భారతీయుడితో మస్క్​ 'ట్విట్టర్​ దోస్తీ'.. రోజూ చాట్​ చేసుకుంటారు!

Pranay Pathole Elon Musk | ప్రపంచ కుబేరుడు, టెస్లా సీఈఓ ఎలాన్​ మస్క్​.. ఎంతో బిజీ మనిషి అని అందరికి తెలిసిందే. మస్క్​కు అభిమానులు, ఫాలోవర్ల సంఖ్య చాలా ఎక్కువే. ఆయనతో ఒక్కసారి మాట్లాడితే చాలు.. అనుకునే వారు చాలా మంది ఉంటారు. చాలా మంది కలలు కూడా కంటారు. అలాంటిది.. ఓ భారతీయుడితో మస్క్​ తరచూ చాట్​ చేస్తారని మీకు తెలుసా? అసలు మస్క్​తో చాటింగ్​ అనేది చాలా సింపుల్​ విషయం అని ఆ వ్యక్తి అంటుంటే మీరు ఆశ్చర్యపోక తప్పదు. ఇంతకీ ఆ భారతీయుడి కథేంటంటే..

2018 నుంచి చాటింగ్​..

Elon musk twitter | ప్రనయ్​ పథోలే అనే పుణెవాసి ప్రస్తుతం టీసీఎస్​లో పనిచేస్తున్నాడు. అయితే 2018లోనే మస్క్​కు ట్విట్టర్​ దోస్త్​గా మారిపోయాడు ప్రనయ్​. ఇంజినీరింగ్​ రెండో సంవత్సరం విద్యార్థిగా ఉన్నప్పుడు.. కార్లలో ఆటోమెటిక్​ వైపర్​లను టెస్లాలో వాడితే బాగుటుందని ప్రనయ్​ భావించాడు. వెంటనే మస్క్​ను ట్యాగ్​ చేసి ట్వీట్​ చేశాడు. మస్క్​ చూస్తే చాలు అనుకున్న ప్రనయ్​కు షాక్​ తగిలింది. ఆ ట్వీట్​ను చూడటమే కాకుండా.. స్వయంగా మస్క్​ ప్రనయ్​కు రిప్లై ఇచ్చారు.

"ఆటోమెటిక్​ వైపర్ల గురించి ఓ రెడ్డిట్​ యూజర్​ ఓ ప్రశ్న అడిగాడు. అది నాకు ఎంతో నచ్చింది. మస్క్​కు ట్వీట్​ చేద్దామా? అనిపించింది. రిప్లై ఇస్తే, టెస్లా కార్లలో వినియోగించుకోవచ్చేమో అనుకున్నా. కొన్ని నిమిషాలకే మస్క్​ నుంచి ట్వీట్​ వచ్చింది. ఆయన స్పందించారు. నేను అస్సలు నమ్మలేకపోయాను," అని ప్రనయ్​ చెప్పుకొచ్చాడు.

@PPathole ట్విట్టర్​ ఖాతాలో అన్నీ మస్క్​ గురించే ఉంటాయి.

'మస్క్​తో చాటింగ్​.. చాలా సింపుల్​ విషయం'

Pranay Pathole twitter | 'మస్క్​ రిప్లై ఇచ్చినప్పుడు.. చాలా సంతోషంగా అనిపించింది. నా జీవితంలో అదే హైలైట్​ అనుకున్నా. కానీ ఇప్పుడు మేము తరచూ మాట్లాడుకుంటాము. మస్క్​తో చాటింగ్​ చాలా సింపుల్​ విషయంగా మారిపోయింది. ట్విట్టర్​ డీఎం(డైరక్ట్​ మెసేజ్​)లలో మేము తరచూ చాట్​ చేసుకుంటాము,' అని ప్రనయ్​ అన్నాడు.

మరి అపర కుబేరుడితో చాటింగ్​ ఎలా ఉంటుంది అని కొందరు అడిగిన ప్రశ్నకు సైతం ప్రనయ్​ సమాధానం ఇచ్చాడు.

"మస్క్​.. సూపర్​ ఫ్రెండ్లీ. ప్రపంచ కుబేరుడితో మాట్లాడుతున్నట్టు అస్సలు అనిపించదు. నా వరకు అయితే.. మస్క్​తో మాటలు.. ఓ స్నేహితుడితో సింపుల్​గా చాట్​ చేస్తున్నట్టు అనిపిస్తాయి. మస్క్​ చాలా ఫ్రాంక్​. ముక్కుసూటి మనిషి. ట్విట్టర్​లో యాక్టివ్​గా ఉంటారు. నేను డీఎం చేసినప్పుడు కొన్ని నిమిషాల్లోనే రిప్లై ఇస్తారు," అని ప్రనయ్​ స్పష్టం చేశాడు. సౌర కుటుంబం, మానవాళి మనుగడపై ప్రనయ్​- మస్క్​ మాట్లాడుకుంటారు.

ఇక మస్క్​తో ప్రనయ్​ చాట్​ చేస్తాడని తెలిసి అతనికి ఫాలోయింగ్​ విపరీతంగా పెరిగిపోయింది. ఫాలోవర్లు వచ్చిపడ్డారు. మస్క్​ గురించి చాలా మంది ప్రనయ్​ను అడుగుతున్నారు.

2015లో స్పేస్​ఎక్స్​కు చెందిన ఫాల్కన్​ 9 గురించి తొలిసారిగా తనకు తెలిసిందని, ఆ క్షణమే మస్క్​కు ఫ్యాన్​ అయిపోయానని ప్రనయ్​ అన్నాడు. మస్క్​ మీద చాలా పుస్తకాలు సైతం చదివానని వివరించాడు. ఏదో ఒకరోజు మస్క్​తో కలిసి పనిచేయాలన్నదే తన లక్ష్యం అని ప్రనయ్​ చెప్పుకొచ్చాడు.

"నేను యూఎస్​లో మాస్టర్స్​ కోసం ప్రయత్నిస్తున్నాను. మస్క్​తో ఏదో ఒక రోజు కలిసి పనిచేయాలని నాకు ఉంది. మస్క్​ సూపర్​ ఇంటలిజెంట్​. నాకు ఆయన మీద చాలా నమ్మకం ఉంది. మస్క్​ ఏం చేసినా, కరెక్టే అని చాలా మంది భావిస్తారు. మస్క్​తో కలిసి పనిచేయడం.. నా లాంటి యువకుడికి ఎంతో ఉపయోగపడుతుంది," అని ప్రనయ్​ చెప్పుకొచ్చాడు.