CJI DY Chandrachud: సీజేఐ జస్టిస్ చంద్రచూడ్ ను కూడా వదలడం లేదు; బరితెగిస్తున్న స్కామర్స్

ఇంటర్నెట్ యుగంలో మోసాలు సర్వసాధారణమైపోయాయి. ఇంటర్నెట్ వాడకంతో పాటు అదే స్థాయిలో ఆన్లైన్ మోసాలు పెరుగుతున్నాయి. తెలిసిన వారి పేరుతో ఐడీ క్రియేట్ చేసి, వారు అడుగుతున్నట్లుగా డబ్బులు అడగడం స్కామర్లకు కామన్ అయిపోయింది. ఎవరి పేరుతో, ఏ స్థాయిలో ఉన్నవారి పేరుతో డబ్బులు అడుగుతున్నాం అనే కనీస కామన్ సెన్స్ కూడా వారిలో ఉండడం లేదు.

సీజేఐ నుంచి మెసేజ్

ఇటీవల ఎక్స్ యూజర్ కైలాష్ మేఘ్వాల్ కు సుప్రీంకోర్టు ప్రధాన న్యాయమూర్తి జస్టిస్ డీవై చంద్రచూడ్ పేరుతో ఒక మెసేజ్ వచ్చింది. సీజేఐ జస్టిస్ డీవై చంద్రచూడ్ ఫొటోతో, ఆయన పేరుతో ఐడీ క్రియేట్ చేసిన ఒక స్కామర్ ఆ మెసేజ్ పంపించాడు. ఆ వ్యక్తి నుంచి తనకు వచ్చిన మెసేజ్ స్నాప్ షాట్ ను మేఘవాల్ ఎక్స్ లో పోస్ట్ చేశారు. ఆ సందేశంలో మోసగాడు తమను తాము సీజేఐగా పరిచయం చేసుకుని, తమకు అత్యవసర కొలీజియం సమావేశం ఉందని పేర్కొన్నారు. తాను ఢిల్లీలోని కన్నాట్ ప్లేస్ లో చిక్కుకున్నానని, క్యాబ్ కు రూ.500 అవసరమని చెప్పాడు. కోర్టుకు వెళ్లిన తర్వాత డబ్బులు తిరిగి ఇచ్చేస్తానని హామీ ఇచ్చారు. సందేశం చివరలో, స్కామర్ టెక్స్ట్ నిజమైనదిగా కనిపించడానికి "ఐప్యాడ్ నుండి పంపబడింది" అనే మెసేజ్ ను కూడా జోడించాడు.

ఫ్రెండ్స్ ఏం చేయమంటారు?

ఈ మెసేజ్ ను ఆగస్టు 25న ఎక్స్ లో కైలాష్ మేఘ్వాల్ షేర్ చేశారు. ఆ పోస్ట్ కు ‘‘ఫ్రెండ్స్ ఏం చేయమంటారు?’’ అనే కామెంట్ ను యాడ్ చేశాడు. ఆ పోస్ట్ కు రెండు లక్షలకు పైగా వ్యూస్ వచ్చాయి. 2,500కు పైగా లైక్స్ వచ్చాయి. చాలా మంది ఈ పోస్ట్ కు కామెంట్స్ సెక్షన్ లో తమ స్పందనలను పంచుకున్నారు. ‘తాను చూపించిన అతి విశ్వాసానికి రూ.1,000 పంపండి' అని ఓ వ్యక్తి కామెంట్ చేశాడు. ‘‘అతను దానిని 'ఐప్యాడ్' నుండి పంపాడు, కాబట్టి ఖచ్చితంగా చట్టబద్ధమైనదే’’ అని మరో యూజర్ సరదాగా రాశాడు. ‘‘అభ్యర్థనను మూడు వారాలకు వాయిదా వేయండి. త్రిసభ్య ధర్మాసనాన్ని ఏర్పాటు చేసి తీర్పు ఇవ్వండి’’ అని మరొకరు పోస్ట్ చేశారు.