Jasprit Bumrah: బుమ్రా డెడ్లీ యార్కర్‌పై స్పందించిన పాకిస్థాన్ మాజీ పేసర్

విశాఖపట్నం వేదికగా జరిగిన రెండో టెస్టు తొలి ఇన్నింగ్స్‌లో జస్‍ప్రీత్ బుమ్రా వేసిన యార్కర్‌కు ఇంగ్లండ్ బ్యాటర్ ఓలీ పోప్ బౌల్డ్ అయ్యాడు. ఈ అద్భుతమైన యార్కర్‌తో స్టంప్స్ ఎగిరిపడ్డాయి. ఈ వీడియో సోషల్ మీడియాలో వైరల్‍గా మారింది. 

ఓలీ పోప్‍ను ఔట్ చేశాక.. అత్యంత వేగంగా 150 టెస్టు వికెట్లను తీసిన భారత పేసర్‌గా బుమ్రా రికార్డులకెక్కాడు. అయితే, బుమ్రా వేసిన ఈ డెడ్లీ యార్కర్‌ అందరినీ ఆకట్టుకుంటోంది. 

సూపర్ యార్కర్‌తో పోప్‍ను బుమ్రా బౌల్డ్ చేసిన వీడియోను ఎక్స్(ట్విట్టర్)లో పోస్ట్ చేసిన నెటిజన్.. పాకిస్థాన్ మాజీ పేసర్ వకార్ యూనిస్‍ను ట్యాగ్ చేశారు. ఈ యార్కర్ ఎవరినైనా గుర్తు చేసిందా అని ప్రశ్నించారు. 

దీనికి వకార్ యూనిస్ స్పందించాడు. బుమ్రా మ్యాజిక్ అంటూ ప్రశంసించాడు. “ఎవరూ గుర్తు రాలేదు. ఇది బుమ్రా మ్యాజిక్” అని వకార్ రిప్లై ఇచ్చాడు. 

ఈ రెండో టెస్టు తొలి ఇన్నింగ్స్‌లో ఆరు వికెట్లు తీసి ఇంగ్లండ్‍ను కుప్పకూల్చాడు బుమ్రా. రెండో ఇన్నింగ్స్‌లోనూ మూడు వికెట్లు పడగొట్టి.. భారత్ గెలుపులో కీలకపాత్ర పోషించాడు. ప్లేయర్ ఆఫ్ ది మ్యాచ్ అవార్డును కూడా అందుకున్నాడు.  

రెండో టెస్టులో టీమిండియా 106 పరుగుల తేడాతో ఇంగ్లండ్‍పై గెలిచింది. దీంతో ఐదు టెస్టుల సిరీస్ 1-1తో సమంగా నిలిచింది. ఈ సిరీస్‍లో మూడో టెస్టు ఫిబ్రవరి 15వ తేదీన ప్రారంభం కానుంది.