పుతిన్​తో 'ఫైట్'​కు మస్క్​ సై.. సవాలు అదుర్స్​!

Musk Putin tweet | టెస్లా, స్పేస్​ ఎక్స్​ సీఈఓ ఎలాన్​ మస్క్​.. ఎంతటి ధైర్యవంతుడనే విషయం కొత్తగా చెప్పుకోవాల్సిన అవసరం లేదు. ఎన్నో డేరింగ్​ అండ్​ డాషింగ్​ నిర్ణయాలు తీసుకుని అపర కుబేరుల్లో ఒకరిగా నిలిచారు. తాజాగా మరోమారు తన ధైర్యసాహసాలను ప్రపంచానికి చూపించారు మస్క్​. తనతో ప్రత్యక్ష పోరుకు రావాలని పుతిన్​కు సవాలు విసిరారు. ఆ కాంబాట్​లో ఓడిపోతే.. ఉక్రెయిన్​ను విడిచిపెట్టాలని తేల్చిచెప్పారు.

ఉక్రెయిన్​పై రష్యా గత కొన్ని రోజులుగా దండయాత్ర చేస్తోంది. పుతిన్​ ఆదేశాలతో రష్యా సైనికులు ఉక్రెయిన్​లోకి చొచ్చుకెళుతున్నారు. ఫలితంగా ఉక్రెయిన్​లో మానవతా సంక్షోభం ఏర్పడింది. లక్షలాది మంది దేశాన్ని విడిచిపెట్టి వెళ్లిపోయారు. చాలా మంది రష్యా దాడుల్లో ప్రాణాలు కోల్పోయారు. ఈ క్రమంలో పుతిన్​పై సర్వత్రా విమర్శలు వెల్లువెత్తుతున్నాయి. చాలా మంది పుతిన్​ను ఓ విలన్​లాగా చూస్తున్నారు.

రష్యా దాడులతో ఉక్రెయిన్​లో అంతర్జాల సేవలు సైతం నిలిచిపోయాయి. అయితే అధ్యక్షుడు జెలెన్​స్కీ పిలుపుతో.. స్పందించిన ఎలాన్​ మస్క్​.. తన స్టార్​లింక్​ ఉపగ్రహాల ద్వారా యుద్ధవిచ్ఛిన్న దేశానికి ఇంటర్​నెట్​ సేవలు అందించారు. ఉక్రెయిన్​కు సానుభూతి వ్యక్తం చేశారు.

ఈ క్రమంలోనే ఊహించని రీతిలో పుతిన్​కు సవాలు విసిరారు మస్క్​. 'నాతో ప్రత్యక్ష పోరాటానికి పుతిన్​కు సవాలు విసురుతున్నా. గెలిచిన వారు ఉక్రెయిన్​ భవితవ్యాన్ని నిర్దేశించగలరు,' అని ట్వీట్​ చేశారు మస్క్​.

వాస్తవానికి పుతిన్​కు అధికార ట్విట్టర్​ ఖాతా లేదు. అందువల్ల రష్యా ప్రభుత్వం అధికార ట్విట్టర్​ ఖాతా @KremlinRusia_E ని మస్క్​ ట్యాగ్​ చేశారు. పుతిన్​, ఉక్రెయిన్​ పేర్లను రష్యన్​ భాషలో ట్వీట్​ చేశారు. 'నా సవాలను స్వీకరిస్తారా?' అని ధైర్యంగా ప్రశ్నించారు.

మస్క్​ సవాలుపై రష్యా అధికారులు ఇంకా స్పందించలేదు. పుతిన్​ అంగీకరించడం అసాధ్యమే అయినా.. మస్క్​ ధైర్యంగా ముందుకొచ్చి సవాలు విసరడంపై నెటిజన్లు ప్రశంసల వర్షం కురిపిస్తున్నారు.