Actor Sharath kumar: ఎమ్మెల్సీ కవితతో నటుడు శరత్ కుమార్ భేటీ - రాజకీయాలపై చర్చ!

Sharath Kumar Meets MLC Kavitha: బీఆర్ఎస్ ఎమ్మెల్సీ కవితతో సీనియర్ నటుడు, సమతావ మక్కల్‌ కచ్చి పార్టీ అధ్యక్షుడు శరత్‌కుమార్ భేటీ అయ్యారు. ఈ సందర్భంగా ప్రస్తుత దేశ రాజకీయాలు, ఇతర అంశాలపై ఇరువురు చర్చించారు. బీఆర్ఎస్ పార్టీ స్థాపన ఉద్దేశాలు, లక్ష్యాలు, ఎజెండా వంటి అంశాల గురించి శరత్ కుమార్.. కవితను అడిగి తెలుసుకున్నారు. అయితే ఈ భేటీ వెనక గల కారణాలు తెలియాల్సి ఉంది.

ఎమ్మెల్సీ కవితతో శరత్ కుమార్ భేటీ కావటం ఆసక్తికరంగా మారింది. ఇప్పటికే టీఆర్ఎస్ ను బీఆర్ఎస్ గా మారటంతో.. దేశవ్యాప్తంగా పార్టీ విస్తరించే అంశంపై దృష్టిపెట్టారు. గతంలో పలువురు నేతలతో పాటు సినీ ప్రముఖులు, రైతు సంఘాల ప్రతినిధులతో కూడా కేసీఆర్ సమాలోచనలు జరిపారు. ఈ నేపథ్యంలో తాజాగా శరత్ కుమార్… కవితతో భేటీ కావటం ఇంట్రెస్టింగ్ పరిణామంగా మారింది. అయితే ఈ సాధారణ భేటీనా లేక రాజకీయ కోణంలోనే సమావేశం జరిగిందా అనే దానిపై క్లారిటీ రావాల్సి ఉంది.

మరోవైపు బీఆర్ఎస్ పార్టీలో ఏపీలో కార్యాచరణ ప్రారంభించగా.. వచ్చే నెలలో మహారాష్ట్రలో బీఆర్ఎస్ సభ ఖరారు అయింది. ఇదే కాకుండా ఇతర రాష్ట్రాలపై కూడా బీఆర్ఎస్ అధినాయకత్వం ఫోకస్ చేస్తోంది. ఇప్పటికే తమిళనాడులోని పలువురు నేతలు కూడా బీఆర్ఎస్ లో చేరారు. తాజాగా ఒడిశాకు చెందిన సీనియర్ లీడర్, మాజీ ముఖ్యమంత్రి గమాంగ్‌ ఫ్యామిలీతో కలిసి బీఆర్ఎస్‌ పార్టీలో చేరారు. గిరిధ‌ర్‌తో పాటు 12 మంది మాజీ ఎమ్మెల్యేలు, న‌లుగురు మాజీ ఎంపీలు బీఆర్ఎస్ పార్టీలో చేరారు. గిరిధర్ గమాంగ్‌ను బీఆర్ఎస్ ఒడిషా శాఖ అధ్యక్షుడిగా ప్రకటించే అవకాశం ఉంది.