Tillu Square Postponed: టిల్లు స్క్వేర్ రిలీజ్ కూడా వాయిదా.. మళ్లీ ఎప్పుడంటే?

Tillu Square Postponed: టాలీవుడ్‌లో వాయిదాల పర్వం కొనసాగుతోంది. తాజాగా టిల్లు స్క్వేర్ మూవీ రిలీజ్ కూడా వాయిదా పడింది. ఈ విషయాన్ని సోమవారం (సెప్టెంబర్ 4) మేకర్స్ వెల్లడించారు. ఇప్పటికే ప్రభాస్ సలార్ మూవీ రిలీజ్ ను మేకర్స్ వాయిదా వేసిన విషయం తెలిసిందే. ఇక రామ్ స్కంద మూవీ కూడా సెప్టెంబర్ 15 నుంచి సెప్టెంబర్ 28కు వాయిదా పడింది.

ఆ వెంటనే టిల్లు స్క్వేర్ రిలీజ్ ను కూడా వాయిదా వేస్తున్నట్లు మేకర్స్ అనౌన్స్ చేశారు. "టిల్లు స్వ్కేర్ పోస్ట్ ప్రొడక్షన్ పనులు వేగంగా సాగుతున్నాయి. అయినా కూడా ఈ సినిమాను ముందుగా చెప్పినట్లు సెప్టెంబర్ 15న రిలీజ్ చేయలేకపోతున్నందుకు క్షమించండి.

ప్రొడక్షన్ లో ఎలాంటి రాజీ లేకుండా అత్యుత్తమ నాణ్యతతో కూడా ప్రోడక్ట్ అందించాలన్న ఉద్దేశంతోనే ఈ నిర్ణయం తీసుకున్నాం. కొత్త రిలీజ్ తేదీని ఓ కొత్త వీడియోతో త్వరలోనే అనౌన్స్ చేస్తాం. మా మూవీని మీకు చూపించడానికి చాలా ఆతృతగా ఎదురు చూస్తున్నాం. ఇట్లు మీ సిద్దు" అంటూ మేకర్స్ ఈ అనౌన్స్‌మెంట్ చేశారు.

టిల్లు స్వ్కేర్ మూవీ రిలీజ్ వాయిదా అభిమానులను నిరాశకు గురి చేసేదే. టాలీవుడ్ లో వరుసగా ఇలా సినిమాలు వాయిదా పడుతుండటం అంతుచిక్కని విషయం. సితార ఎంటర్‌టైన్మెంట్స్, ఫార్చూన్ ఫోర్ సినిమాస్ సంయుక్తంగా టిల్లు స్క్వేర్ మూవీని తెరకెక్కించాయి. రామ్ మిరియాలా మ్యూజిక్ అందించాడు. ఈ మూవీలో సిద్దూ జొన్నలగడ్డ సరసన అనుపమ పరమేశ్వరన్ నటిస్తోంది.

యంగ్ హీరో సిద్ధు జొన్నలగడ్డ, క్యూట్ హీరోయిన్ అనుపమ పరమేశ్వరన్ కాంబినేషన్‍లో వస్తున్న ‘టిల్లు స్క్వేర్’ మూవీపై మంచి క్రేజ్ ఉంది. గతేడాది ‘డీజే టిల్లు’తో సిద్ధు సెన్సేషనల్ హిట్ సాధించగా.. దానికి సీక్వెల్‍గా ఈ ‘టిల్లు స్క్వేర్’ వస్తోంది. ఈ చిత్రానికి మల్లిక్ రామ్ దర్శకత్వం వహిస్తున్నారు.