిల్లల విషయంలో తీసుకోవాల్సిన జాగ్రత్తలు కొన్ని ఉన్నాయి. అవేంటో చూడండి.
వర్షాకాలంలో గాలిలో తేమ పెరుగుతుంది. ఈ తేమ వల్ల ఆరోగ్యానికి హానికరమైన కారకాలు గాల్లో చేరిపోతాయి. వీటివల్ల పిల్లలు ఎక్కువగా అనారోగ్యానికి గురవుతారు. కాబట్టి ముందుగానే పిల్లల విషయంలో కొన్ని జాగ్రత్తలు తీసుకోవాలి.
మురికి నీళ్లలో బ్యాక్టీరియా, వైరస్, ఇతర వ్యాధి కారక జీవులు ఎక్కువగా వృద్ధి చెందుతాయి. పిల్లలు బయట ఆడుకునేటప్పుడు ఈ నీళ్లను అనుకోకుండా తాకినప్పుడు ఇన్ఫెక్షన్ల బారిన పడతారు. అలాగే త్రాగేనీళ్లు కూడా తొందరగా కలుషితమై జీర్ణాశయానికి సంబంధించిన వ్యాధుల బారిన పడతారు. కాచి చల్లార్చిన నీళ్లు వర్షాకాలంలో తాగడం ఉత్తమం.
పూణేలోని అంకుర హాస్పిటల్ ఫర్ ఉమెన్ అండ్ చిల్డ్రన్ సీనియర్ కన్సల్టెంట్ పీడియాట్రీషియన్ డాక్టర్ అభిమన్యు సేన్ గుప్తా ఇచ్చిన ఇంటర్వ్యూలో, "ఉష్ణోగ్రతలో హెచ్చుతగ్గులు, చల్లగా తేమతో కూడిన గాలి పిల్లలకు హానికరం. ఇది ముక్కు, గొంతుకు సంబంధించిన ఇన్ఫెక్షన్లకు దారితీస్తుంది. అలెర్జీలు, శ్వాసకోశ రుగ్మతలకు దారితీస్తుంది. " అన్నారు.
పిల్లలు ఎలాంటి వ్యాధుల బారిన పడొచ్చంటే..
- జీర్ణాశయ సంబంధిత వ్యాధులు: కలుషిత వాతావరణంలో తయారు చేసే స్ట్రీట్ ఫుడ్ తినడం, కలుషిత నీళ్లను, ఆహారాన్ని తీసుకోవడం వల్ల ఆరోగ్య సమస్యలు మొదలవుతాయి. డయేరియా, కడుపులో నొప్పి, వాంతులు లాంటి సమస్యలు వస్తాయి. సరైన జాగ్రత్తలు తీసుకోకపోతే పాయిజనింగ్ కూడా అయ్యే అవకాశం లేకపోలేదు.
- శ్వాస సంబంధిత ఇన్ఫెక్షన్లు: ఉష్ణోగ్రతలో వచ్చే హెచ్చుతగ్గుల వల్ల శ్వాస సంబంధిత వ్యాధులు కలగజేసే సూక్ష్మజీవుల వ్యాప్తి ఎక్కువగా అవుతుంది. ఇవి రోగనిరోధక వ్యవస్థను బలహీనపరుస్తాయి. కలుషిత గాలిని పీల్చడం ద్వారా పిల్లలు దగ్గు, గొంతు నొప్పి, తుమ్ములు, ఉబ్బసం, జలుబు వంటి శ్వాసకోశ సంబంధిత సమస్యలను అనుభవించవచ్చు.
- డెంగీ, మలేరియా: మూత మూయకుండా నీరు నిల్వ ఉంచిన చోట్ల దోమలు పెరుగుతాయి. వాటివల్ల డెంగీ, మలేరియా రావచ్చు. ఆగి ఉన్న నీళ్ల మీద ఇవి వృద్ధి చెందుతాయి. జ్వరం, ఎక్కువగా చెమట పట్టడం, వణుకు పుట్టడం, అలసట, కళ్లలో నొప్పి, చర్మం మీద ర్యాషెస్ లాంటి లక్షణాలతో ఈ జ్వరాలు రావచ్చు.
పిల్లలను రక్షించుకునే మార్గాలు:
- పిల్లలను వర్షం నీళ్లలో తడవకుండా చూసుకోవాలి.
- పరిసరాలు శుభ్రంగా ఉంచుకోవాలి. పూల కుండీల్లో, టైర్లలో, డ్రమ్స్లో నీళ్లు నిల్వ లేకుండా చూసుకోవాలి.
- పిల్లలకు ఫుల్ స్లీవ్స్ ఉన్న బట్టలు వేయాలి. జీన్స్, ప్యాంట్లు వేయాలి. దానివల్ల దోమలు కుట్టకుండా కాపాడుకోవచ్చు.
- స్ట్రీట్ ఫుడ్ , జంక్ ఫుడ్ తిననివ్వకండి. ఇంట్లో చేసిన ఆహారమే తినేలా చూడండి.
- పిల్లల రోగనిరోధక శక్తిని పెంచే ఆహారాన్ని తినేలా చూడాలి. అన్ని రకాల కూరగాయలు, పండ్లని వాళ్ల ఆహారంలో చేర్చాలి.
- బయటికి వెళ్లి వచ్చిన వెంటనే స్నానం చేసేలా చూడాలి. వర్షంలో తడిసినా వెంటనే స్నానం చేయించాలి.
- జలుబు, జ్వరం వచ్చినప్పుడు సొంత వైద్యం జోలికి పోకండి. వెంటనే వైద్యుల్ని సంప్రదించండి.
- చేతులతో కళ్లను నలుపుకోకుండా చూడండి. అపరిశుభ్రంగా ఉన్న చేతులతో కళ్లను తాకడం వల్ల కంటి ఇన్ఫెక్షన్లు వచ్చే ప్రమాదం ఉంది.