MBBS Seats : నీట్ యూజీకి సిద్ధమయ్యే వారికి శుభవార్త.. పెరగనున్న మరో 75 వేల ఎంబీబీఎస్ సీట్లు!

వచ్చే ఐదేళ్లలో కొత్తగా 75 వేల మెడికల్ సీట్లను పెంచేందుకు కేంద్ర ప్రభుత్వం సన్నాహాలు చేస్తోంది. ఇందుకోసం ప్రణాళికను సిద్ధం చేస్తున్నారు. ప్రస్తుతం దేశంలో 1,12,117 ఎంబీబీఎస్ సీట్లు ఉన్నాయి. అయినప్పటికీ రష్యా, చైనా, బంగ్లాదేశ్‌లాంటి మొదలైన దేశాలలో పెద్ద సంఖ్యలో విద్యార్థులు మెడిసిన్ చదవడానికి వెళ్తున్నారు. ప్రస్తుతం ఈ దేశాల్లో 30 వేల నుంచి 35 వేల మంది విద్యార్థులు మెడిసిన్ చదువుతున్నారని అంచనా.

వచ్చే ఐదేళ్లలో 75 వేల కొత్త సీట్లను సృష్టించాలని ప్రభుత్వం లక్ష్యంగా పెట్టుకుంది. సీట్ల సంఖ్యను పెంచేందుకు ప్రయత్నాలు చేస్తున్నారు. మంచి మౌలిక సదుపాయాలు ఉన్న మెడికల్ కాలేజీలకు ఎక్కువ సీట్లు పెంచుకునే అవకాశం కల్పిస్తారు. ఇందులో కొత్త మెడికల్ కాలేజీల ఏర్పాటు, జిల్లా ఆస్పత్రులను అప్ గ్రేడ్ చేసి మెడికల్ కాలేజీలు ఏర్పాటు చేయడం, పెద్ద పెద్ద ప్రైవేటు ఆస్పత్రులను మెడికల్ కాలేజీలు తెరిచేలా ప్రోత్సహించడం వంటివి ఉన్నాయి.

దేశంలో 731 మెడికల్ కాలేజీలు ఉన్నాయి. 2014లో ఆ సంఖ్య 387గా ఉంది. భారతదేశంలో ప్రతి సంవత్సరం సుమారు 25 లక్షల మంది విద్యార్థులు వైద్య ప్రవేశ పరీక్ష నీట్ యూజీని రాస్తున్నారు. వీరిలో 13 లక్షల మంది ఉత్తీర్ణులవుతారు. కానీ నీట్ లో అర్హత సాధించిన ఈ 13 లక్షల మంది విద్యార్థులకు దేశంలో కేవలం 1.12 లక్షల ఎంబీబీఎస్ సీట్లు మాత్రమే ఉన్నాయి.

నీట్ ఉత్తీర్ణులైన విద్యార్థుల్లో మంచి ర్యాంకులు సాధించిన వారికే ప్రభుత్వ వైద్య కళాశాలల్లో చౌకగా ఎంబీబీఎస్ సీట్లు లభిస్తాయి. దేశంలో ఎంబీబీఎస్ సీట్లు చాలా తక్కువగా ఉండటం, ప్రైవేటు మెడికల్ కాలేజీల అధిక ఫీజుల కారణంగా డాక్టర్ కావాలని కలలు కనే వేలాది మంది విద్యార్థులు రష్యా, ఉక్రెయిన్, చైనా, బంగ్లాదేశ్, నేపాల్, కిర్గిజిస్తాన్, ఫిలిప్పీన్స్ మొదలైన దేశాల్లో ఎంబీబీఎస్ చదివేందుకు వెళ్తున్నారు.

దేశంలోనే ప్రైవేటు మెడికల్ కాలేజీల్లో ఎంబీబీఎస్ సీట్లు పొందుతున్న వారు చాలా మంది ఉన్నా వాటి భారీ ఫీజుల కారణంగా ఇతర దేశాలకు వెళ్లాల్సి వస్తోంది. భారతదేశంలోని ప్రైవేట్ మెడికల్ కాలేజీల కంటే ఎంబీబీఎస్ ఖర్చు చాలా చౌకగా ఉన్న దేశాలు ఇవి. అయితే విదేశాల నుంచి ఎంబీబీఎస్ చేయాలంటే నీట్‌లో ఉత్తీర్ణత తప్పనిసరి. నేషనల్ మెడికల్ కమిషన్ (ఎన్ఎంసీ ) నుంచి కూడా అర్హత ధ్రువీకరణ పత్రం అవసరం. ఇలా చేయకపోతే విద్యార్థి ఎఫ్ఎంజీఈ పరీక్ష రాయలేడు. విదేశాల్లో ఎంబీబీఎస్ చేసిన విద్యార్థులు భారత్‌లో మెడికల్ లైసెన్స్ పొందాలంటే ఎఫ్‌ఎంజీఈ పరీక్ష రాయాల్సి ఉంటుంది. ఇక ప్రభుత్వం 75 వేల సీట్లను పెంచాలని చూస్తుండటంతో చాలా మందికి లబ్ధి చేకూరనుంది.