Hari Hara Veera Mallu Special Promo: పండుగ రోజున హరిహర వీరమల్లు స్పెషల్ ప్రోమో! ఆ విషయాలపై స్పష్టత వస్తుందా?

Hari Hara Veera Mallu Movie: పవర్ స్టార్ పవన్ కల్యాణ్ హీరోగా నటిస్తున్న ‘హరిహర వీరమల్లు’ చిత్రంపై ఇటీవల స్పష్టత వచ్చింది. ఈ నినిమా రద్దయిందని పుకార్లు చక్కర్లు కొట్టగా.. ఎట్టకేలకు మూవీ టీమ్ స్పందించింది. ఈ చిత్రం వీఎఫ్‍ఎక్స్ పనులు జరుగుతున్నాయని తెలిపింది. నాలుగేళ్ల క్రితం మొదలైన హరిహర వీరమల్లు సినిమా క్యాన్సిల్ కాలేదని సంకేతాలు ఇస్తూనే.. త్వరలోనే స్పెషల్ ప్రోమో తీసుకొస్తామని మెగా సూర్య ప్రొడక్షన్స్ తెలిపింది. అయితే, ఈ ప్రోమో ఎప్పుడు రానుందో తాజాగా సమాచారం చక్కర్లు కొడుతోంది.

హరిహర వీరమల్లు సినిమా ప్రత్యేక ప్రోమో మహా శివరాత్రి అయిన మార్చి 8వ తేదీన రానుందని తెలుస్తోంది. ఆ పర్వదినాన ప్రోమోను తీసుకురావాలని మూవీ టీమ్ భావిస్తోందని సమాచారం. ఈ విషయంపై అధికారిక ప్రకటన రావాల్సి ఉంది. మార్చి 8న ప్రోమో వస్తోందంటూ సోషల్ మీడియాలోనూ జోరుగా ప్రచారం జరుగుతోంది.

నాలుగేళ్లుగా..

స్టార్ డైరెక్టర్ క్రిష్ జాగర్లమూడి దర్శకత్వంలో 2020 సెప్టెంబర్‌లో హరిహర వీరమల్లు షూటింగ్ మొదలైంది. అయితే, ఆ తర్వాత కరోనా వైరస్ ప్రభావంతో చిత్రీకరణ నిలిచింది. అనంతరం వివిధ కారణాలతో ఈ ప్రాజెక్ట్ వాయిదా పడుతూ వస్తోంది. పవన్ కల్యాణ్ ఇతర చిత్రాలకు డేట్లు కేటాయించడం, రాజకీయంగా బిజీ కావడంతో హరిహర వీరమల్లు నిలిచిపోయింది. ఆశించిన స్థాయిలో షూటింగ్ జరగలేదు.

హరిహర వీరమల్లు సినిమా నుంచి డైరెక్టర్ క్రిష్ తప్పుకున్నారని ఇటీవల పుకార్లు వచ్చాయి. దీంతో ఈ చిత్రం క్యాన్సిల్ అవుతుందన్న ఊహాగానాలు జోరందుకున్నాయి. ఈ తరుణంలో వీఎఫ్‍ఎక్స్ పనులు సాగుతున్నాయని మూవీ టీమ్ చెప్పింది. ఈ చిత్రం వస్తుందని స్పష్టమైన సంకేతాలు ఇచ్చింది.

వాటిపై స్పష్టత వస్తుందా!

హరిహర వీరమల్లు చిత్రంతో డైరెక్టర్ క్రిష్ ఇంకా ఉన్నారా లేదా అనే విషయం త్వరలో రానున్న స్పెషల్ ప్రోమోతో స్పష్టమయ్యే అవకాశాలు ఉన్నాయి. అలాగే, ఈ సినిమా రిలీజ్ ఎప్పుడనే విషయం కూడా సస్పెన్స్‌గానే ఉంది. ఈ విషయంపై కూడా ప్రోమోలో మూవీ టీమ్ క్లారిటీ ఇచ్చేలా కనిపిస్తోంది. 2025 సంక్రాంతికి ఈ చిత్రం విడుదల ఉండేలా ప్లాన్ చేసే ఛాన్స్ ఉందని ఇండస్ట్రీ వర్గాల్లో టాక్ నడుస్తోంది.

‘హరిహర వీరమల్లు’ మూవీ వీఎఫ్‍ఎక్స్ వర్క్స్ ఇరాన్, కెనడా, బెంగళూరు, చెన్నై, హైదరాబాద్ ప్రాంతాల్లో జరుగుతున్నాయని ఈ మూవీని నిర్మిస్తున్న మెగా సూర్య ప్రొడక్షన్స్ పతాకంపై ఇటీవల వెల్లడించింది. అందరి ఊహలకు మించి ఈ చిత్రం ఉంటుందని పేర్కొంది.

హరిహర వీరమల్లు చిత్రంలో యోధుడిగా పవన్ కల్యాణ్ కనిపించనున్నారు. తొడ గొట్టాలే తెలుగోడు అంటూ రెండేళ్ల కిందట వచ్చిన పవర్ గ్లాన్స్ అదిరిపోయింది. మొఘలుల నాటి బ్యాక్‍డ్రాప్‍లో పీరియాడికల్ యాక్షన్ థ్రిల్లర్‌గా ఈ చిత్రం రానుంది.

హరిహర వీరమల్లు చిత్రంలో బాలీవుడ్ నటుడు బాబీ డియోల్ కీలకపాత్ర పోషిస్తున్నారు. నిధి అగర్వాల్ హీరోయిన్‍గా చేస్తున్నారు. విక్రమ్‍జీత్ విర్క్, నోరా ఫతేహి, జిస్సు సెంగుప్త, పూజిత పొన్నాడ కీరోల్స్ చేస్తున్నారు. ఆస్కార్ అవార్డ్ విన్నర్ ఎంఎం కీరవాణి ఈ చిత్రానికి సంగీతం అందిస్తున్నారు.