Elections news : ఛత్తీస్​గఢ్​, మిజోరం ఎన్నికలకు రంగం సిద్ధం- పూర్తి వివరాలు..

Elections news : 2024 లోక్​సభ ఎన్నికలకు సెమీఫైనల్స్​గా భావిస్తున్న 5 రాష్ట్రాల ఎన్నికలు మరికొన్ని గంటల్లో ప్రారంభం కానున్నాయి. తొలుత.. మిజోరం, ఛత్తీస్​గఢ్​ (తొలి దశ) రాష్ట్రాలు మంగళవారం నాడు ఎన్నికలకు వెళ్లనున్నాయి. ఇప్పటికే అన్ని ఏర్పాట్లు పూర్తయ్యాయి. ఆ వివరాలు..

మిజోరం అసెంబ్లీ ఎన్నికలు..

మిజోరంలో మొత్తం 40 అసెంబ్లీ సీట్లు ఉన్నాయి. మెజారిటీకి 21 సీట్లు అవసరం. 2018లో జరిగిన ఎన్నికల్లో మిజో నేషనల్​ ఫ్రెంట్​ విజయం సాధించి ప్రభుత్వాన్ని ఏర్పాటు చేసింది. మొత్తం 26 సీట్లల్లో గెలుపొందింది. కాంగ్రెస్​కు 5 సీట్లు, బీజేపీకి ఒక సీటు వచ్చింది.

ఇక 2023 మిజోరం అసెంబ్లీ ఎన్నికల విషయానికొస్తే.. మంగళవారం ఉదయం 8 గంటల నుంచి సాయంత్రం 5 గంటల వరకు జరిగే అవకాశం ఉంది. కొన్ని ప్రాంతాల్లో టైమింగ్స్​ మారొచ్చు. కాగా.. ఈసారి.. 40 సీట్ల కోసం 174మంది అభ్యర్థులు పోటీపడుతున్నారు. రాష్ట్రంలో మొత్తం 8,53,088 మంది ఓటర్లు ఉన్నారు. వీరిలో 4,13,064మంది పురుషులు, 4,39,028 మంది మహిళలు ఉన్నారు. వీరందరిలో తొలిసారి ఓటు వేస్తున్న వారి (18-19ఏళ్లు) సంఖ్య 50,611గా ఉంది. 80ఏళ్లు పైబడిన వారు రాష్ట్రంలో 8490మంది ఉన్నారు.

Mizoram assembly elections 2023 : ఓటింగ్​ కోసం 1276 పోలింగ్​ కేంద్రాలను ఏర్పాటు చేసింది ఎన్నికల సంఘం. 24 థోరంగ్​ (ఎస్​టీ) నియోజకవర్గం పరిధిలో థెలెప్​ పోలింగ్​ స్టేషన్​లో అత్యల్పంగా 26 మంది ఓటర్లే ఉన్నారు. ఐజ్వాల్​ ఈష్ట్​ (జెనరల్​) నియోకవర్గంలోని 24 జెమంబ్వాంక్​ పోలింగ్​ స్టేషన్​ పరిధిలో అత్యధికంగా 1481 మంది ఓటర్లు ఉన్నారు. ఇక రాష్ట్రంలోని 30 పోలింగ్​ కేంద్రాలను సున్నితమైన ప్రాంతాలుగా ప్రకటించారు అధికరాలు.

ఎలాంటి అవాంఛనీయ సంఘటనలు జరగకుండా చూసుకునేందుకు 50కిపైగా సీఏపీఎఫ్​ బలగాలను మోహరించారు అధికారులు. వీరితో పాటు రాష్ట్ర పోలీసులు కూడా క్షేత్రస్థాయిలోకి వెళ్లి పరిస్థితులను ఎప్పటికప్పుడు పర్యవేక్షిస్తారు.

ఛత్తీస్​గఢ్​లో తొలి దశ ఎన్నికలు..

మావోయిస్టుల ప్రభావం అధికంగా ఉన్న ఛత్తీస్​గఢ్​లో మొత్తం 90 సీట్లు ఉన్నాయి. వీటికి 2 దశల్లో పోలింగ్​ జరగనుంది. మంగళవారం నాడు.. 20 సీట్లు పోలింగ్​కు వెళ్లనున్నాయి. మిగిలిన 70 సీట్లకు ఈ నెల 17 ఎన్నికలు జరగనున్నాయి.

కాగా.. ఈ 20 సీట్ల కోసం 223 మంది అభ్యర్థులు పోటీపడుతున్నారు. వీరిలో 198మంది పురుషులు, 25మంది మహిళలు ఉన్నారు.

Chhattisgarh assembly elections 2023 : తొలి దశలో భాగంగా పోలింగ్​కు వెళుతున్న నియోజకవర్గాల్లో మావోయిస్టుల ప్రభావం అధికంగా ఉంటుంది. అందుకే.. అధికారులు, ఈసీ కట్టుదిట్టమైన ఏర్పాట్లు చేశాయి. 20 నియోజకవర్గాల్లో 5,304 పోలింగ్​ బూత్​లను ఏర్పాటు చేసింది ఎన్నికల సంఘం. ఓటింగ్​ పూర్తయ్యేంత వరకు ఇవి భద్రతాధికారుల నిఘాలో ఉంటాయి. కొన్ని ప్రాంతాల్లో ఉదయం 7 గంటల నుంచి సాయంత్రం 5 గంటల వరకు పోలింగ్​ జరుగుతుండగా.. ఇంకొన్ని ప్రాంతాల్లో టైమింగ్స్​.. ఉదయం 7 నుంచి మధ్యాహ్నం 3 గంటలకుగా ఉన్నాయి.

ఇక ఛత్తీస్​గఢ్​లో మొత్తం మీద 5,61,36,229మంది ఓటర్లు ఉన్నారు. వీరిలో 2,63,829మంది తొలిసారి (18-19ఏళ్లు) తమ ఓటు హక్కును వినియోగించుకోనున్నారు.

2018 ఛత్తీస్​గఢ్​ అసెంబ్లీ ఎన్నికల్లో కాంగ్రెస్​ ఘన విజయం సాధించింది. 90 సీట్లల్లో 68 చోట్ల గెలిచి ప్రభుత్వాన్ని ఏర్పాటు చేసింది.

ఫలితాలు ఎప్పుడంటే..

5 states assembly elections 2023 : మిజోరం, ఛత్తీస్​గఢ్​తో పాటు ఈ నెలలో మరో 3 రాష్ట్రాల ఎన్నికలు జరగనున్నాయి. అవి.. తెలంగాణ (నవంబర్​ 30), మధ్యప్రదేశ్​ (నవంబర్​ 17), రాజస్థాన్​ (నవంబర్​ 25). ఓటింగ్​ ప్రక్రియ ముగిసిన అనంతరం.. 5 రాష్ట్రాల అసెంబ్లీ ఎన్నికల ఫలితాలు ఒకేసారి, అంటే.. డిసెంబర్​ 3న వెలువడనున్నాయి.