Elon musk | ట్విట్టర్​కు ధీటుగా.. కొత్త సోషల్​ మీడియా?

Elon Musk social media platform | టెస్లా సీఈఓ, ప్రపంచ అపర కుబేరుడు ఎలాన్​ మస్క్​.. కొత్త సోషల్​ మీడియా యాప్​ను రూపొందించే విషయంపై తీవ్రంగా ఆలోచిస్తున్నట్టు వెల్లడించారు. ఈ మేరకు ట్విట్టర్​లో ఓ ట్వీట్​ చేశారు.

భావప్రకటనా స్వేచ్ఛకు ప్రాధాన్యతనిచ్చి, వ్యక్తిగత ప్రయోజనాలు లేని, ఓపెన్​ సోర్స్​ ఆల్గొరిథంతో కూడిన సామాజిక మాధ్యమ వేదికను తీసుకొస్తారా? అని ఓ ట్విట్టర్​ వినియోగదారుడు అడిగిన ప్రశ్నకు.. సమాధనంగా.. మస్క్​ ఆ ట్వీట్​ చేశారు.

ట్విట్టర్​లో మస్క్​ చాలా యాక్టివ్​గా ఉంటారు. కాగా గత కొంతకాలంగా.. ట్విట్టర్, సంస్థ​ విధానాలపై ఆయన విమర్శలు చేస్తున్నారు. భావప్రకటనా స్వేచ్ఛ విలువలను పాటించకుండా ప్రజాస్వామ్యాన్ని అణచివేస్తోందని ట్విట్టర్​పై అనేకమార్లు మండిపడ్డారు.

Elon Musk twitter | ఇదే విషయంపై ఆయన ట్విట్టర్​లో ఓ పోల్​ కూడా నిర్వహించారు. 'ట్విట్టర్​.. ఫ్రీ స్పీచ్​కు విలువ ఇస్తుందా?' అని ఆయన ప్రశ్నించారు. 'ఈ పోల్​ అనంతర పరిణామాలు చాలా కీలకంగా ఉంటాయి, జాగ్రత్తగా ఓట్లు వేయండి,' అని పేర్కొన్నారు. మస్క్​ అడిగి ప్రశ్నకు 70శాతం మంది యూజర్లు 'నో' అనే జవాబిచ్చారు. ఇది జరిగిన ఒక రోజు వ్యవధిలోనే.. కొత్త సోషల్​ మీడియా వేదిక గురించి తీవ్రంగా ఆలోచిస్తున్నట్టు మస్క్​ చెప్పడం గమనార్హం.

అనేకమంది ప్రముఖులు సొంతంగా తమ సోషల్​ మీడియా యాప్​లను తీసుకొస్తున్నారు. ఇటీవలే.. అమెరికా మాజీ అధ్యక్షుడు డొనాల్డ్​ ట్రంప్​.. 'ట్రూత్​' పేరుతో ఓ యాప్​ను విడుదల చేశారు. కాగా మస్క్​ నిజంగానే యాప్​ను తీసుకొస్తే.. ట్విట్టర్​, ఫేస్​బుక్​ వంటి దిగ్గజ సామాజిక మాధ్యమాలకు పోటీ తప్పదు అనే అభిప్రాయాలు వెలువడుతున్నాయి.