OG Theme Song: ఓజీ నుంచి ‘రేజ్ ఆఫ్ హంగ్రీ చీతా’ థీమ్ సాంగ్ విడుదల.. అదరగొట్టిన థమన్

OG Theme Song: పవర్ స్టార్ పవన్ కల్యాణ్ హీరోగా నటిస్తున్న ఓజీ సినిమా నుంచి వచ్చిన గ్లింప్స్ సునామీ సృష్టిస్తోంది. మోస్ట్ పవర్‌ఫుల్ గ్యాంగ్‍స్టర్‌గా పవన్ కనిపించిన ఈ హంగ్రీచీతా వీడియోకు ప్రేక్షకులు ఫిదా అవుతున్నారు. యువ దర్శకుడు సుజీత్.. పవన్‍ను చూపించిన తీరుకు ప్రశంసలు వస్తున్నాయి. శనివారం (సెప్టెంబర్ 2) పవన్ పుట్టిన రోజు సందర్భంగా రిలీజ్ చేసిన ఈ గ్లింప్స్‌తో ఓజీ సినిమాపై అంచనాలు అత్యంత భారీగా పెరిగిపోయాయి. హైప్ పీక్స్‌కు చేరింది. అయితే, ఓజీ గ్లింప్స్ అంత అద్భుతంగా ఉండడంలో సంగీత దర్శకుడు థమన్ అందించిన బ్యాక్‍గ్రౌండ్ మ్యూజిక్ కూడా ఓ కారణంగా ఉంది. ఈ మ్యూజిక్‍తో కూడిన ఓజీ థీమ్ ఆడియో సాంగ్‍ను చిత్ర యూనిట్ నేడు (సెప్టెంబర్ 3) రిలీజ్ చేసింది.

‘రేజ్ ఆఫ్ హంగ్రీ చీతా’ పేరుతో ఓజీ థీమ్ ఆడియో సాంగ్‍ను మూవీ యూనిట్ నేడు విడుదల చేసింది. థమన్ మ్యూజిక్, పవర్ ఫుల్ లిరిక్స్ ఈ సాంగ్‍లో అదిరిపోయాయి. పవన్ కల్యాణ్ క్యారెక్టర్ ఓజీ చిత్రంలో ఎంత పవర్‌ఫుల్‍గా.. ఇంటెన్స్‌గా, వైలెంట్‍గా ఉండనుందో ఈ థీమ్ సాంగ్ వింటే అర్థమవుతోంది. గ్లింప్స్‌లోనే ఈ థీమ్ సాంగ్ ఉండగా.. నేడు రిలీజ్ చేసిన ఆడియో వెర్షన్ నిడివి ఎక్కువ ఉంది.

ఓజీ నుంచి వచ్చిన ఈ ‘రేజ్ ఆఫ్ హంగ్రీ చీతా’ సాంగ్.. స్పాటిఫై, జియో సావన్, వింక్ మ్యూజిక్, అమెజాన్ మ్యూజిక్, గానా, యూట్యూబ్ మ్యూజిక్, గానా సహా చాలా మ్యూజిక్ స్ట్రీమింగ్ ప్లాట్‍ఫామ్‍ల్లోకి వచ్చింది. ఓజీ సినిమా ఆడియో హక్కులను సోనీ మ్యూజిక్ దక్కించుకుంది.

సాహో ఫేమ్ డైరెక్టర్ సుజీత్.. ఓజీ సినిమాకు దర్శకత్వం వహిస్తున్నారు. పాన్ ఇండియా రేంజ్‍లో ఈ మూవీ రానుంది. గ్లింప్స్ కూడా తెలుగుతో పాటు హిందీ, తమిళంలో వచ్చింది. భారీ బడ్జెట్‍తో ఈ చిత్రాన్ని నిర్మిస్తున్నారు డీవీవీ దానయ్య. ఇప్పటికే ఈ సినిమా షూటింగ్ సగానికిపైగా పూర్తయినట్టు తెలుస్తోంది. అయితే, ఓజీ మూవీ రిలీజ్ గురించి చిత్ర యూనిట్ ఇంకా ఎలాంటి సంకేతాలు ఇవ్వలేదు. షూటింగ్ కంప్లీట్ అయ్యాక రిలీజ్‍ తేదీపై క్లారిటీ వచ్చే ఛాన్స్ ఉంది.  ఈ సినిమాలో ప్రియాంక్ అరుళ్ మోహన్ హీరోయిన్‍గా నటిస్తున్నారు.