ట్విట్టర్​ తర్వాత.. ఎలాన్​ మస్క్​ నెక్స్ట్​ టార్గెట్​ 'కోకా కోలా'?

Elon Musk Coca Cola | ట్విట్టర్​ను దక్కించుకున్న 48 గంటల అనంతరం.. అపర కుబేరుడు ఎలాన్​ మస్క్​ మరో ఆసక్తికర ట్వీట్​ చేశారు. తన నెక్స్ట్​ టార్గెట్​ 'కోకా కోలా' అని వెల్లడించారు. అందుకు కారణాన్ని కూడా వెల్లడించారు.

"తర్వాత కోకా కోలాను కొనుగోలు చేస్తాను. అందులో తిరిగి కొకైన్​ను వేస్తాను," అని మస్క్​ ట్వీట్​ చేశారు.

మరి ఇది ఫన్​ కోసం ట్వీట్​ చేశారో, లేక నిజంగానే కోకా కోలాను కొనుగోలు చేసే ఉద్దేశం ఉందా? అనేది ఎలాన్​ మస్క్​ ఒక్కరికే తెలుస్తుంది. కాగా.. 'మెక్​డీని కూడా కొనుక్కుని, అందులోని ఐస్​క్రీమ్​ మెషిన్​ను బాగుచేస్తాను,' అని కూడా మస్క్​ పేర్కొన్నారు.

ట్విట్టర్​లో ఎలాన్​ మస్క్​ చురుకుగా ఉంటారు. ఆయనకు వచ్చిన ఆలోచనలను అందులో పంచుకుంటారు. కొన్నికొన్ని సార్లు ఆయన ట్వీట్లపై తీవ్రస్థాయిలో చర్చలు జరుగుతూ ఉంటాయి.

ట్విట్టర్​ మస్క్​ సొంతం..

Elon musk twitter | గత కొంతకాలంగా.. ట్విట్టర్​పై విమర్శలు చేస్తూనే ఉన్నారు మస్క్​. ట్విట్టర్​లో భావప్రకటనా స్వేచ్ఛకు భంగం కలుగుతోందని అభిప్రాపడ్డారు. ఈ క్రమంలోనే ట్విట్టర్​లో 9శాతం వాటా కొనుగోలు చేశారు. ఆ తర్వాత మస్క్​తో ట్విట్టర్​ చర్చలు జరిపింది. కంపెనీ బోర్డులోకి మస్క్​ను చేర్చుకునేందుకు సిద్ధపడింది. తొలుత.. మస్క్​ సైతం ఇందుకు అంగీకరించారు. బోర్డులో చేరడం సంతోషకరం అని అన్నారు. కానీ అనూహ్యంగా తన నిర్ణయాన్ని వెనక్కి తీసుకున్నారు. ట్విట్టర్​కు షాక్​ ఇస్తూ.. మొత్తం సంస్థనే కొనుగోలు చేసేందుకు భారీ డీల్​ను ముందుకు తీసుకొచ్చారు. ఆ ఆఫర్​ను ట్విట్టర్​ కాదనలేకపోయింది. ఫలితంగా ఇరువురి మధ్య 44 బిలియన్​ డాలర్ల డీల్​ కుదిరింది. ట్విట్టర్​.. ఎలాన్​ మస్క్​ వశమైంది.