ట్విట్టర్​ సొంతమైతే.. ఎలాన్​ మస్క్​ చేసే మార్పులివే..!

Elon musk twitter buy | సామాజిక మాధ్యమ దిగ్గజం ట్విట్టర్​.. అపర కుబేరుడు ఎలాన్​ మస్క్​ చేతిలోకి వెళ్లనుందని ఊహాగానాలు జోరుగా సాగుతున్నాయి. మస్క్​ ఇచ్చిన ఆఫర్​ను ట్విట్టర్​ అంగీకరిస్తుందని, ఈ విషయంపై ఇరుపక్షాల మధ్య ఇప్పటికే చర్చలు జరుగుతున్నట్టు తెలుస్తోంది. మరికొన్ని గంటల్లో అధికారిక ప్రకటన సైతం వెలువడనుందని సమాచారం. ఇప్పుడు ఈ విషయం సర్వత్రా చర్చనీయాంశమైంది. ట్విట్టర్​ను సొంతం చేసుకుంటే.. ఎలాన్​ మస్క్​ ఎటువంటి మార్పులు చేస్తారు? అన్న విషయంపై సర్వత్రా ఆసక్తి నెలకొంది.

ట్విట్టర్​ విధానాలపై మస్క్​ ఇటీవలి కాలంలో అసంతృప్తి వ్యక్తం చేస్తూనే ఉన్నారు. మస్క్​కు దాదాపు 83మిలియన్​ మంది ఫాలోవర్లు ఉన్నారు. ఈ క్రమంలో తన ఖాతా నుంచి ట్విట్టర్​పై కొన్ని పోల్స్​ నిర్వహించారు.

వాటిని పరిగణలోకి తీసుకుని.. ట్విట్టర్​కు మస్క్​ చేసే మార్పులపై నిపుణులు, విశ్లేషకులు కొన్ని అంచనాలు వేస్తున్నారు. అవేంటంటే..

• Elon Musk twitter news | ఎడిట్​ బటన్​: ట్విట్టర్​కు ఎడిట్​ బటన్​ ఉంటే ఎలా ఉంటుంది? అని మస్క్​కు ఓ అలోచన వచ్చింది. ఇదే విషయంపై ఈ నెల 4న ట్విట్టర్​లో ఓ పోల్​ నిర్వహించారు. 4మిలియన్​కుపైగా ఓట్లు దాఖలు కాగా.. మస్క్​ ఆలోచనలకు చాలా మంది జై కొట్టారు.
• ట్విట్టర్​ ఆల్గొరిథం: ట్విట్టర్​ ఆల్గొరిథంకు మార్పులు చేసి దానిని ఓపెన్​ సోర్స్​గా మార్చాలని మస్క్​ భావించారు. దీనిపైనా పోల్​ నిర్వహించారు. 82.7శాతం మంది ఆయన ఆలోచనలకు అనుకూలంగా ఓట్లు వేశారు. చేసిన ట్వీట్​ను ప్రమోట్​ చేశారా? లేదా? అన్న విషయం యూజర్లకు తెలియాలని మస్క్​ ఓ ఇంటర్వ్యూలో అభిప్రాయపడ్డారు. గిట్​హబ్​లో ఆ కోడ్స్​ పెడితే.. చూసిన వారు ఏవైనా మార్పులు సూచిస్తారని పేర్కొన్నారు.
• క్రిప్టోకరెన్సీ స్కామ్స్​: 2020లో మస్క్​ ఖాతా హైక్​కు గురైంది. అప్పుడు ఆయన పేరుతో క్రిప్టో కరెన్సీ గురించి వార్తలు బయటకొచ్చారు. మస్క్​ దానిని తీవ్రంగా పరిగణించారు. ఎక్కువ డబ్బులను ట్విట్టర్​.. ఎన్​ఎఫ్​టీలు చూపించే ప్రొఫైల్​ ఫొటోల మీద పెడుతోందని, కానీ క్రిప్టో స్కామర్లు.. స్పామ్​బాట్లు ప్రయోగించి ప్రతి విషయంలోనూ బ్లాక్​లకు పాల్పడుతున్నారని మండిపడ్డారు.
• భావప్రకటనా స్వేచ్ఛ: ట్విట్టర్​ విధానాలపై మస్క్​ ఆగ్రహంతో ఉన్నారు. ముఖ్యంగా భావప్రకటనా స్వేచ్ఛకు ట్విట్టర్​ భంగం కలిగిస్తోందని అనేకమార్లు ఆరోపించారు. ట్విట్టర్​.. తన ప్రాథమిక సూత్రాలకు కట్టుబడి ఉందా? అని ఓ పోల్​ నిర్వహించారు. 'లేదు' అని 70శాతానికపైగా మంది ఓట్లు వేశారు. అందువల్ల ఈ విషయంలో మార్పులను ఆశించవచ్చు.

ట్విట్టర్​కు ఝలక్​..

Elon Musk twitter | గత కొంతకాలంగా.. ట్విట్టర్​పై విమర్శలు చేస్తూనే ఉన్నారు మస్క్​. ట్విట్టర్​లో భావప్రకటనా స్వేచ్ఛకు భంగం కలుగుతోందని అభిప్రాపడ్డారు. ఈ క్రమంలోనే ట్విట్టర్​లో 9శాతం వాటా కొనుగోలు చేశారు. ఆ తర్వాత మస్క్​తో ట్విట్టర్​ చర్చలు జరిపింది. కంపెనీ బోర్డులోకి మస్క్​ను చేర్చుకునేందుకు సిద్ధపడింది. తొలుత.. మస్క్​ సైతం ఇందుకు అంగీకరించారు. బోర్డులో చేరడం సంతోషకరం అని అన్నారు. కానీ అనూహ్యంగా తన నిర్ణయాన్ని వెనక్కి తీసుకున్నారు. ట్విట్టర్​కు షాక్​ ఇస్తూ.. మొత్తం సంస్థనే కొనుగోలు చేసేందుకు భారీ డీల్​ను ముందుకు తీసుకొచ్చారు.