Bumrah Wife: బాగా లావయ్యావ్.. నెటిజన్ కామెంట్‌కు బుమ్రా వైఫ్ సంజనా దిమ్మదిరిగే రిప్లై

Bumrah Wife: టీమిండియా పేస్ బౌలర్ బుమ్రా భార్య, ప్రముఖ స్పోర్ట్స్ ప్రజెంటర్ సంజనా గణేషన్ పై నోరు పారేసుకున్న ఓ నెటిజన్ కు ఆమె దిమ్మదిరిగే రిప్లై ఇచ్చింది. వాలెంటైన్స్ డే సందర్భంగా భర్త బుమ్రాతో కలిసి చేసిన ఓ వీడియోలో ఆమె గతంలో కంటే చాలా లావుగా కనిపించింది. దీంతో పలువురు అభిమానులు దారుణమైన కామెంట్స్ చేశారు.

బుమ్రా యార్కర్ స్టైల్లోనే సంజనా రిప్లై

బుమ్రా యార్కర్లకు బ్యాటర్ల దిమ్మ ఎలా తిరుగుతుందో ఇప్పుడు సంజనా ఇచ్చిన రిప్లై కూడా అలాగే ఉంది. బుమ్రాతో కలిసి సంజనా వాలెంటైన్స్ డే కోసం లోరియాల్ బ్రాండ్ ప్రమోషన్లలో భాగంగా ఓ వీడియో చేసింది. ఇందులో ఈ కపుల్ తమ వాలెంటైన్స్ డే గోల్స్ తోపాటు అసలు భార్యాభర్తలంటే ఎలా ఉండాలో అతికినట్లు చెప్పారు.

చాలా మంది ఈ జంటను చూసి పాజిటివ్ కామెంట్స్ చేయగా.. కొందరు మాత్రం సంజనా మరీ లావెక్కడంపై నెగటివ్ కామెంట్స్ చేశారు. "వదిన చాలా లావుగా అనిపిస్తోంది" అని ఓ అభిమాని కామెంట్ చేశాడు. దీనికి సంజనా స్పందించింది. "నీకు స్కూల్లో సైన్స్ బుక్ మాత్రం గుర్తుండదు కానీ ఆడవాళ్ల శరీరాల గురించి కామెంట్ చేస్తున్నావ్. వెళ్లు ఇక్కడి నుంచి" అంటూ రిప్లై ఇచ్చింది.

ఆమె ఇచ్చిన రిప్లై చూసి ఫ్యాన్స్ ఫిదా అవుతున్నారు. బుమ్రా యార్కర్లలాగానే చాలా స్ట్రాంగా ఇచ్చావ్ అంటూ కొందరు కామెంట్ చేశారు. బుమ్రా, సంజనా మార్చి, 2021లో పెళ్లి చేసుకున్న విషయం తెలిసిందే. గతేడాది సెప్టెంబర్ లో వీళ్లకు ఓ బాబు జన్మించాడు. సహజంగానే డెలివరీ తర్వాత చాలా మంది మహిళల్లాలే సంజనా కూడా కాస్త ఒళ్లు చేసింది.

బుమ్రా నంబర్ 1

దీనిపై ట్రోలింగ్ చేయడం, నెగటివ్ కామెంట్స్ చేయడం సరికాదని అలాంటి నెటిజన్లకు మరికొందరు క్లాస్ పీకుతున్నారు. ప్రస్తుతం బుమ్రా టీమిండియాతో కలిసి రాజ్‌కోట్ లో ఉన్న విషయం తెలిసిందే. విశాఖపట్నం టెస్ట్ తర్వాత టెస్ట్ క్రికెట్ లో నంబర్ వన్ ర్యాంక్ అందుకున్న తొలి టీమిండియా పేస్ బౌలర్ గా నిలిచిన బుమ్రా.. ఇప్పుడదే ర్యాంకుతో మూడో టెస్టు బరిలో దిగబోతున్నాడు.

ఇంగ్లండ్ తో మిగిలిన మూడు టెస్టులకు అతన్ని వైస్ కెప్టెన్ గా నియమించారు. నిజానికి తొలి రెండు టెస్టుల్లో సుమారు 58 ఓవర్ల వరకూ వేసిన బుమ్రాపై పనిభారం పెరుగుతోందని, మూడో టెస్టుకు విశ్రాంతి ఇద్దామన్న ఆలోచనలో టీమ్ మేనేజ్‌మెంట్ ఉన్నట్లు వార్తలు వచ్చాయి. అయితే అతన్ని వైస్ కెప్టెన్ ను చేసి ఆ వార్తలకు తెరదించారు. విశాఖ టెస్టులో 9 వికెట్లతో రాణించిన బుమ్రా.. గురువారం (ఫిబ్రవరి 15) నుంచి మూడో టెస్టుకు రెడీ అవుతున్నాడు.

ఇప్పటికే ఇండియా, ఇంగ్లండ్ టీమ్స్ రాజ్‌కోట్ చేరుకొని ప్రాక్టీస్ చేస్తున్నాయి. ఇంగ్లండ్ టీమ్ సోమవారమే (ఫిబ్రవరి 12) రాజ్‌కోట్ లో దిగింది. పది రోజుల పాటు ఆ టీమ్ అబుధాబిలో వెకేషన్ ఎంజాయ్ చేసి రావడం విశేషం.