Kanguva 2: సూర్య కంగువ 2 మూవీలో హీరోయిన్‌గా దీపిక పదుకొణె- నిర్మాత జ్ఞానవేల్ రాజా క్లారిటీ- కార్తీ కొత్త మూవీపై అప్డేట్

Gnanavel Raja About Deepika Padukone: తమిళ స్టార్ హీరో సూర్య యాక్ట్ చేసిన ప్రతిష్టాత్మక చిత్రం కంగువ. డైరెక్టర్ శివ దర్శకత్వం వహించిన ఈ సినిమా భారీ భారీ పీరియాడిక్ యాక్షన్ ఫిల్మ్‌గా రూపొందింది. ఈ మూవీలో హీరోయిన్‌గా బాలీవుడ్ హాట్ బాంబ్ దిశా పటానీ చేయగా.. యానిమల్ విలన్ బాబీ డియోల్ కీలక పాత్ర పోషించాడు.

వరల్డ్ వైడ్ రిలీజ్

హ్యూజ్ బడ్జెట్‌తో తెరకెక్కిన కంగువ చిత్రాన్ని ప్రముఖ నిర్మాణ సంస్థలు స్టూడియో గ్రీన్, యూవీ క్రియేషన్స్ బ్యానర్స్‌పై కేఈ జ్ఞానవేల్ రాజా, వంశీ, ప్రమోద్ నిర్మించారు. అలాగే, కంగువను నైజాం ఏరియాలో మైత్రీ మూవీ డిస్ట్రిబ్యూటర్స్ రిలీజ్ చేశారు. 'కంగువ' సినిమా నవంబర్ 14న వరల్డ్ వైడ్‌గా గ్రాండ్‌గా రిలీజ్ అయింది.

కంగువకు సీక్వెల్

థియేటర్లలో విడుదలైన తొలి రోజు నుంచే కంగువ మంచి రెస్పాన్స్ తెచ్చుకుంటోంది. కలెక్షన్స్ కూడా బాగుంటున్నాయి. ఈ నేపథ్యంలోనే కంగువ 2పై మంచి బజ్ క్రియేట్ అయింది. కంగువకు సీక్వెల్‌గా కంగువ 2 మూవీ వస్తుందని వార్తలు వినిపించాయి. అలాగే, కంగువ 2 సినిమాలో హీరోయిన్‌గా దీపికా పదుకొణె నటించనుందని టాక్ వినిపించింది.

ప్రొడ్యూసర్ క్లారిటీ

ఈ క్రమంలో ఓ ఇంటర్వ్యూలో పాల్గొన్న కంగువ నిర్మాత కేఈ జ్ఞానవేల్ రాజా మూవీ కలెక్షన్స్, వర్క్ ఎక్స్‌పీరియన్స్‌తోపాటు దీపికా పదుకొణె గురించి మాట్లాడారు. కంగువ 2కి హీరోయిన్‌గా దీపికా పదుకొణె చేయనుందనే విషయంపై ప్రొడ్యూసర్ కేఈ జ్ఞానవేల్ రాజా క్లారిటీ ఇచ్చారు.

డిఫరెంట్ రోల్స్

- సూర్య గారు చేసిన రెండు డిఫరెంట్ రోల్స్‌కు మంచి అప్రిషియేషన్స్ వస్తున్నాయి. ఆయన ఈ మూవీ కోసం పడిన హార్డ్ వర్క్ స్క్రీన్ మీద కనిపించింది. సూర్య గారి నటనకు ప్రతి ఒక్కరూ ప్రశంసలు అందిస్తున్నారు. బాబీ డియోల్ ఫర్మామెన్స్ మరో హైలైట్ అని చెబుతున్నారు. బాబీ డియోల్ గారి సెలెక్షన్ డైరెక్టర్ శివ గారి ఛాయిస్.

పాజిటివ్‌గా తీసుకుంటున్నాం

- 'కంగువ'కు దేవిశ్రీ ప్రసాద్ మంచి మ్యూజిక్ ఇచ్చారు. బీజీఎం కూడా ది బెస్ట్ అందించారు. యోలో, ఫైర్ సాంగ్, నాయకా.. ఇలా ప్రతి సాంగ్‌కు సూపర్బ్ రెస్పాన్స్ వస్తోంది. బీజీఎం కొంత సౌండ్ ఎక్కువగా ఉందనే ఫీడ్ బ్యాక్ వచ్చింది. అది థియేటర్స్‌లో రెండు పాయింట్స్ తగ్గిస్తున్నాం. లౌడ్ సౌండ్ టెక్నికల్‌గా జరిగిన మిస్టేక్ గానీ దేవి తప్పేం లేదు. ఇదే కాదు 'కంగువ'కు వస్తున్న ప్రతి ఫీడ్ బ్యాక్ పాజిటివ్‌గా తీసుకుంటున్నాం.

నెలరోజులకు పైగా

- 'కంగువ' 2 సినిమాలో దీపికా పదుకొణెను హీరోయిన్‌గా తీసుకుంటున్నామనే విషయంలో నిజం లేదు. ఇంకా ఆ మూవీ వర్క్స్ స్టార్ట్ చేయలేదు. డైరెక్టర్ శివకు అజిత్‌తో ఓ మూవీ చేయాల్సిన కమిట్‌మెంట్ ఉంది. ఆ ప్రాజెక్ట్ అయ్యాక 'కంగువ' 2 వర్క్స్ బిగిన్ చేస్తాం. ఈ సినిమా ప్రమోషన్ కోసం నెల రోజులకు పైగా నిద్రలేకుండా వివిధ ప్రాంతాలకు ట్రావెలింగ్, ఈవెంట్స్‌లో పాల్గొంటున్నాం. నేను చిన్న బ్రేక్ తీసుకున్న తర్వాత కొత్త స్క్రిప్ట్స్ వింటాను.

కార్తీతో ఓ మూవీ

- ప్రస్తుతం కార్తితో మా స్టూడియో గ్రీన్‌లో చేస్తున్న వా వాతియర్ జనవరి చివరలో లేదా ఫిబ్రవరిలో రిలీజ్ చేస్తాం. ఆ సినిమా తర్వాత మా సంస్థలో చేసే కొత్త ప్రాజెక్ట్స్ ప్రకటిస్తాం.