Family Star Release Date: విజయ్ దేవరకొండ ‘ఫ్యామిలీ స్టార్’ రిలీజ్ డేట్ ఫిక్స్.. అధికారికంగా వెల్లడించిన టీమ్

Family Star Release Date: రౌడీ హీరో విజయ్ దేవరకొండ కొన్నేళ్లుగా సరైన హిట్ లేక సతమతమవుతున్నాడు. గతేడాది వచ్చిన ఖుషి సినిమా కూడా అంచనాలను ఏ మాత్రం అందుకోలేకపోయింది. దీంతో మంచి విజయం కోసం దేవరకొండ వేచిచూస్తున్నాడు. ప్రస్తుతం డైరెక్టర్ పరశురామ్‍‍తో ఫ్యామిలీ స్టార్ సినిమా చేస్తున్నాడు విజయ్ దేవరకొండ. బ్లాక్‍బాస్టర్ మూవీ గీతగోవిందం తర్వాత విజయ్ - పరశురామ్ కాంబో రిపీట్ అవుతుండటంతో ఈ చిత్రంపై మంచి అంచనాలు ఏర్పడ్డాయి. తాజాగా, ఫ్యామిలీ స్టార్ మూవీ రిలీజ్ డేట్ ఖరారైంది.

ఫ్యామిలీ స్టార్ సినిమా ఈ ఏడాది ఏప్రిల్ 5వ తేదీన థియేటర్లలో రిలీజ్ కానుంది. ఈ విషయాన్ని శ్రీ వెంకటేశ్వర క్రియేషన్స్ (SVC) నేడు (ఫిబ్రవరి 2) వెల్లడించింది. “బ్లాక్‍బాస్టర్ ఎంటర్‌టైన్‍మెంట్ బొనాంజా వచ్చేస్తోంది. మా ఫ్యామిలీ స్టార్‌ను మీ హృదయాల్లోకి ఆహ్వానించే తేది ఏప్రిల్ 5” అని ట్వీట్ చేసింది.

నోటితో ఆధార్ కార్డును పట్టుకొని, భుజంపై సంచితో విజయ్ దేవరకొండ ఉన్న కొత్త పోస్టర్‌ను మూవీ టీమ్ పోస్ట్ చేసింది. ఈ పోస్టర్‌లో పక్కా ఫ్యామిలీ మ్యాన్‍లా విజయ్ ఉన్నాడు. తెలుగుతో పాటు తమిళంలోనూ పోస్టర్‌ వచ్చింది. ఈ సినిమాలో మృణాల్ ఠాకూర్ హీరోయిన్‍గా నటిస్తున్నారు. శ్రీ వెంకటేశ్వర క్రియేషన్స్ పతాకంపై దిల్‍రాజు, శిరీష్ ఈ చిత్రాన్ని నిర్మిస్తున్నారు. రొమాంటిక్ ఫ్యామిలీ డ్రామాగా ఈ చిత్రాన్ని తెరకెక్కిస్తున్నారు పరశురామ్. గోపీ సుందర్ సంగీతం అందిస్తున్నారు.

ఈ ఏడాది సంక్రాంతికి ఫ్యామిలీ స్టార్ మూవీని రిలీజ్ చేస్తామని గతంలో మూవీ టీమ్ ప్రకటించింది. అయితే, చిత్రీకరణ పూర్తికాకపోవటంతో వాయిదా పడింది. ఈ మూవీ షూటింగ్ ప్రస్తుతం జోరుగా సాగుతోంది. దీంతో ఏప్రిల్ 5వ తేదీన ఈ చిత్రాన్ని రిలీజ్ చేసేందుకు టీమ్ నిర్ణయించింది.

దేవర స్థానంలో..

జూనియర్ ఎన్టీఆర్ హీరోగా నటించిన దేవర పార్ట్-1 మూవీ వాయిదా పడితే ఏప్రిల్ 5వ తేదీన ఫ్యామిలీ స్టార్ మూవీని రిలీజ్ చేస్తామని ఇటీవలే దిల్‍రాజు చెప్పారు. అదే ఇప్పుడు ఖరారైంది. దేవర చిత్రం వాయిదా పడడం అనివార్యంగా మారింది. దీంతో ఏప్రిల్ 5న దేవర స్థానంలో దేవరకొండ ‘ఫ్యామిలీ స్టార్’ ప్రేక్షకుల ముందుకు రానుంది.

ఫ్యామిలీ స్టార్ మూవీలో పిల్లల తండ్రిగా పక్కా ఫ్యామిలీ మ్యాన్‍లా విజయ్ దేవరకొండ కనిపించనున్నారు. గతంలోనే వచ్చిన ఈ మూవీ గ్లింప్స్ ఆకట్టుకుంది. పంచె కట్టులో విజయ్ లుక్ కొత్తంగా అనిపించింది. అలాగే, యాక్షన్ సీన్ కూడా గ్లింప్స్‌లో ఉంది. ‘ఐరనే వంచాలా ఏంటి’ అంటూ ఇనుప రాడ్ బెండ్ చేస్తూ విజయ్ చెప్పిన డైలాగ్‍‍ కూడా బాగా పాపులర్ అయింది. ఈ గ్లింప్స్‌లో విజయ్ డైలాగ్ డెలివరీ కూడా ఆకట్టుకుంది. దీంతో ఫ్యామిలీ స్టార్ చిత్రం ఆసక్తి మరింత పెరిగింది.

ఫ్యామిలీ స్టార్ సినిమా షూటింగ్ ఫిబ్రవరిలోనే పూర్తవుతుందని తెలుస్తోంది. ఆ తర్వాత గౌతమ్ తిన్ననూరి దర్శకత్వంలో మూవీ (VD12) చేయనున్నారు విజయ్ దేవరకొండ. యాక్షన్ థ్రిల్లర్‌ జానర్‌లో రూపొందనున్న ఈ మూవీ షూటింగ్ మార్చిలో మొదలయ్యే అవకాశం ఉంది.