TTD Board Decisions : శ్రీవాణి ట్రస్ట్ రద్దు, సర్వదర్శనం రెండు మూడు గంటల్లోనే - టీటీడీ బోర్డు కీలక నిర్ణయాలివే

TTD Board Decisions : తిరుమల తిరుపతి దేవస్థానం కొత్త పాలకమండలి తొలి సమావేశం ఇవాళ తిరుమలలో జరిగింది. ఈ సమావేశంలో టీటీడీ కీలక నిర్ణయాలు తీసుకుంది. శ్రీవాణి ట్రస్ట్ ను రద్దు చేస్తూ టీటీడీ సంచలన నిర్ణయం తీసుకుంది. టీటీడీ ఛైర్మన్ బీఆర్ నాయుడు ఆధ్వర్యంలో జరిగిన సమావేశంలో బోర్డు ఈ నిర్ణం తీసుకుంది. తిరుమలలో శారదా పీఠానికి కేటాయించిన భవనాన్ని స్వాధీనం చేసుకోవాలని నిర్ణయించింది. శారదా పీఠం లీజు రద్దు చేసింది. టీటీడీలో అన్యమత ఉద్యోగుల సేవలకు చెక్ పెట్టడంతో పాటు దేవస్థానంలో అతిథి గృహాలకు సొంత పేర్లు పెట్టకూడదని నిర్ణయించింది.

పర్యాటకం దర్శన టికెట్లు రద్దు

రెండు, మూడు గంటల్లోనే సర్వదర్శనం భక్తులకు దర్శనం అయ్యేలా చర్యలు తీసుకోవాలని టీటీడీ నిర్ణయించింది. టీటీడీ పనిచేస్తోన్న అన్యమత ఉద్యోగులను ప్రభుత్వానికి అప్పగించాలని బోర్డు నిర్ణయించింది. తిరుపతి శ్రీనివాస సేతు ఫ్లై ఓవర్ కు గరుడ వారధిగా నామకరణం చేయాలని నిర్ణయించినట్లు టీటీడీ ఛైర్మన్ బీఆర్ నాయుడు తెలిపారు. తిరుమల డంపింగ్‌ యార్డులోని చెత్తను మూడు నెలల్లోనే తొలగిస్తామన్నారు. తిరుమలలో రాజకీయాలు మాట్లాడకుండా నిషేధం విధించాలని నిర్ణయించామన్నారు. టీటీడీ చెందిన నగదును ప్రైవేటు బ్యాంకుల్లో నుంచి ప్రభుత్వ బ్యాంకుల్లోకి బదలాయిస్తామన్నారు. పర్యాటకం ద్వారా దర్శన టికెట్లను పూర్తిగా రద్దు చేస్తున్నామన్నారు. నూతనంగా నిర్మిస్తున్న ముంతాజ్‌ హోటల్‌ అనుమతులు రద్దు చేస్తున్నామని తెలిపారు. తిరుపతి ప్రజలకు ప్రతినెల మొదటి మంగళవారం దర్శనానికి అవకాశం కల్పిస్తామని బీఆర్‌ నాయుడు చెప్పారు.

అన్నప్రసాదంలో మరో ఐటమ్

అలిపిరిలో దేవలోక్‌ సంస్థకు కేటాయించిన 20 ఎకరాల భూమిని టీటీడీకి అప్పగించే విధంగా ప్రభుత్వానికి లేఖ రాస్తామని టీటీడీ ఛైర్మన్ బీఆర్ నాయుడు తెలిపారు. అన్నప్రసాదంలో మరో ఐటమ్‌ను భక్తులకు వడ్డించాలని నిర్ణయించామన్నారు. శ్రీవారి ప్రసాదాల్లో నాణ్యమైన నెయ్యి వినియోగించేందుకు కమిటీ ఏర్పాటు చేయాలని తీర్మానం చేశామన్నారు. టీటీడీ ఉద్యోగులకు బ్రహ్మోత్సవ బహుమానాన్ని రూ.14 వేల నుంచి రూ.15,400లకు పెంచుతూ పాలక మండలి నిర్ణయం తీసుకున్నట్లు చెప్పారు. వైసీపీ ప్రభుత్వంలో శారదా పీఠానికి తిరుమలలో కేటాయించిన భూములు రద్దు చేయాలని నిర్ణయించింది. ఆ స్థలంలో శారదా పీఠం నిర్మించిన భవనాలను కూల్చివేయాలని నిర్ణయం తీసుకుంది. పర్యటక శాఖకు కేటాయిస్తున్న 4 వేల దర్శనం టిక్కెట్లు రద్దు చేస్తునట్లు టీటీడీ ఛైర్మన్ బీఆర్ నాయుడు తెలిపారు.

టీటీడీ ధ‌ర్మక‌ర్తల‌ మండ‌లి మరికొన్ని నిర్ణయాలు

• ఆర్టిఫిషియ‌ల్ ఇంటిలిజన్స్ ఉపయోగించి క్యూ లైన్లలో భక్తులు ఎక్కువసేపు వేచి ఉండకుండా 2 లేదా 3 గంటల్లోనే దర్శనమయ్యేలా ఒక నిపుణుల కమిటీ ఏర్పాటు చేయాలని టీటీడీ బోర్డు నిర్ణయించింది. ఈ కమిటీ ఇచ్చే రిపోర్టు ఆధారంగా భక్తులకు త్వరితగతిన దర్శనం అయ్యేలా చర్యలు తీసుకోనున్నారు.
• అలిపిరిలో టూరిజం కార్పొరేష‌న్ ద్వారా దేవలోక్ కు కేటాయించిన 20 ఎకరాల భూమిని వెనక్కి తీసుకుని టీటీడీకి ఇచ్చే విధంగా ప్రభుత్వాన్ని కోరాలని నిర్ణయం.
• తిరుమలలో రాజకీయాలు మాట్లాడేవారిని, ప్రచారం చేసే వారిపై చర్యలు తీసుకోవాలని నిర్ణయం.
• శ్రీ‌వాణి ట్రస్టు పేరును మార్చేందుకు సాధ్యాసాధ్యాలను పరిశీలించి వచ్చే సమావేశంలో ఒక రిపోర్టు ఇవ్వాలని ఆదేశం
• వివిధ రాష్ట్రాలకు చెందిన టూరిజం కార్పొరేషన్లు, ఏపీఎస్ ఆర్టీసీ, టీఎస్ ఆర్టీసీలకు టీటీడీ కేటాయించిన శ్రీవారి ప్రత్యేక ప్రవేశ దర్శనం (రూ.300) టికెట్లకు సంబంధించి అవకతవకలు జరిగాయన్న ఫిర్యాదులు నేపథ్యంలో ఆ కోటాను పూర్తిగా రద్దు చేయాలని నిర్ణయం.
• తిరుమ‌ల‌లో గోగ‌ర్భం డ్యామ్ వ‌ద్ద విశాఖ శార‌ద పీఠానికి చెందిన మ‌ఠం నిర్మాణంలో అవ‌క‌త‌వ‌క‌లు, ఆక్రమ‌ణలు జ‌రిగిన‌ట్లు టీటీడీ అధికారుల క‌మిటీ ఇచ్చిన నివేదిక ఆధారంగా భ‌వ‌నం లీజును ర‌ద్దు చేయాల‌ని నిర్ణయం.
• బ్రహ్మోత్సవాలలో విశేష సేవ‌లు అందించిన ఉద్యోగుల‌కు గ‌త సంవ‌త్సరం ఇచ్చిన బ్రహ్మోత్సవ బ‌హుమానాన్ని 10 శాతం పెంచాల‌ని నిర్ణయం. రెగ్యుల‌ర్ ఉద్యోగుల‌కు రూ.15,400, కాంట్రాక్ట్, ఔట్ సోర్సింగ్ ఉద్యోగుల‌కు రూ.7,535 బ్రహ్మోత్సవ బ‌హుమానం.
• శ్రీ‌వారి ఆల‌యంలో లీకేజీల నివార‌ణ‌కు, అన్న ప్రసాద కేంద్రం ఆధునీక‌ర‌ణ‌కు టీవీఎస్ సంస్థతో ఎంఓయూ. ఈ ప‌నులు ఉచితంగా చేయ‌నున్న టీవీఎస్ సంస్థ.