Summer Glowing Skin Tips : వేసవిలో రాత్రి పడుకునే ముందు దీన్ని ముఖానికి రాసుకోండి

వేసవిలో చర్మ సమస్యలు అనేకం వస్తాయి. ఈ సమయంలో చర్మం కాలిపోవడం ప్రారంభమవుతుంది. చర్మవ్యాధి నిపుణుల అభిప్రాయం ప్రకారం, సూర్యుడి నుండి వచ్చే హానికరమైన UV కిరణాలు మన చర్మానికి చాలా హాని కలిగిస్తాయి. మనం మన వయస్సు కంటే పెద్దవారిగా కనిపించడం ప్రారంభిస్తాం.

చర్మ సంరక్షణ విషయానికి వస్తే మార్కెట్‌లో లభించే ఉత్పత్తుల వైపు మొగ్గు చూపుతాం. అయితే ఈ సమస్యలకు ఇంటి చిట్కాలే పరిష్కారం. సూర్యరశ్మి, కాలుష్యం మన చర్మానికి పెద్ద శత్రువులు. మీరు ఆఫీసుకు వెళ్లినా లేదా మరేదైనా పని కోసం బయటకు వెళ్లినా.. సూర్యుని హానికరమైన కిరణాల నుండి మీ చర్మాన్ని పూర్తిగా రక్షించుకోలేరు. కానీ మీరు మీ చర్మ సంరక్షణలో కొన్ని ఇంటి చిట్కాలను ఉపయోగించడం ద్వారా ఈ సమస్యలను తగ్గించుకోవచ్చు.

చలికాలంలో చర్మ సంరక్షణపై ఎంత శ్రద్ధ వహిస్తామో, వేసవిలో చర్మాన్ని, దాని రక్షణపై కూడా అంతే శ్రద్ధ పెట్టాలి. సాధారణంగా వేసవిలో చర్మం జిడ్డుగా మారుతుంది. వేసవిలో వచ్చే చర్మ సమస్యలకు మార్కెట్‌లో రకరకాల చర్మ సంరక్షణ క్రీములు అందుబాటులో ఉన్నాయి. అయితే ఇది అందరి చర్మానికి సరిపోతుందని చెప్పలేం. కానీ మన ఇంట్లో ఉండే ఈ ఉత్పత్తులు అందరి చర్మానికి సరిపోతాయి. వేసవిలో చర్మాన్ని ఆరోగ్యంగా ఉంచడానికి కింద చెప్పే విషయాలను ఫాలో అవ్వండి. మొటిమలు, బ్లాక్ హెడ్స్, కళ్ల కింద నల్లటి వలయాలు మొదలైన వాటిని తొలగిస్తుంది.

పెరుగు

పెరుగు ఆరోగ్యానికి, చర్మానికి ఎంతో మేలు చేస్తుంది. పెరుగులో విటమిన్ డి, క్యాల్షియం, ప్రొటీన్లు ఉంటాయి. ఇది చర్మాన్ని కాంతివంతం చేస్తుంది. నల్ల మచ్చలను తొలగిస్తుంది. వేసవిలో పెరుగును రాత్రిపూట ముఖానికి పట్టించి చేతులతో మసాజ్ చేయాలి. మూడు నుంచి నాలుగు నిమిషాలు మసాజ్ చేస్తే సరిపోతుంది. మసాజ్ చేసిన తర్వాత అలా వదిలేసి ఉదయాన్నే నీళ్లతో ముఖం కడుక్కోవాలి.

దోసకాయ రసం

వేసవిలో రాత్రిపూట దోసకాయ రసాన్ని ముఖానికి రాసుకుంటే చర్మం చల్లబడి వేసవిలో వచ్చే చర్మపు చికాకు తగ్గుతుంది. దాని రసాన్ని తీయడానికి దోసకాయను తురుముకోవాలి. దాని నుండి రసం తీయండి. ఈ సారాన్ని రాత్రి పడుకునే ముందు ముఖంపై రాసుకోవాలి. ఇలా చేయడం వల్ల మొటిమలు తొలగిపోవడమే కాకుండా చర్మం మెరుస్తుంది.

దోసకాయలో 92 శాతం నీరు ఉంటుంది. ఇది మీ చర్మాన్ని హైడ్రేట్ చేయగలదు. ఇది వేడి వల్ల కలిగే అనేక చర్మ సమస్యలను నయం చేస్తుంది. ప్రతిరోజూ రాత్రి నిద్రపోయే ముందు, మీ ముఖం కడుక్కోండి. బాగా ఆరబెట్టండి, దోసకాయ రసాన్ని అప్లై చేసి రాత్రంతా అలాగే ఉంచండి. దీంతో మొటిమల సమస్యను శాశ్వతంగా దూరం చేసుకోవచ్చు. మొటిమలతో పాటు, చర్మాన్ని సహజంగా మెరిసేలా చేయడానికి దోసకాయ సహాయపడుతుంది.

అలోవెరా జెల్

అలోవెరా జెల్ ముఖానికి రాసుకుంటే వేసవిలో టానింగ్ సమస్య తొలగిపోయి. చర్మం మృదువుగా మారుతుంది. రాత్రిపూట అలోవెరా జెల్‌ని ముఖానికి రాసుకుని మర్దన చేసి ఉదయం ముఖం కడుక్కోవాలి. ఇది మొటిమల సమస్యను దూరం చేసి చర్మాన్ని మెరుగుపరుస్తుంది.

బాదం నూనె

బాదం నూనె చర్మానికి చాలా మంచిది. వేసవిలో పడుకునే ముందు బాదం నూనెతో మీ ముఖాన్ని మసాజ్ చేయండి. ఇది లోపలి నుండి చర్మాన్ని రిపేర్ చేస్తుంది. చర్మాన్ని ప్రకాశవంతం చేస్తుంది. బాదం నూనె UV కిరణాల హానికరమైన ప్రభావాల నుండి చర్మాన్ని రక్షిస్తుంది. ముఖం నుండి మచ్చలను తొలగించడంలో సహాయపడుతుంది.

ఆలివ్ నూనె

చర్మానికి చాలా మంచిది. అనేక సమస్యలను సులభంగా నయం చేస్తుంది. దీన్ని ఉపయోగించడానికి, కొన్ని చుక్కల ఆలివ్ నూనెను ముఖానికి అప్లై చేసి చేతులతో మసాజ్ చేయండి. ఇలా రోజూ రాత్రిపూట చేస్తే చర్మం మెరిసిపోయి ముడతలు సులువుగా తొలగిపోతాయి.