Mother kills daughter : కూతురు రిలేషన్​లో ఉందని.. గొడ్డలితో నరికి చంపిన తల్లి!

Mother kills daughter : ఉత్తర ప్రదేశ్​లో దారుణ ఘటన వెలుగులోకి వచ్చింది. రిలేషన్​ నుంచి బయటకు రావాలని చెప్పినా వినడం లేదన్న కారణంతో.. ఓ మహిళ, తన కూతురిని అతి కిరాతకంగా చంపేసింది!

ఇదీ జరిగింది..

ఉత్తర్​ ప్రదేశ్​ కౌషంబి అనే ప్రాంతంలో జరిగింది ఈ ఘటన. స్థానికంగా నివాసముంటున్న శివ్​పతి అనే మహిళకు ముగ్గురు పిల్లలు ఉన్నట్టు తెలుస్తోంది. అబ్బాయికి పెళ్లి జరగ్గా.. అమ్మాయిలు మైనర్లు. కాగా.. తన 15ఏళ్ల కూతురు, గ్రామంలోని మరో అబ్బాయితో ప్రేమలో ఉన్నట్టు తెలుసుకుందు శివ్​పతి. అతడిని మర్చిపోవాలని చాలాసార్లు చెప్పింది. అందుకు ఆ బాలిక వినలేదు. ఇదే విషయంపై అక్టోబర్​ 2న ఇద్దరి మధ్య గొడవ జరిగింది. ప్రియుడిని అస్సలు విడిచిపెట్టనని తేల్చిచెప్పింది ఆ మైనర్​. కోపంతో ఊగిపోయిన శివ్​పతి.. కర్రలతో ఆమెను చితకబాదింది. అంతటితో ఆగకుండా.. గొడ్డలి తీసుకొచ్చి, బాలికను నరికి చంపేసింది!

బాలిక మరణవార్తను పోలీసులకు చెప్పకుండా.. మహిళకు సాయం చేశారు, ఆమె కుటుంబసభ్యులు. శివ్​పతి మరో కూతురు, కోడలు కలిసి.. మృతదేహాన్ని మాయం చేసేందుకు సాయం చేశారు. మృతదేహాన్ని ఒక సంచిలో కుక్కి.. సమీపంలోని బావిలో పడేశారు.

ఇలా బయటపడింది..

UP crime news : కూతురిని చంపిన కొన్ని రోజులకు.. పోలీసుల వద్దకు వెళ్లింది శివ్​పతి. తన బిడ్డ కనిపించడం లేదని, ఎవరో కిడ్నాప్​ చేసిందని.. అక్టోబర్​ 14న ఫిర్యాదు చేసింది.

"పొలం పనుల కోసం బయటకు వెళ్లింది. ఆ తర్వాత ఇంటికి రాలేదు," అని మహిళ చెప్పింది. ఘటనపై కేసు నమోదు చేసుకున్న పోలీసులు.. బాలిక కోసం తీవ్రంగా గాలింపు చర్యలు చేపట్టారు. ఎంత వెతికినా ఫలితం దక్కలేదు.

చివరికి.. ఈ నెల 26న, కొందరు గ్రామస్థులు పోలీసులకు ఫోన్​ చేశారు. బావిలో ఓ బాలిక మృతదేహం కనిపించినట్టు వివరించారు. ఘటనాస్థలానికి వెళ్లిన పోలీసులు.. బాలిక మృతదేహాన్ని స్వాధీనం చేసుకుని, పోస్టుమార్టం కోసం ఆసుపత్రికి తరలించారు.

Mother kills daughter over love affair : ఈ కేసుపై దర్యాప్తు చేపడుతుండగా.. మరణించిన బాలిక తల్లి శివ్​పతిపై పోలీసులు అనుమానాలు మొదలయ్యాయి. ఆమెను విచారించగా.. అసలు విషయం బయటపడింది.

"అవును. నేనే నా కూతురిని చంపేశాను. ఆ అబ్బాయిని మర్చిపోవాలని చెప్పాను. వినలేదు. అందుకే చంపేశాను. నా మీద డౌట్​ రాకుండా ఉండాలని కిడ్నాప్​ అని ఫిర్యాదు చేశాను," అని పోలీసులకు వెల్లడించింది నిందితురాలు.

శివ్​పతిని పోలీసులు సోమవారం అరెస్ట్​ చేశారు. శివ్​పతి మరో కూతురిని కూడా అదుపులోకి తీసుకున్నారు. పరారీలో ఉన్న మహిళ కోడలిని పట్టుకునేందుకు చర్యలు చేపట్టినట్టు అధికారులు వివరించారు.