Asthma Symptoms and Remedies: ఆస్తమా లక్షణాలు ఇవే.. దీపావళికి, అలాగే చలికాలంలో ఈ జాగ్రత్తలు తప్పనిసరి

అందరికీ దీపావళి ఆనందాలనిచ్చే పండుగ. కానీ ఆస్తమా, ఇతర శ్వాసకోశ వ్యాధులు ఉన్నవారికి ఈ సమయం తీవ్రంగా ఇబ్బందిపెడుతుంది. బాణాసంచా పేలుళ్లు, ఉదయం, సాయంత్రం పొగమంచు, అలర్జీలు వంటి కారణాల వల్ల ఈ సమయంలో శ్వాసకోశ వ్యాధుల లక్షణాలు తీవ్రతరం అవుతాయి. ఆస్తమా లక్షణాలు ఇక్కడ తెలుసుకోండి.

ఆస్తమా వ్యాధి లక్షణాలు

• నిరంతర దగ్గు: దీర్ఘకాలికంగా దగ్గు తగ్గకపోవడం.
• ఛాతీలో బిగుతు: ఛాతీలో ఒత్తిడి లేదా బిగుతుగా ఉండడం
• శ్వాస తీసుకోవడంలో ఇబ్బంది: ఊపిరి తీసుకోవడం కష్టంగా మారుతుంది. ముఖ్యంగా శారీరక శ్రమ సమయంలో ఇది మరింత ఎక్కువగా ఉంటుంది. ఆలాగే ఆయాసం వస్తుంది.
• ఛాతీలో శబ్దం: ఊపిరి తీసుకునేటప్పుడు ఛాతీలో విజిల్ సౌండ్ లేదా గరగర శబ్దాలు వినిపిస్తాయి.
• అలసట: నిరంతరం అలిసిపోయి కనిపిస్తారు. బలహీనంగా ఉంటారు.
• నిద్రలేమి: నిద్ర లేక ఇబ్బంది పడుతుంటారు. ఆలస్యంగా నిద్ర పోతుంటారు.

ఆస్తమాకు ఈ సీజన్‌లో ఎలాంటి జాగ్రత్తలు తీసుకోవాలి?

• బాణాసంచాకు దూరంగా ఉండండి: పటాకల పొగ శ్వాసకోశ వ్యాధిని మరింత తీవ్రతరం చేస్తుంది. కాబట్టి, పటాకాలకు దూరంగా ఉండండి.
• మాస్క్ ధరించండి: బయటకు వెళ్ళేటప్పుడు మాస్క్ ధరించండి. ఇది పొగమంచు, అలర్జీ కారకాల నుండి రక్షిస్తుంది.
• వైద్యుడిని సంప్రదించండి: మీ శ్వాసకోశ వ్యాధి తీవ్రతరం అవుతుంటే వైద్యుడిని సంప్రదించండి. ఏమాత్రం నిర్లక్ష్యం వహించినా ఆస్తమా లక్షణాలు మరింత ఎక్కువై ఇబ్బందిపెడుతాయి.
• నెబ్యులైజర్ ఉపయోగించండి: వైద్య సలహా మేరకు నెబ్యులైజర్ ఉపయోగించడం వల్ల ఊపిరితిత్తులలోని శ్లేష్మం తగ్గుతుంది.
• ఆరోగ్యకరమైన ఆహారం తీసుకోండి: ఆరోగ్యకరమైన ఆహారాన్ని తీసుకోవడం వల్ల శరీర రోగ నిరోధక శక్తి పెరుగుతుంది.
• రోజూ వ్యాయామం చేయండి: రోజూ తేలికపాటి వ్యాయామం చేయడం వల్ల శ్వాసకోశ వ్యాధి లక్షణాలు తగ్గుతాయి.
• తగినంత నీరు తాగండి: తగినంత నీరు తాగడం వల్ల శరీరం హైడ్రేట్‌గా ఉంటుంది. రోజూ మూడు నాలుగు లీటర్ల నీళ్లు తాగడం మంచిది. సందేహం ఉంటే వైద్యుడిని సంప్రదించడం మేలు చేస్తుంది.
• పొగ, మద్యపానం మానుకోండి: పొగతాగడం వల్ల మీ ఆస్తమా సమస్య మరింత పెరుగుతుంది. మద్యపానం వల్ల మీ రోగనిరోధక శక్తి తగ్గుతుంది. అందువల్ల ఈ రెండింటికీ ఆమడ దూరంలో ఉండడం మంచిది.