Cyclone Sitrang : దీపావళి నాడు ఈ రాష్ట్రాల్లో అతి భారీ వర్షాలు!

Cyclone Sitrang live updates : సిత్రంగ్​ తుపాను నేపథ్యంలో పశ్చిమ్​ బెంగాల్​ తీర ప్రాంతాలకు భారీ వర్ష సూచనను ఇచ్చింది భారత వాతావరణ శాఖ(ఐఎండీ). ఈ నెల 24,25న అతి భారీ వర్షాలు కురుస్తాయని పేర్కొంది. ఈ మేరకు పశ్చిమ్​ బెంగాల్​ గ్యాంగ్​టిక్​ ప్రాంతాలతో పాటు ఈశాన్య రాష్ట్రాలకు రెడ్​ అలర్ట్​ను జారీ చేసింది.

బంగాళాఖాతంలో ఏర్పడిన అల్పపీడనం.. వాయువ్యంవైపు ప్రయాణించి.. మరో 12 గంటల్లో మధ్య బంగాళాఖాతంలో తుపానుగా మారే అవకాశం ఉందని ఐఎండీ స్పష్టం చేసింది. ఈ నెల 25 తెల్లవారుజామున.. సిత్రంగ్​ తుపాను బంగ్లాదేశ్​ తీర ప్రాంతం టిన్​కోనా ద్వీపం, సంద్వీప్​ మధ్యలో తీరం దాటుతుందని పేర్కొంది. తీరం దాటే సమయంలో గంటకు 110కి.మీల వేగంతో గాలులు వీచే అవకాశం ఉందని వెల్లడించింది.

ఈ రాష్ట్రాల్లో వర్షాలు..

• సిత్రంగ్​ తుపాను కారణంగా అరుణాచల్​ప్రదేశ్​, అసోం, మేఘాలయ, నాగాలాండ్​, మణిపూర్​, మిజోరం, త్రిపురలో సోమ, మంగళవారాల్లో అతి భారీ వర్షాలు కురుస్తాయి.
• దివాళీ నాడు అరుణాచల్​ప్రదేశ్​, ఉత్తర అసోంలో మోస్తారు వర్షాలు కురుస్తాయి. దక్షిణ అసోం, తూర్పు మేఘాలయ, నాగాలండ్​, మిజోరం, మణిపూర్​, త్రిపురలో భారీ వర్షాలు పడతాయి. ఈ ప్రాంతాల్లో 25న మోస్తారు నుంచి అతి భారీ వర్షాలు కురుస్తాయి.
• Cyclone Sitrang ఈ నెల 26న.. అరుణాచల్​ప్రదేశ్​, ఈశాన్య అసోం, నాగాలాండ్​లో మోస్తారు నుంచి అతి భారీ వర్షాలు పడతాయి.
• ఆదివారం, సోమవారం.. అండమాన్​ అండ్​ నికోబార్​, ఒడిశాలో మోస్తారు వర్షాలు కురిసే అవకాశం ఉంది. 25న.. ఒడిశా తీర ప్రాంతంలో అతి భారీ వర్షాలు తప్పవు!
• పశ్చిమ్​ బంగాల్​లోని దక్షిణ- ఉత్తర పరగణాస్​, తూర్పు- పశ్చిమ మేదినీపూర్​ జిల్లాల్లో దివాళీ రోజున మోస్తారు నుంచి అతి భారీ వర్షాలు పడతాయి.
• 25న.. దక్షిణ- ఉత్తర పరగణాస్​, నడియాలో వర్షాలు కురుస్తాయి.

ప్రభుత్వాలు సన్నద్ధం..

Cyclone Sitrang సిత్రంగ్​ తుపాను నేపథ్యంలో పశ్చిమ్​ బెంగాల్​, ఒడిశా రాష్ట్రాలు సన్నద్ధమయ్యాయి. తగిన జాగ్రత్తలు చేపట్టాయి. ఎన్​డీఆర్​ఎఫ్​ బృందాలను సిద్ధం చేశాయి. అదే సమయంలో.. మత్స్యకారులు వేటకు వెళ్ల వద్దని స్పష్టం చేశాయి.