Vegetable Croquets Recipe | । క్రిస్పీగా, మృదువుగా ఉండే వెజ్ క్రాకెట్స్.. వీటి రుచి అదుర్స్!

సాయంత్రం వేళ స్నాక్స్ లేకపోయినా, పార్టీలో స్టార్టర్స్ లేకపోయినా ఏదో అసంపూర్ణంగా ఉన్నట్లు అనిపిస్తుంది. మీ మనసుకు ఏదైనా రుచికరంగా తినాలనిపించినపుడు స్నాక్స్- స్టార్టర్ కలయికలా అనిపించే ఒక రెసిపీని మీకు ఇప్పుడు తెలియజేయబోతున్నాం. బంగాళాదుంపలు, క్యారెట్, క్యాబేజీ, కాలీఫ్లవర్, బీన్స్ అన్నీ కలిపి చేసే ఈ స్నాక్స్ ఎంతో రుచికరంగా ఉంటుంది. ఈ చలికాలంలో చిరుతిళ్లు తినాలని కోరుకునే మీ మనస్సుని సంతృప్తి పరుస్తుంది.

మీరు వెజిటెబుల్ క్రాకెట్స్ ఎప్పుడైనా తిన్నారా? ఇదొక డీప్-ఫ్రైడ్ రోల్, అల్పాహారం లేదా ఫాస్ట్ ఫుడ్‌గా తీసుకుంటారు. మెయిన్ డిష్ లోకి సైడ్ డిష్ గా తీసుకున్నా అద్భుతంగా ఉంటుంది. దీనిని తయారు చేయడం చాలా సులభం. పండగ సందర్భంగా మీ ఇంటికి వచ్చే అతిథులకు టీ టైంలో ఈ క్రాకెట్స్ అందించి వారిని ఆనందపరచవచ్చు. మరి వెజిటెబుల్ క్రాకెట్స్ కోసం ఏమేం పదార్థాలు కావాలి, ఎలా తయారు చేయాలో ఇక్కడ తెలుసుకోండి, వెజిటెబుల్ క్రాకెట్స్ రెసిపీ ఈ కింద ఉంది, ఇక్కడ సూచించినట్లుగా తయారు చేస్తే అదిరిపోయే స్నాక్స్ రెడీ.

Vegetable Croquets Recipe కోసం కావలసినవి

• బంగాళదుంపలు - 250 గ్రా
• క్యాబేజీ - 50 గ్రా
• కాలీఫ్లవర్ - 50 గ్రా
• క్యారెట్ - 50 గ్రా
• ఫ్రెంచ్ బీన్స్ - 50 గ్రా
• పచ్చిమిర్చి - 10 గ్రా
• అల్లం - 10 గ్రా
• ఉప్పు - 0.5 గ్రా
• ఎర్ర మిరపకాయ - 10 గ్రా
• గరం మసాలా - 10 గ్రా
• చాట్ మసాలా - 10 గ్రా
• కొత్తిమీర - 20 గ్రా
• బ్రెడ్ ముక్కలు - 100 గ్రా
• నూనె - 10 గ్రా

వెజ్ క్రాకెట్స్ తయారీ విధానం

1. బంగాళాదుంపలను ఉడికించి మెత్తగా చేసుకోండి, ఆపైన మిగతా కూరగాయలను చాలా చిన్నని ముక్కలుగా కట్ చేసుకోండి.
2. మెత్తని బంగాళాదుంప గుజ్జులో కట్ చేసిన కూరగాయలను, మసాలాలను కలిపి మీకు నచ్చిన ఆకృతిలో చిన్నచిన్న ముద్దలుగా చేసుకోండి.
3. ఆపై బ్రెడ్ ముక్కల పొడిలో ముంచి, వేడివేడి నూనెలో బంగారు రంగు వచ్చేవరకు వేయించాలి.

అంతే బయట క్రిస్పీగా, లోపల మెత్తగా ఉండే రుచికరమైన వెజ్ క్రాకెట్స్ రెడీ. వేడివేడిగా తింటూ టీ తాగుతూ చల్లని సాయంత్రాన్ని ఆస్వాదించండి.