Hair care: ఈ నూనెలను కలిపి వాడితే చుండ్రు తొలగిపోవడంతో పాటూ జుట్టు పెరుగుతుంది

ఆధునిక కాలంలో ఆహారంలో మార్పుల వల్ల, ఒత్తిడి వల్ల, కాలుష్యం వల్ల జుట్టు విపరీతంగా రాలిపోయే సమస్య ఎదురవుతోంది. అలాగే మురికి నెత్తిపై చేరి చుండ్ర సమస్యా మొదలవుతుంది. చుండ్రును తగ్గించుకోవడం కోసం అనేక షాంపూలు వాడే వారు ఎంతో మంది ఉన్నారు. కానీ షాంపూల వల్ల ఎలాంటి ఫలితం దక్కడం లేదు. అయితే ఇంటి చిట్కాలు ద్వారానే చుండ్రును పొగొట్టుకుని, జుట్టు పొడవుగా పెరిగేలా చేసుకోవచ్చు.

జుట్టును కాపాడే క్రమంలో అందరూ నూనెను అప్లై చేస్తూ ఉంటారు. కొన్ని రకాల నూనెలు అన్ని రకాల జుట్టు సమస్యలకు నివారణగా ఉపయోగిస్తారు. బలహీనమైన జుట్టు, చుండ్రు వంటి సమస్యలకు నూనె సహాయపడుతుంది.

చుండ్రు, జుట్టు రాలడం వంటి సమస్యలు దూరం కావాలంటే… జుట్టు సంరక్షణ చాలా ముఖ్యం. నెత్తి మీద నూనెతో మసాజ్ చేయడం చాలా ముఖ్యం. ఇది నెత్తిమీద రక్త ప్రవాహాన్ని పెంచుతుంది. అలాగే, నూనెలోని పోషణ లక్షణాలు జుట్టును మృదువుగా, ఆరోగ్యంగా మారుస్తాయి. ఆరోగ్యకరమైన జుట్టు కోసం కొన్ని ముఖ్యమైన నూనెలు ఉన్నాయి. వీటిని వాడడం ద్వార సహజంగానే చుండ్రును తగ్గించి జుట్టు పెరిగేలా చేసుకోవచ్చు.

రోజ్మేరీ ఆయిల్ తో

రోజ్మేరీ ఆయిల్ రోజ్మేరీ అనే మొక్క నుండి తయారవుతుంది. ఇందులో ఉండే కార్నోసిక్ ఆమ్లం మృత కణాలను పునరుత్పత్తి చేసి చర్మం, జుట్టును ఆరోగ్యంగా ఉంచుతుంది. ఇది జుట్టు పెరుగుదలకు సహాయపడుతుంది. చుండ్రును వదిలించుకోవడానికి సహాయపడుతుంది. ఒక టీస్పూన్ కొబ్బరి నూనెలో ఐదారు టీస్పూన్ల రోజ్మేరీ ఆయిల్ కలపండి. రోజ్మేరీ నూనెను నేరుగా వేడి చేయకూడదు కాబట్టి కొబ్బరి నూనెలో వేసి దీన్ని వేడి చేయాలి. అయితే నేరుగా దీన్ని స్టవ్ మీద పెట్టి వేడి చేయకూడదు. ఒక పాత్రలో నీటిని పోసి అందులో ఈ నూనె గిన్నెను మునిగిపోకుండా పెట్టి వేడి చేయాలి. ఆ రెండింటినీ తరచూ మాడుకు పట్టించడం ద్వారా చుండ్రును తగ్గించుకోవచ్చు.

ఆలివ్ ఆయిల్

ఆలివ్ ఆయిల్ జుట్టు పెరుగుదలకు ఎంతో మేలు చేస్తుంది. పొడి వాతావరణంలో కూడా ఇది జుట్టును తేమవంతంగా ఉంచి, మృదువుగా చేయడానికి సహాయపడుతుంది.ఆలివ్ ఆయిల్ కూడా చుండ్రును వదిలించుకోవడానికి సహాయపడుతుంది. ఆలివ్ ఆయిల్ తో తలకు మసాజ్ చేయడం చాలా ఎఫెక్టివ్ గా పనిచేస్తుంది.

ఆముదం నూనె

జుట్టు ఆరోగ్యాన్ని మెరుగుపరచడంలో ఆముదం నూనె చాలా ఎఫెక్టివ్ గా పనిచేస్తుంది. ఇందులో ఉండే రిసినోలిక్ యాసిడ్, ఒమేగా 6 ఫ్యాటీ యాసిడ్లు ప్రయోజనకరమైన లక్షణాలు నెత్తికి మేలు చేస్తాయి. రక్త ప్రసరణను మెరుగుపరుస్తాయి. ఈ నూనె జుట్టు పెరుగుదలను ప్రోత్సహిస్తాయి. అలాగే, ఇది జుట్టును సహజంగా హైడ్రేట్ చేస్తుంది. ఆరోగ్యంగా ఎదిగేలా చేస్తుంది.

కొబ్బరి నూనె

ఆరోగ్యకరమైన జుట్టు పెరుగుదలకు ఎక్కువ మంది ఉపయోగించే నూనె కొబ్బరి నూనె. ఇందులో ఉండే మంచి కొవ్వులు జుట్టు ఆరోగ్యాన్ని కాపాడటంలో సహాయపడతాయి. అలాగే కొబ్బరి నూనె జుట్టును హైడ్రేట్ గా ఉంచడానికి, ప్రోటీన్ నష్టాన్ని నివారించడానికి చాలా మంచిది. కొద్దిగా వేడి చేసిన కొబ్బరి నూనె నెత్తిమీద మసాజ్ చేయడం వల్ల ఆరోగ్యకరమైన జుట్టు పెరుగుదలకు సహాయపడుతుంది.