అమెరికాలో మళ్లీ కాల్పుల కలకలం.. నలుగురు మృతి!

US Shooting news | అమెరికాలో మళ్లీ కాల్పుల మోత మోగింది. ఓక్లహోమాకు చెందిన టుల్సాలోని ఓ వైద్య భవనంలోకి.. రైఫిల్​, హ్యాండ్​ గన్​తో ప్రవేశించిన ఓ ఆగంతకుడు విధ్వంసం సృష్టించాడు. భవనంలోని ప్రజలపై కాల్పులకు తెగబడ్డాడు. ఈ ఘటనలో నలుగురు మరణించినట్టు సమాచారం. టెక్సస్​ కాల్పుల ఘటన నుంచి అమెరికా ఇంకా కోలుకోకముందే.. మరో విషాదం చోటుచేసుకోవడం గమనార్హం.

స్థానిక కాలమానం ప్రకారం.. బుధవారం జరిగింది ఈ ఘటన. కాగా ఈ ఘటనలో నిందితుడు కూడా మరణించినట్టు తెలుస్తోంది.

"సెంట్​ ఫ్రాన్సిస్​ హాస్పిటల్​ క్యాంపస్​లో కాల్పుల ఘటన చోటుచేసుకుంది. ఘటనపై సమాచారం అందుకున్న మూడు నిమిషాలకే ఘటనాస్థలానికి వెళ్లాము. మొత్తం ఐదు మృతదేహాలు మా వద్ద ఉన్నాయి. వాటిల్లో నిందితుడు మృతదేహం కూడా ఉంది," అని పోలీసులు వెల్లడించారు.

Tulsa shooting | సొంతంగా చేసుకున్న గాయాల కారణంగానే నిందితుడు మరణించినట్టు సమాచారం. నిందితుడి వివరాలను గుర్తించేందుకు పోలీసులు ప్రస్తుతం ప్రయత్నిస్తున్నారు. అతని వయస్సు 35-40ఏళ్ల మధ్యలో ఉంటుందని భావిస్తున్నారు. 

కాగా.. తాజా ఘటనను అమెరికా అధ్యక్షుడు జో బైడెన్​కు అక్కడి అధికారులు వివరించారు. టుల్సాకు కావాల్సిన సాయం చేసేందుకు బైడెన్​ సిద్ధంగా ఉన్నట్టు తెలుస్తోంది.

టెక్సాస్​ అలజడి..

Texas school shooting | గత వారమే అమెరికాలో భీకర కాల్పుల ఘటన జరిగింది. ఓ 18ఏళ్ల యువకుడు.. గన్​ కొనుగోలు చేసి.. తాను చదువుకుంటున్న పాఠశాలకు వెళ్లాడు. అక్కడ మారణహోమాన్ని సృష్టించాడు. 19మంది చిన్నారులు సహా ఇద్దరు టీచర్లు ఈ ఘటనలో ప్రాణాలు కోల్పోయారు.

ఈ ఘటన ప్రపంచవ్యాప్తంగా సంచలనం సృష్టించింది.