Bisi Bele Bath: కర్ణాటక స్పెషల్ బిసిబెలె బాత్ రెసిపీ, మసాలా తయారీతో సహా చూసేయండి..

అన్నం, పప్పు, కూరగాయలతో కలిపి చేస్తారు బిసిబెలె బాత్. ఈ వంటలో ముఖ్యమైంది ఈ అన్నం చేయడానికి అవసరమయ్యే బిసిబెలె మసాలా. అందుకే ఆ మసాలా తయారీతో పాటూ, బిసిబెలె బాత్ కూడా ఎలా చేయాలో చూసేయండి.

బిసి బెలె బాత్ మసాలా:

కావాల్సిన పదార్థాలు:

దాల్చిన చెక్క - 5 గ్రాములు

లవంగాలు - 2 గ్రాములు

శనగలు - 20 గ్రాములు

మినప్పప్పు - గ్రాము

ఇంగువ - 10 గ్రాములు

కొత్తిమీర - 50 గ్రాములు

గుంటూరు మిరపకాయలు - 10

కరివేపాకు - 5 టేబుల్ స్పూన్లు

గసగసాలు - 10 గ్రాములు

పసుపు - 1 టీస్పూన్

జీలకర్ర - 1 టీస్పూన్

యాలకులు - 2

నూనె - 2 టేబుల్ స్పూన్లు

ఈ పదార్థాల నుండి పావు కేజీ బిసి బేలే బాత్ పౌడర్ తయారు చేయవచ్చు

బిసిబెలె బాత్ పొడి తయారు చేసే విధానం:

1. మందపాటి అడుగున్న పాన్‌లో నూనె వేడి చేసి ఇంగువ, దాల్చిన చెక్క, లవంగాలు వేసి తక్కువ మంటమీద 30 సెకన్ల పాటు వేయించాలి.
2. శనగలు, మినప్పప్పు, యాలకులు కూడా వేసుకుని రంగు మారేవరకు వేయించుకుని తీసుకోవాలి.
3. ఇప్పుడు నూనె లేకుండా జీలకర్ర, గసగసాలు, గుంటూరు మిర్చి, కరివేపాకు, పసుపు వేసుకుని వేయించుకుని ప్లేట్ లోకి తీసుకోవాలి.
4. ఇప్పుడు మిక్సీలో శనగలు, మిరపకాయలు వేసుకుని పొడి చేసుకోవాలి. ఇవి మెత్తని పొడిలా అయ్యాక మిగిలిన పదార్థాలన్నీ కూడా వేసుకుని గ్రైండ్ చేసుకుంటే బిసి బెలె బాత్ పౌడర్ రెడీ.

బిసిబెలె బాత్ తయారీ విధానం:

కావాల్సిన పదార్థాలు:

సగం కప్పు కందిపప్పు

సగం కప్పు బియ్యం

పావు చెంచా పసుపు

3 చెంచాల నూనె

2 చెంచాల నెయ్యి

సగం చెంచా ఆవాలు

2 ఎండుమిర్చి

చిటికెడు ఇంగువ

2 చెంచాల పల్లీలు

1 కరివేపాకు రెబ్బ

చిన్న ఉల్లిపాయ(ముక్కలు)

1 క్యారట్(ముక్కలు)

1 బంగాళదుంప (ముక్కలు)

2 చెంచా బటానీ

5 బీన్స్ (ముక్కలు)

సగం టమాటా (ముక్కలు)

సగం చెంచా పసుపు

సగం కప్పు చింతపండు గుజ్జు

3 చెంచాల బిసి బెలె బాత్ మసాలా

1 చెంచా కారం

తగినంత ఉప్పు

తయారీ విధానం:

1. ముందుగా ప్రెజర్ కుక్కర్ లో కందిపప్పు, బియ్యం, పావు చెంచా పసుపు, ఒక చెంచా నూనె వేసుకుని మూడు కప్పులు నీళ్లు పోసుకుని 5 విజిల్స్ వచ్చేదాకా ఉడికించుకోవాలి.
2. ఇప్పుడొక కడాయిలో రెండు చెంచాల నూనె, రెండు చెంచాల నెయ్యి వేసుకుని వేడి చేసుకోవాలి. ఆవాలు, ఎండుమిర్చి, ఇంగువ, పల్లీలు, కరివేపాకు వేసి వేగనివ్వాలి.
3. ఉల్లిపాయ ముక్కలు వేసుకుని రంగు మారాక, క్యారట్, బంగాళదుంప, బటానీ, బీన్స్, టమాటా ముక్కలు కూడా వేసుకోవాలి. కాస్త పసుపు, ఉప్పు వేసుకుని కలియబెట్టాలి.
4. కూరగాయ ముక్కలన్నీ కాస్త మెత్తబడ్డాక రెండు కప్పుల నీళ్లు పోసి ఉడికించుకోవాలి. కూరగాయలన్నీ ఉడికాక చింతపండు గుజ్జు కూడా పోసుకోవాలి.
5. ఇప్పుడు బిసి బెలె బాత్ మసాలా, కారం, ఉప్పు వేసుకుని కలుపుకోవాలి. ఇందులో ఉడికించుకున్న బియ్యం, పప్పు మిశ్రమం వేసుకోవాలి.
6. సన్నం సెగ మీద ఉడికించుకుని, చివరగా నూనెలో వేయించిన జీడిపప్పు, పల్లీలు, కరివేపాకు వేసుకుంటే చాలు. బిసి బెలె బాత్ రెడీ.