Corn flour: సూపుల్లో, గ్రేవీలో కార్న్‌ఫ్లోర్ వాడేస్తున్నారా? బరువు, గుండె ఆరోగ్యం మీద ఎలా ప్రభావం ఉంటుందంటే..

సాంప్రదాయ వంటకాల్లో మొక్కజొన్న పిండి లేదా కార్న్‌ఫ్లోర్ వాడకం దాదాపుగా ఉండదు. కానీ కబాబ్స్, టిక్కాలు, నగ్గెట్స్, మంచూరియా, సూప్స్.. ఇలాంటి ఫ్యూజన్ వంటకాలు ఏవి చేసినా వాటిలో తప్పకుండా కార్న్‌ఫ్లోర్ వాడాల్సిందే. కొన్ని రకాల కూరల గ్రేవీలు, సూపులు చిక్కగా రావడానికి కార్న్ ఫ్లోర్ వాడతారు. దీన్ని కాస్త నీటిలో కలిపి వేస్తే చాలు. గ్రేవీకి చిక్కదనం వచ్చేస్తుంది. కానీ దీన్ని ఎక్కువగా వాడితే ఆరోగ్య సమస్యలు తప్పవు. కార్న్ ఫ్లోర్ రక్తంలో చక్కెర స్థాయులని పెంచడంతో పాటూ మరికొన్ని అనారోగ్య సమస్యల్నీ తెస్తుంది.

కార్న్ ఫ్లోర్ దేనితో తయారవుతుంది:

ఎండిన మొక్కజొన్న గింజల నుంచి కార్న్ ఫ్లోర్ లేదా మొక్కజొన్న పిండి తయారవుతుంది. గోదుమల నుంచి మైదా తయారు చేయడానికి ఎలాగైతే విపరీతమైన ప్రాసెసింగ్ జరుగుతుందో.. మొక్కజొన్న నుంచి కార్న్ ఫ్లోర్ కూడా ప్రాసెసింగ్ చేసి తయారు చేస్తారు. మామూలుగా మొక్కజొన్న గింజలను పిండి పట్టిస్తే కాస్త పసుపు పచ్చ రంగులో ఉంటుంది. కార్న్ ఫ్లోర్‌కు ఆ రంగు లేకపోవడానికి, తెల్లగా పౌడర్ లాగా మెరిసి పోవడానికి దాని ప్రాసెసింగ్ కారణం. అందుకే దీనిలో కేలరీలు, పిండి పదార్థాలు ఎక్కువగా ఉంటాయి.

ఒక కప్పు మొక్కజొన్న పిండిలో సుమారు 490 కేలరీలు, 120 గ్రాముల పిండి పదార్థాలు ఉంటాయి. అలాగే విటమిన్లు, ప్రొటీన్లు చాలా తక్కువగా ఉంటాయి. అందువల్ల మొక్కజొన్న పిండి ఆరోగ్యానికి మంచిది కాదు.

డయాబెటిస్:

మొక్కజొన్న పిండిలో కార్బోహైడ్రేట్లు అధికంగా ఉంటాయి. దీని వల్ల దీని గ్లైసెమిక్ ఇండెక్స్ కూడా ఎక్కువగా ఉండి రక్తంలో చక్కెర స్థాయుల్ని పెంచేస్తుంది. డయాబెటిక్ పేషెంట్లకు ఇది హానికర ఉత్పత్తి. మొక్కజొన్న పిండిని నిరంతరం తినడం వల్ల శరీరంలో రక్తంలో చక్కెర పెరిగే ప్రమాదం పెరుగుతుంది. టైప్ 2 డయాబెటిస్ కు దారితీస్తుంది.

గుండె జబ్బులు:

మొక్కజొన్న పిండి ప్రాసెసింగ్ కారణంగా, దాని పోషణ అంతా కోల్పోతుంది. అధ్యయనం ప్రకారం, శుద్ధి చేసిన పిండి పదార్థాలు గుండెకు హానికరం. గుండెజబ్బులు, పక్షవాతం, గుండె ఫెయిల్యూర్ భయం ఉంటుంది. దీనికి కారణం శుద్ధి చేసిన ఆహారం వల్ల ట్రైగ్లిజరాయిడ్లు పెరగడమే. ధమనుల్లో అడ్డంకులు ఏర్పడి అధిక రక్తపోటు వచ్చే ప్రమాదం ఉంది.

బరువు పెరగడం:

మొక్కజొన్న పిండిని నిత్యం ఆహార పదార్థాల్లో చేర్చుకుంటే బరువు పెరిగే ప్రమాదం కూడా ఉంటుంది. ఆరోగ్యంగా ఉండటానికి సూప్ తాగుతాం. కానీ దాంట్లో కూడా ఎక్కువ మొత్తంలో కార్న్ ఫ్లోర్ వాడితే అది మీ ఆరోగ్యాన్ని పాడు చేస్తుంది. ఇందులో ఉండే కార్బోహైడ్రేట్లు, కేలరీలు వేగంగా బరువును పెంచుతాయి.

ఈ విషయాలను గుర్తుంచుకోండి

ఆహారంలో ఒకటి నుండి రెండు టీస్పూన్ల మొక్కజొన్న పిండిని మాత్రమే జోడించినప్పటికీ, రోజూవారీ ఆహారంలో తినడం ఆరోగ్యానికి హాని కలిగిస్తుంది. కాబట్టి దీన్ని తినేటప్పుడు జాగ్రత్త అవసరం. అలాగే సాధారణంగా కబాబ్స్ లాంటి వాటిలో కొటింగ్ కోసం దీన్ని వాడతారు. అప్పుడు ఈ పిండికి బదులు వేరే ప్రత్యామ్నాయాలు వెతుక్కోవడం మంచిది. ముఖ్యంగా డయాబెటిస్ పేషెంట్లు దీనికి దూరంగా ఉండటం మంచిది.