Venu Yellamma Movie: బలగం డైరెక్టర్ రెండో మూవీ షూటింగ్ మొదలయ్యేది అప్పుడే.. మారిపోయిన హీరో

Venu Yellamma Movie: టాలీవుడ్ లో గతేడాది రిలీజైన బలగం మూవీ ఎంతటి సంచలనం సృష్టించిందో మనకు తెలుసు. ఏమాత్రం అంచనాలు లేకుండా రిలీజై బాక్సాఫీస్ దగ్గర పెద్ద సక్సెస్ సాధించిన సినిమా ఇది. ఈ మూవీని డైరెక్ట్ చేసిన వేణు యెల్దండి.. ఇప్పుడు మరో సినిమా చేయబోతున్నాడు. ఈ మూవీ పేరు ఎల్లమ్మ. దీనిపై తాజాగా కీలకమైన అప్డేట్స్ వస్తున్నాయి.

మారిపోయిన హీరో

వేణు యెల్దండి డైరెక్షన్ లో వస్తున్న రెండో మూవీ ఎల్లమ్మ. ఈ సినిమాను చాలా నెలల కిందటే అనౌన్స్ చేశారు. దిల్ రాజు ప్రొడ్యూస్ చేస్తున్న ఈ సినిమాలో నాని నటిస్తున్నాడనీ అప్పట్లో వార్తలు వచ్చాయి. అయితే తాజాగా ఈ మూవీకి సంబంధించి కీలకమైన అప్డేట్ వచ్చింది. ఎల్లమ్మ సినిమా నుంచి నాని తప్పుకున్నాడు.

ఈ సినిమాను చేయడానికి మొదట్లో అంగీకరించినా.. ఫైనల్ డ్రాఫ్ట్ నచ్చకపోడంతో అతడు తప్పుకున్నట్లు సమాచారం. దీంతో అతని స్థానంలో నితిన్ ను తీసుకోనున్నట్లూ వార్తలు వస్తున్నాయి. ఇప్పటికే నితిన్ తో మూవీ టీమ్ మాట్లాడిందని తెలిసింది. మరి దీనికి అతడు ఓకే చెప్పాడా లేదా అన్నది మాత్రం ఇంకా తెలియలేదు.

షూటింగ్ మొదలయ్యే అప్పుడే

ఇక వేణు యెల్దండి డైరెక్ట్ చేస్తున్న ఎల్లమ్మ మూవీ షూటింగ్ వచ్చే ఏడాది ఫిబ్రవరిలో ప్రారంభం కానుంది. తాజాగా సుహాస్ నటించిన జనక అయితే గనక సినిమా ప్రీరిలీజ్ ఈవెంట్లో ప్రొడ్యూసర్ దిల్ రాజుయే ఈ విషయం చెప్పాడు. ఈ ఈవెంట్ కు వేణు కూడా వచ్చాడు. అతడు స్టేజ్ పైకి వెళ్లగానే కింద కూర్చున్న దిల్ రాజు.. అతన్ని ఎల్లమ్మ ఎప్పుడు అని అడిగాడు.

దీనికి వేణు స్పందిస్తూ.. అదేదో సామెత చెప్పినట్లు ఉంది.. కర్త, కర్మ, క్రియ అన్నీ మీరే.. మీరే చెప్పాలి.. నేను రేపు మొదలు పెట్టమన్నా రెడీ.. చెప్పండి.. నవంబర్ లో చేద్దామా అని అన్నాడు. దీనికి దిల్ రాజు స్పందిస్తూ.. వద్దులే ఫిబ్రవరిలో మొదలుపెడదాం అని చెప్పాడు. ప్రశ్న మీరే అడిగి.. సమాధానం మీరే చెప్పారు బాగుందని అని ఈ సందర్భంగా ఈవెంట్ హోస్ట్ అనడం విశేషం.

ప్రియదర్శి, కావ్య కల్యాణ్ రామ్ నటించిన బలగం మూవీ టాలీవుడ్ లో ఓ సెన్సేషన్ గా నిలిచిపోయింది. దీంతో వేణు యెల్దండి నెక్ట్స్ మూవీపై సహజంగానే చాలా అంచనాలు ఉన్నాయి. అందులోనూ నానితో ఎల్లమ్మ అనే టైటిల్ తో మూవీ తీస్తున్నాడనగానే ఎక్కడ లేని ఆసక్తి నెలకొంది. నాని తప్పుకున్నా.. మూవీపై మాత్రం అభిమానుల్లో ఇంకా ఆసక్తి తగ్గలేదు.