Almonds Benefits for Memory : బాదం నిజంగానే జ్ఞాపకశక్తిని పెంచుతుందా? డైలీ ఎన్ని తినాలంటే..

Boosting Memory with Almonds : బాదంపప్పు జ్ఞాపకశక్తిని మాత్రమే కాకుండా మొత్తం మెదడు పనితీరును కూడా మెరుగుపరుస్తుంది అంటున్నారు నిపుణులు. ఎందుకంటే ఇవి మీ మెదడు శక్తిని అదుపులో ఉంచడంలో సహాయపడే అనేక పోషకాలను కలిగి ఉంటాయి. వాస్తవానికి జర్నల్ ఆఫ్ న్యూట్రిషన్ అండ్ ఏజింగ్‌లో ప్రచురించిన ఒక అధ్యయనంలో.. పరిశోధకులు బాదం, అభిజ్ఞా పనితీరు మధ్య సంబంధాన్ని అన్వేషించారు. విటమిన్ E, ఫోలేట్, ఫైబర్‌లతో పాటు, ఈ గింజలు మంటను ఎదుర్కోవడానికి మెదడులోని యాంటీఆక్సిడెంట్‌లుగా పనిచేసే ఫైటోకెమికల్స్, వయస్సు-సంబంధిత మెదడు క్షీణతను ఆలస్యం చేసే ఒమేగా-3 పాలీఅన్‌శాచురేటెడ్ కొవ్వు ఆమ్లాలను కలిగి ఉంటాయని తెలిపింది.

ఇంతకీ జ్ఞాపకశక్తిని మెరుగుపరచడంలో బాదం ఎలా సహాయపడుతుంది?

బాదం మెదడులోని న్యూరోట్రాన్స్‌మిటర్ ఎసిహెచ్ ఎసిటైల్‌కోలిన్ స్థాయిలను పెంచుతుంది అంటున్నారు నిపుణులు. ఇది జ్ఞాపకశక్తిని మెరుగుపరచడంలో సహాయపడుతుంది. అల్జీమర్స్ వ్యాధితో పోరాడటానికి సహాయపడుతుంది. దీనికోసం రోజూ ఎనిమిది నుంచి 10 బాదంపప్పులను రాత్రిపూట నీటిలో నానబెట్టి, పగటిపూట తీసుకుంటే ప్రభావవంతంగా పని చేస్తుంది. దానిలోని పోషకాలు శరీరం సులభంగా గ్రహించడానికి బాదంపప్పును నానబెట్టాలి అంటున్నారు నిపుణులు.

బాదంపప్పులో విటమిన్ B6 ఉంది. దీనిని పిరిడాక్సిన్ అని కూడా పిలుస్తారు. ఇది ప్రోటీన్ల జీవక్రియకు సహాయపడుతుంది. ఇది మెదడు కణాల మరమ్మత్తు కోసం ప్రోటీన్ల లభ్యతను మరింత పెంచడంలో సహాయపడుతుంది. అంతేకాకుండా ఈ విటమిన్ మెదడు కణాల మధ్య కమ్యూనికేషన్‌ను మరింత మెరుగుపరిచే న్యూరోట్రాన్స్‌మిటర్ రసాయనాల ఉత్పత్తిని ప్రోత్సహిస్తుంది.

జింక్‌ అనేది రోగనిరోధక శక్తిని పెంపొందించే ఖనిజం. ఇది మెదడు కణాలను దెబ్బతీసే బ్యాక్టీరియా, వైరల్ ఇన్‌ఫెక్షన్‌లను నిరోధిస్తుంది. ప్రొటీన్ మెదడు కణాలను రిపేర్ చేయడంలో సహాయపడుతుంది. తద్వారా జ్ఞాపకశక్తితో సహా అభిజ్ఞా పనితీరును మెరుగుపరుస్తుంది. బాదంలో లీన్ ప్రొటీన్ మధ్యస్తంగా, పుష్కలంగా ఉంటుంది. విటమిన్ E మెదడులోని కణాల వృద్ధాప్యాన్ని మందగించేలా చేస్తుంది. ఇది జ్ఞాపకశక్తిని ప్రభావితం చేస్తుంది.

బాదంపప్పులో అధిక కేలరీలు ఉంటాయని గుర్తించుకోవాలి. ఒకవేళ బరువు తగ్గాలి అనుకుంటే.. నాలుగు నుంచి ఐదు వరకు మాత్రమే తీసుకోండి.