Ajit Pawar latest news : మహారాష్ట్ర ప్రభుత్వానికి అజిత్​ పవార్ మద్దతు.. డిప్యూటీ సీఎంగా ప్రమాణం

Ajit Pawar latest news : మహారాష్ట్ర రాజకీయాల్లో కీలక మలుపు! ఎన్​సీపీ అధ్యక్షుడు, రాజకీయ దిగ్గజం శరద్​ పవార్​కు గట్టి షాక్​. శరద్​ పవార్​పై గత కొంతకాలంగా తీవ్ర అసంతృప్తితో ఉన్న ఆయన బంధువు, ఎన్​సీపీ సీనియర్​ నేత అజిత్​ పవార్​.. ఆదివారం మహారాష్ట్ర ప్రభుత్వంలో చేరిపోయారు. పలువురు ఎన్​సీపీ ఎమ్మెల్యేలతో కలిసి ప్రభుత్వానికి మద్దతు పలికారు. ఇంతకాలంగా మహారాష్ట్ర అసెంబ్లీలో లీడర్​ ఆఫ్​ అపోజీషన్​గా ఉన్న అజిత్​ పవార్​.. రాజ్​ భవన్​లో జరిగిన కార్యక్రమంలో మహారాష్ట్ర సీఎం ఏక్​నాథ్​ శిందే, డిప్యూటీ సీఎం దేవేంద్ర ఫడణవీస్​ సమక్షంలో​ ప్రమాణ స్వీకారం చేశారు. ఫడణవీస్​తో పాటు ఆయన డిప్యూటీ సీఎం పదవిని పంచుకోనున్నట్టు సమాచారం.

చకచకా జరిగిపోయాయి..

ఎన్​సీపీపై అజిత్​ పవార్​ అసంతృప్తితో ఉన్నట్టు, ఆయన బీజేపీలో చేరనున్నట్టు 2,3 నెలలుగా ఊహాగానాలు జోరుగా సాగుతూనే ఉన్నాయి. బీజేపీలో చేరడంపై అజిత్​ పవార్​ ఎప్పుడు మాట్లాడలేదు కానీ.. ఎన్​సీపీపై అసంతృప్తిని బయటపెడుతూనే ఉన్నారు.

Maharashtra politics latest news : ఈ నేపథ్యంలో మహారాష్ట్ర రాజకీయాల్లో ఆదివారం కీలక పరిణామాలు చోటుచేసుకున్నాయి. ముంబైలోని తన నివాసంలో ఆదివారం ఉదయం ఎన్​సీపీ ఎమ్మెల్యేల సమావేశాన్ని నిర్వహించారు అజిత్​ పవార్​. ఎన్​సీపీ వర్కింగ్​ ప్రెసిడెంట్​, శరద్​ పవార్​ కుమార్తె సుప్రియా సూలే, సీనియర్​ నేత ఛగన్​ భుజ్​బాల్​లు ఈ సమావేశంలో పాల్గొన్నారు.

ఈ సమావేశం జరిగిన కొంత సేపటికే రాజ్​ భవన్​లో ఏర్పాట్లు మొదలయ్యాయి. అజిత్​ పవార్ నివాసం​ నుంచి ఎమ్మెల్యేలు ఒక్కొక్కరుగా బయటకు రావడం, రాజ్​ భవన్​కు చేరుకోవడం మొదలుపెట్టారు. ఈ క్రమంలో అజిత్​ పవార్​ ఆదివారం ప్రభుత్వానికి మద్దతునిస్తున్నట్టు వార్తలు మొదలయ్యాయి. మరోవైపు రాజ్​ భవన్​కు అధికర పక్షంలోని నేతలు సైతం క్యూ కట్టారు.

ఇదీ చూడండి:- Ajit Pawar BJP : 30మంది ఎమ్మెల్యేలతో బీజేపీలోకి అజిత్​ పవార్​? శరద్​ పవార్​ పార్టీలో చీలిక తప్పదా?

మధ్యాహ్నం నాటికి.. అజిత్​ పవార్​, సీఎం ఏక్​నాథ్​ శిందే, డిప్యూటీ సీఎం దేవేంద్ర ఫడణవీస్​లు రాజ్​ భవన్​కు చేరుకున్నారు. అనేక మంది ఎమ్మెల్యేలు, ఎంపీలు, బీజేపీ పార్టీ పెద్దల సమక్షంలో అజిత్​ పవార్​ ప్రమాణ స్వీకారం చేశారు. ఆయనతో పాటు 9మంది ఎమ్మెల్యేలు సైతం ప్రభుత్వానికి మద్దతు పలికారు.

కాగా.. 53మంది ఎన్​సీపీ ఎమ్మెల్యేల్లో అజిత్​ పవార్​కు 43మంది మద్దతు ఉన్నట్టు తెలుస్తోంది.

ఎన్​సీపీ సమావేశం..

అజిత్​ పవర్​ చర్యల నేపథ్యంలో ఎన్​సీపీ వర్కింగ్​ ప్రెసిడెంట్​ సుప్రియా సూలే ఆధ్వర్యంలో ఆదివారం మధ్యాహ్నం ఓ సమావేశం జరిగింది. తాజా పరిణామాలపై నేతలు చర్చించినట్టు సమచారం.

శరద్​ పవార్​ స్పందన..

NCP Sharad Pawar : ఆదివారం ఉదయం అజిత్​ పవార్​ నివాసంలో జరిగిన సమావేశంపై శరద్​ పవార్​ స్పందించారు.

"సమావేశం ఎందుకు జరిగిందో నాకు తెలియదు. అజిత్​ పవార్​ ఒక లీడర్​ ఆఫ్​ అపోజీషన్​. సమావేశం ఏర్పాటు చేసే అధికారం ఆయనకు ఉంది," అని శరద్​ పవార్​ అన్నారు.

కాగా.. అజిత్​ పవార్​ మహారాష్ట్ర ప్రభుత్వంలో చేరడంపై శరద్​ పవార్​ స్పందించాల్సి ఉంది.

అప్పుడు ఫెయిల్​.. ఇప్పుడు సక్సెస్​..!

2019 అసెంబ్లీ ఎన్నికల సమయం నుంచి మహారాష్ట్ర రాజకీయాలు మలుపులు తిరుగుతూనే ఉన్నాయి. ఆ ఎన్నికల్లో అధికార బీజేపీకి మెజారిటీ రాలేదు. విభేదాలతో బంధాన్ని తెంచుకుంది శివసేన. చాలా రోజులు గడిచినా ప్రభుత్వం ఏర్పడలేదు. ఈ తరుణంలో యావత్​ దేశానికి షాక్​ ఇచ్చారు అజిత్​ పవార్​! దేవేంద్ర ఫడణవీస్​తో కలిసి ప్రభుత్వాన్ని ఏర్పాటు చేశారు. డిప్యూటీ సీఎంగా ప్రమాణం చేశారు. కానీ ఆయన చర్యలు ఎక్కువ రోజులు ఫలితాల్నివ్వలేదు. మెజారిటీ లేకపోవడంతో బీజేపీ ప్రభుత్వం కూలింది. ఎన్​సీపీ, కాంగ్రెస్​తో కలిసి శివసేన ప్రభుత్వాన్ని ఏర్పాటు చేసింది.