ఆటపాటలతో వేడుకగా వృద్ధురాలి 'అంత్యక్రియలు'! చివరి కోరిక నెరవేర్చిన కుటుంబం..

తమిళనాడులో జరిగిన ఓ ఘటన ఇప్పుడు వార్తల్లో నిలిచింది. మరణించిన వృద్ధురాలికి, ఆమె కుటుంబం ఆటపాటలతో ఘనంగా అంత్యక్రియలు చేసింది! అయితే, దీని వెనుక ఒక కారణం ఉంది..

ఆటలు, పాటలతో అంత్యక్రియలు.. ఎందుకు?

తమిళనాడు మధురై జిల్లాలోని ఉసిలంపట్టి సమీపంలో జరిగిన ఈ ఘటన. చిన్నపలారపట్టి చెందిన పూజారి పరమదేవర భార్య పేరు నాగమ్మాల్​​. ఆమె భర్త 15ఏళ్ల క్రితం మరణించాడు. 96ఏళ్ల నాగమ్మాల్​ ఇటీవలే కన్నుమూసింది. అయితే, మరణానికి ముందు ఆమె తన చివరి కోరికను కుటుంబసభ్యులతో పంచుకుంది.

“ఇతరుల్లాగా నా అంత్యక్రియలు బాధగా, దిగ్భ్రాంతిగా జరగకూడదు. అందరు సంతోషంగా, డ్యాన్స్​లు వేయాలి. పాటలు పాడాలి. ఘనంగా వేడుకలు జరుగుపుకోవాలి,” అని ఆమె చెప్పింది. ఇక నాగమ్మాల్​ మరణం తర్వాత, ఆమె కోరికను కుటుంబసభ్యులు నెరవేర్చారు.

నాగమ్మాల్​కి మొత్తం ఇద్దరు కుమారులు, నలుగురు కుమార్తెలు. ఆమెకు చాలా మంది మనవళ్లు, మనవరాళ్లు ఉన్నారు. నాగమ్మాల్​ అంత్యక్రియల నేపథ్యంలో ఏర్పాటు చేసిన ప్రోగ్రామ్​కి వీరందరు తరలివెళ్లారు.

స్టేజ్​ ఏర్పాటు చేశారు అందరు డ్యాన్స్​లు చేశారు, పాటలు పాడారు. కుటుంబంలోని మహిళలు, బాలబాలికలు సైతం నృత్యం చేశారు. అనంతరం జానపద కళా కార్యక్రమం జరిగింది. అందరు సంతోషంగా అందులో పాల్గొన్నారు. సమీపంలోని ప్రజలు కూడా తరలివెళ్లారు.

ఒకానొక దశలో ఆ ప్రాంతం మొత్తం పాటలతో హోరెత్తిపోయింది. అక్కడ అంత్యక్రియల కార్యక్రమం జరగుతోందంటే ఎవరు నమ్మలేదు. కుటుంబసభ్యులతో పాటు అక్కడికి వెళ్లిన వారందరు సంతోషంగా సమయాన్ని గడిపారు.

నాగమ్మాల్​ మనవళ్లు, మనవరాళ్లు, కుటుంబ సభ్యులు ఎంతో ఆనందోత్సాహాలతో సంబరాలు చేసుకున్నారు. కానీ తమ దుఖాన్ని దిగమింగుకుని వృద్ధురాలి కోరికను నెరవేర్చడానికి కుటుంబసభ్యులు చేసిన ప్రయత్నాలను స్థానికులు అభినందిస్తున్నారు.

ఇక ఆట, పాటల కార్యక్రమాలు పూర్తైన తర్వాత, చివరికి నాగమ్మాల్​కి కుటుంబసభ్యులు అంత్యక్రియలు నిర్వహించారు. ఆమె ఆత్మకు శాంతి చేకూరాలని ప్రార్థనలు చేశారు.