North Korea : రెండేళ్ల బాలుడికి జీవిత ఖైదు విధించిన ఉత్తర కొరియా..!
27 May 2023, 13:11 IST
Share
- North Korea news : ఉత్తర కొరియా.. రెండేళ్ల చిన్నారిని అరెస్ట్ చేసి, జీవిత ఖైదు శిక్ష విధించినట్టు తెలుస్తోంది. ఈ మేరకు అమెరికా ప్రభుత్వానికి చెందిన ఓ నివేదిక వెల్లడించింది.
రెండేళ్ల చిన్నారికి జీవిత ఖైదు విధించిన ఉత్తర కొరియా..!
North Korea news : ఉత్తర కొరియాలో ఉండే కఠినమైన ఆంక్షల గురించి కొత్తగా చెప్పాల్సిన అవసరం లేదు. కిమ్ జోంగ్ ఉన్ రాజ్యంలో నెలకొన్న పరిస్థితుల గురించి ప్రపంచ దేశాలు వింటూనే ఉన్నాయి. మతపరమైన అంశాల్లో ఈ ఆంక్షలు ఇంకాస్త కఠినంగానే ఉంటాయి! ఈ నేపథ్యంలో తాజాగా ఓ వార్త బయటకొచ్చింది. ఓ రెండేళ్ల బాలుడిని ఉత్తర కొరియా అధికారులు జైలులో పెట్టి జీవిత ఖైదు శిక్ష విధించినట్టు తెలుస్తోంది. చిన్నారి తల్లిదండ్రుల వద్ద బైబిల్ ఉండటమే ఇందుకు కారణం..!
అసలేం జరిగిందంటే..
ఉత్తర కొరియాలో మతస్వేచ్ఛ చాలా తక్కువ. ముఖ్యంగా క్రీస్టియన్స్పై ఆంక్షలు ఎక్కువగా ఉంటాయి. వారి ఇళ్లల్లో బైబిల్ ఉన్నా జైలుకెళ్లాల్సిందే. వీరిలో చాలా మందికి ఉరిశిక్ష పడిన సందర్భాలు కూడా ఉన్నాయని అమెరికా హోంశాఖకు చెందిన ఓ నివేదిక పేర్కొంది. వారికి ఉరిశిక్ష పడితే.. సంబంధిత కుటుంబసభ్యులు జీవిత ఖైదును ఎదుర్కోవాల్సి వస్తుందని స్పష్టం చేసింది.
అమెరికా స్టేట్ డిపార్ట్మెంట్ రూపొందించిన ఇంటర్నేషనల్ రిలీజియస్ ఫ్రీడం రిపోర్ట్ ఆఫ్ 2022 ప్రకారం.. ఉత్తర కొరియాలో 70వేలకుపైగా మంది క్రైస్తవులు జైలులో ఉన్నారు. ఇతర మతస్థులను కలుపుకుంటే ఈ సంఖ్య ఇంకా ఎక్కువగా ఉంటుంది. జైలులో ఉన్న వారిలో ఓ రెండేళ్ల బాలుడు కూడా ఉన్నాడు. అతని తల్లిదండ్రుల వద్ద బైబిల్ లభించడంతో 2009లో వారిని అరెస్ట్ చేశారు. తల్లిదండ్రులతో పాటు బాలుడిని కూడా పొలిటికల్ ప్రిజన్ క్యాంప్లో బందీగా ఉంచారు. అనంతరం వారికి జీవిత ఖైదును విధించారు! ఈ తరహా క్యాంప్లలో పరిస్థితులు అత్యంత దారుణంగా ఉంటాయని పలువురు చెబుతుంటారు. మానసికంగా, భౌతికంగా చిత్రహింసలకు గురిచేస్తాని అంటుంటారు.
మహిళలపై దాడులు..!
North Korea religious freedom : అయితే.. ఉత్తర కొరియాలో ఈ తరహా పరిస్థితులను అరికట్టేందుకు కృషి చేస్తున్న పలు ఎన్జీఓల్లో కొరియా ఫ్యూచర్ ఒకటి. 2021లో ఈ సంస్థ ఓ నివేదికను విడుదల చేసింది. మతస్వేచ్ఛ నేపథ్యంలో మహిళలను ఉత్తర కొరియా చిత్రహింసలకు గురిచేస్తోందని ఆరోపించింది. 151 మంది క్రైస్తవ మహిళలను ఇంటర్వ్యూ చేసినట్టు.. వారిపై లైంగిక దాడి జరిగినట్టు, వారందరు చిత్రహింసులకు గురైనట్టు వివరించింది.
ఉత్తర కొరియాలో క్రీస్టియన్ మిషినరీలకు వ్యతిరేకంగా పెద్ద ప్రచారాలే జరుగుతున్నట్టు తెలుస్తోంది. ఆ దేశం నుంచి బయటకు వచ్చేసిన వారు అక్కడి పరిస్థితులను వివరించారు. అక్కడి పుస్తకాల్లో క్రీస్టియన్ మిషినరీలకు వ్యతిరేకంగా పాఠాలు ఉంటాయని పేర్కొన్నారు. క్రైస్తవులను.. మనిషి రక్తాన్ని పీల్చుకుని తాగే వారిగా ఉత్తర కొరియా చిత్రీకరించిందని స్పష్టం చేశారు.