Salaar vs KGF 2: సలార్ కంటే కేజీఎఫ్ 2 టీజర్ చాలా బెటర్: తేల్చేసిన నెటిజన్లు

Salaar vs KGF 2: ఎంతగానో ఆసక్తి రేపిన సలార్ టీజర్ గురువారం ఉదయం 5:12 గంటలకు ప్రేక్షకుల ముందుకు వచ్చేసింది. ఊహించినట్లే ఈ టీజర్ రిలీజైన మరుక్షణం నుంచే ఫ్యాన్స్ దానిని విశ్లేషించడం మొదలుపెట్టారు. మొదట చాలా వరకూ పాజిటివ్ రివ్యూలు రాగా.. తర్వాత మెల్లగా నెగటివ్ కూడా మొదలయ్యాయి. సలార్ టీజర్ ను కేజీఎఫ్ 2 టీజర్ తో పోలుస్తున్నారు.

సలార్ కంటే కేజీఎఫ్ 2 టీజర్ చాలా చాలా బాగుందని ఎంతో మంది అభిమానులు ట్వీట్లు చేస్తున్నారు. హీరో ఎలివేషన్ సలార్ టీజర్లో సరిగా లేదని వాదిస్తున్నారు. అసలు సిసలు గూస్‌బంప్స్ ఎలివేషన్ అంటే కేజీఎఫ్ 2నే అని ముక్తకంఠంతో తేల్చేశారు. మరికొందరు సలార్ టీజర్ బాగానే ఉన్నా.. కేజీఎఫ్ 2 ముందు ఏదీ పనికి రాదని అనడం విశేషం.

ఓ యూజర్ అయితే కేజీఎఫ్ 2 కాదు కదా.. ఐదేళ్ల కిందట వచ్చిన కేజీఎఫ్ 1 టీజర్ కూడా సలార్ కంటే చాలా బాగుందని కామెంట్ చేశారు. ముఖ్యంగా ఈ టీజర్ లో ప్రభాస్ లుక్ ను పూర్తిగా రివీల్ చేయకపోవడంపై ఫ్యాన్స్ అసంతృప్తి వ్యక్తం చేస్తున్నారు. అసలు మేకర్స్ ఇలాంటి నిర్ణయం ఎందుకు తీసుకున్నారో అర్థం కావడం లేదని ఓ యూజర్ ట్వీట్ చేశారు.

కొన్ని వారాల ముందు నుంచే సలార్ టీజర్ పై హైప్ క్రియేట్ చేశారు. కేజీఎఫ్ డైరెక్టర్, ప్రభాస్ కాంబినేషన్ అంటే మామూలుగా ఉండదని ఊహించుకున్నారు. తీరా టీజర్ మాత్రం ఆ రేంజ్ లో లేకపోయేసరికి నిరాశ చెందారు. నిజానికి మరీ ఎక్కువ అంచనాలతో ఎదురు చూడటం కూడా ఒక రకంగా సలార్ టీజర్ కు ప్రతికూలంగా మారిందని చెప్పొచ్చు.

నైట్ ఔట్ చేసి మరీ సలార్ టీజర్ కోసం ఎదురు చూసింది పృథ్వీ రాజ్ ని చూడటానికి కాదు.. ప్రభాస్ ను చూడటానికి అంటూ మరో అభిమాని ట్వీట్ చేశాడు. సలార్ టీజర్ స్టాండర్డ్స్ పరంగా తక్కువ కాకపోయినా.. కేజీఎఫ్ 2 ముందు మాత్రం తేలిపోయిందని మరో యూజర్ ఆ మూవీ టీజర్ పోస్ట్ చేస్తూ ట్వీట్ చేయడం విశేషం. ప్రశాంత్ నీల్ తొలి సినిమా ఉగ్రం మూవీకే ఈ సలార్ అప్‌గ్రేడెడ్ వెర్షన్ అని భావిస్తున్నారు.

కేజీఎఫ్ 2లాంటి సూపర్ డూపర్ హిట్ అందించిన తర్వాత ఆ డైరెక్టర్ పై అంచనాలు భారీగానే ఉంటాయి. వాటికి ఏమాత్రం అటూఇటూ అయినా ఫ్యాన్స్ నిరాశ చెందడం సహజమే. టీజర్ అదే చేసింది. మరి ట్రైలర్, అసలు మూవీతో అయినా మేకర్స్ ఆ అంచనాలను అందుకుంటారేమో చూడాలి.