Assembly elections 2023 : మిజోరం, ఛత్తీస్​గఢ్​లో అసెంబ్లీ ఎన్నికల పోలింగ్​ షురూ..

Mizoram elections 2023 : 5 రాష్ట్రాల్లో అసెంబ్లీ ఎన్నికల సమరానికి తొలి ఘట్టం మొదలైంది! మిజోరంతో పాటు ఛత్తీస్​గఢ్​లోని (తొలి దశ) కొన్ని ప్రాంతాల్లో.. ఉదయం 7 గంటలకు పోలింగ్​ ప్రక్రియ ప్రారంభమైంది. ఎలాంటి అవాంఛనీయ ఘటనలు జరగకుండా ఉండేందుకు.. అధికారులు అన్ని ఏర్పాట్లు పూర్తి చేశారు.

మిజోరం అసెంబ్లీ ఎన్నికల పోలింగ్​ షురూ..

2023 మిజోరం అసెంబ్లీ ఎన్నికల్లో.. 40 సీట్ల కోసం 174మంది అభ్యర్థులు పోటీపడుతున్నారు. రాష్ట్రంలో మొత్తం 8,53,088 మంది ఓటర్లు ఉన్నారు. వీరిలో 4,13,064మంది పురుషులు, 4,39,028 మంది మహిళలు ఉన్నారు. వీరందరిలో తొలిసారి ఓటు వేస్తున్న వారి (18-19ఏళ్లు) సంఖ్య 50,611గా ఉంది. 80ఏళ్లు పైబడిన వారు రాష్ట్రంలో 8490మంది ఉన్నారు.

ఓటింగ్​ కోసం 1276 పోలింగ్​ కేంద్రాలను ఏర్పాటు చేసింది ఎన్నికల సంఘం. 24 థోరంగ్​ (ఎస్​టీ) నియోజకవర్గం పరిధిలో థెలెప్​ పోలింగ్​ స్టేషన్​లో అత్యల్పంగా 26 మంది ఓటర్లే ఉన్నారు. ఐజ్వాల్​ ఈష్ట్​ (జెనరల్​) నియోకవర్గంలోని 24 జెమంబ్వాంక్​ పోలింగ్​ స్టేషన్​ పరిధిలో అత్యధికంగా 1481 మంది ఓటర్లు ఉన్నారు. ఇక రాష్ట్రంలోని 30 పోలింగ్​ కేంద్రాలను సున్నితమైన ప్రాంతాలుగా ప్రకటించారు అధికరాలు.

Mizoram elections live updates : మిజోరంలో మొత్తం 40 అసెంబ్లీ సీట్లు ఉన్నాయి. మెజారిటీకి 21 సీట్లు అవసరం. 2018లో జరిగిన ఎన్నికల్లో మిజో నేషనల్​ ఫ్రెంట్​ విజయం సాధించి ప్రభుత్వాన్ని ఏర్పాటు చేసింది. మొత్తం 26 సీట్లల్లో గెలుపొందింది. కాంగ్రెస్​కు 5 సీట్లు, బీజేపీకి ఒక సీటు వచ్చింది.

ఛత్తీస్​గఢ్​లో తొలి దశ ఎన్నికల పోలింగ్​..

మావోయిస్టుల ప్రభావం అధికంగా ఉన్న ఛత్తీస్​గఢ్​లో మొత్తం 90 సీట్లు ఉన్నాయి. వీటికి 2 దశల్లో పోలింగ్​ జరగనుంది. మంగళవారం నాడు.. 20 సీట్లు పోలింగ్​కు వెళ్లనుండగా.. కోంటా నియోజకవర్గంలో ఉదయం 7 గంటలకే పోలింగ్​ ప్రక్రియ మొదలైంది. మిగిలిన నియోజకవర్గాలకు ఉదయం 8 గంటలకు పోలింగ్​ ప్రారంభంకానుంది.

మిగిలిన 70 సీట్లకు ఈ నెల 17 ఎన్నికలు జరగనున్నాయి.

Chhattisgarh elections 2023 : కాగా.. ఈ 20 సీట్ల కోసం 223 మంది అభ్యర్థులు పోటీపడుతున్నారు. వీరిలో 198మంది పురుషులు, 25మంది మహిళలు ఉన్నారు.

తొలి దశలో భాగంగా పోలింగ్​కు వెళుతున్న నియోజకవర్గాల్లో మావోయిస్టుల ప్రభావం అధికంగా ఉంటుంది. అందుకే.. అధికారులు, ఈసీ కట్టుదిట్టమైన ఏర్పాట్లు చేశాయి. 20 నియోజకవర్గాల్లో 5,304 పోలింగ్​ బూత్​లను ఏర్పాటు చేసింది ఎన్నికల సంఘం. ఓటింగ్​ పూర్తయ్యేంత వరకు ఇవి భద్రతాధికారుల నిఘాలో ఉంటాయి.

ఇక ఛత్తీస్​గఢ్​లో మొత్తం మీద 5,61,36,229మంది ఓటర్లు ఉన్నారు. వీరిలో 2,63,829మంది తొలిసారి (18-19ఏళ్లు) తమ ఓటు హక్కును వినియోగించుకోనున్నారు.

అయితే.. నక్సలైట్ల ప్రభావం అధికంగా ఉన్న సుక్మాలోని తొండమర్క ప్రాంతంలో ఎలక్షన్​ డ్యూటీ చేస్తున్న ఓ జవానుకు సమీపంలో ఓ ఐఈడీ బాంబు పేలినట్టు తెలుస్తోంది. ఈ ఘటనలో జవానుకు తీవ్ర గాయాలైనట్టు సమాచారం. 

Chhattisgarh elections 2023 live updates : 2018 ఛత్తీస్​గఢ్​ అసెంబ్లీ ఎన్నికల్లో కాంగ్రెస్​ ఘన విజయం సాధించింది. 90 సీట్లల్లో 68 చోట్ల గెలిచి ప్రభుత్వాన్ని ఏర్పాటు చేసింది.

ఫలితాలు వచ్చేది ఎప్పుడంటే..

మిజోరం, ఛత్తీస్​గఢ్​తో పాటు ఈ నెలలో మరో 3 రాష్ట్రాల ఎన్నికలు జరగనున్నాయి. అవి తెలంగాణ (నవంబర్​ 30), మధ్యప్రదేశ్​ (నవంబర్​ 17), రాజస్థాన్​ (నవంబర్​ 25). ఓటింగ్​ ప్రక్రియ ముగిసిన అనంతరం.. 5 రాష్ట్రాల అసెంబ్లీ ఎన్నికల ఫలితాలు ఒకేసారి, అంటే.. డిసెంబర్​ 3న వెలువడనున్నాయి.