Bihar caste survey : బిహార్​ కుల గణన డేటా విడుదల.. జనాభాలో 63శాతం మంది వారే!

Bihar caste survey : దేశవ్యాప్తంగా చర్చనీయాంశంగా మారిన బిహార్​ కుల గణనకు సంబంధించి.. మరో కీలక వార్త! కుల గణన డేటాను తాజాగా ప్రకటించింది నితీశ్​ కుమార్​ ప్రభుత్వం. రాష్ట్ర జనాభాలో 63శాతం మంది ఓబీసీలు- ఈబీసీలే ఉన్నారని సర్వేలో తేలింది.

బిహార్​ జనాభా సుమారు 13.07 కోట్లు! ఈ జనాభాలో ఈబీసీ (అత్యంత వెనకబడిన వర్గాలు) వాటా 36శాతం. ఓబీసీల వాటా 27.13శాతం. 19.7శాతం మంది ఎస్​సీలు 1.7శాతం మంది ఎస్​టీలు ఉన్నారు.

ఇక బిహార్​ జనాభాలో యాదవులు అత్యధికం! బిహార్​ డిప్యూటీ సీఎం తేజస్వీ యాదవ్​ కూడా ఈ ఓబీసీ వర్గానికి చెందిన వారే. రాష్ట్రంలో యాదవుల వాటా 14.27శాతంగా ఉంది.

Bihar caste survey latest news : కుల గణన డేటా విడుదలకు ముందు పలు కీలక వ్యాఖ్యలు చేశారు బిహార్​ సీఎం నితీశ్​ కుమార్​. రాష్ట్రంలోని సంకీర్ణ ప్రభుత్వంలో ఉన్న 9 పార్టీలతో చర్చలు ప్రారంభిస్తామని, సర్వే తర్వాత ఏం చేయాలి? అన్న విషయంపై సమాలోచన చేస్తామని అన్నారు.

రాష్ట్రంలో ఓబీసీ కోటా ప్రస్తుతం 27శాతంగా ఉంది. దీనిని మరింత పెంచాలని డిమాండ్​లు వినిపిస్తున్నాయి. త్వరలో జరగనున్న సమావేశంలో దీనిపై చర్చ జరిగే అవకాశం ఉంది.

సర్వే ఇలా జరిగింది..

2024 ఎన్నికలు సమీపిస్తున్న సమయంలో.. బిహార్​ కుల గణన డేటా విడుదలవ్వడం ప్రాముఖ్యత సంతరించుకుంది. తొలి దశ సర్వేలో భాగంగా.. ఇళ్లను మార్క్​ చేయడం, ఇంట్లోని కుటుంబసభ్యుల పేర్లను, ఇంటి పెద్ద వివరాలను నమోదు చేయడం జరిగింది. రెండో దశలో భాగంగా.. రాష్ట్రవ్యాప్తంగా ప్రజలకు చెందిన సామాజిక, ఆర్థిక విషయాలను నమోదు చేశారు.

Bihar caste survey data : మొత్తం మీద 2.64లక్షల మంది సిబ్బంది.. బిహార్​లో ఇంటింటికీ వెళ్లి కుల గణనను నిర్వహించారు. ఉద్యోగం, విద్య, మారిటల్​ స్టేటస్​, భూమి ఉందా? లేదా? ఆస్థులు, కులం వంటి వివరాలను సేకరించారు.

తాము చెపట్టే కుల గణనలో ఎస్​సీ, ఎస్​టీలను మాత్రమే లెక్కిస్తామని కేంద్రం చెప్పడంతో.. సొంతంగా జనాభా లెక్కలు చేపట్టాలని నితీశ్​ కుమార్​ ప్రభుత్వం నిర్ణయించుకున్న విషయం తెలిసిందే. ఈ సర్వే ఆగస్ట్​లో ముగిసింది. ఈ కుల గణనతో అందరికి ప్రయోజనం ఉంటుందని ఓ సందర్భంగా వ్యాఖ్యానించారు నితీశ్​ కుమార్​. బలహీన వర్గాలను కలుపుకుని, ప్రగతివైపు నడవొచ్చని అభిప్రాయపడ్డారు.

Bihar caste survey news : అయితే కులాల ఆధారంగా జనాభాను లెక్కించడం అనే విషయంపై మిశ్రమ స్పందన లభిస్తోంది. ఇందుకు కొందరు మద్దతిస్తుంటే.. ఇంకొందరు వ్యతిరేకిస్తున్నారు. నితీశ్​ కుమార్​ మాత్రం.. ఈ తరహా జన గణన చేపట్టాలని అన్ని రాష్ట్రాలకు పిలుపునిస్తారు.