Sai Pallavi: జపాన్‍ స్నో ఫెస్టివల్‍లో ఎంజాయ్ చేసిన సాయి పల్లవి.. ఆమిర్ ఖాన్ కుమారుడు కూడా..

Sai Pallavi: స్టార్ హీరోయిన్, టాలెండెట్ నటి సాయి పల్లవి మళ్లీ సినిమాలతో బిజీ అవుతున్నారు. 2022లో వచ్చిన గార్గి చిత్రం తర్వాత కొన్ని రోజులు ఆమె బ్రేక్ తీసుకున్నారు. ప్రస్తుతం నాగచైతన్య హీరోగా నటిస్తున్న తండేల్ మూవీలో హీరోయిన్‍గా నటిస్తున్నారు సాయిపల్లవి. అలాగే, శివ కార్తికేయ తర్వాతి మూవీకి కూడా ఓకే చెప్పారు. ఆమిర్ ఖాన్ కుమారుడు జునైద్ ఖాన్ చేస్తున్న బాలీవుడ్ చిత్రంలోనూ లేడీ సూపర్ స్టార్ సాయి పల్లవి నటిస్తున్నారు. ఈ సినిమా షూటింగ్ కోసం ప్రస్తుతం జపాన్‍లో ఆమె ఉన్నారు.

జునైద్ - సాయిపల్లవి నటిస్తున్న సినిమా షూటింగ్ ప్రస్తుతం జపాన్‍లో జరుగుతోంది. ఈ సందర్భంగా సపారో స్నో ఫెస్టివల్‍లో సాయి పల్లవి సందడి చేశారు. మంచు మధ్య ఎంజాయ్ చేశారు. ఈ చిత్రంలో స్నో ఫెస్టివల్ కూడా ఉండనుంది. సాయి పల్లవి వెంట జునైద్ ఖాన్ కూడా కనిపించారు.

స్నో ఫెస్టివల్‍లో సాయి పల్లవి ఉన్న ఫొటోలు సోషల్ మీడియాలో బయటికి వచ్చాయి. దీంతో వైరల్‍గా మారాయి. సాయి పల్లవిని చూసిన ఫ్యాన్స్ సంతోషం వ్యక్తం చేస్తున్నారు. జునైద్‍తో చేసే మూవీతో బాలీవుడ్‍లో అడుగుపెట్టనున్నారు సాయి పల్లవి.

తండేల్‍లో..

తండేల్ మూవీలో నాగచైతన్యకు జోడీగా సాయిపల్లవి నటిస్తున్నారు. లవ్ స్టోరీ తర్వాత చైతూతో రెండోసారి నటిస్తున్నారు. ఈ మూవీలో బుజ్జి తల్లి పాత్ర చేస్తున్నారు. తండేల్ గ్లింప్స్‌లో సాయిపల్లవి స్మైల్‍కు ఫ్యాన్స్ ఫిదా అయ్యారు. చందూ మొండేటీ దర్శకత్వం వహిస్తున్న ఈ చిత్రంలో మత్స్యకారుడిగా నాగ చైతన్య నటిస్తున్నారు. ఈ మూవీ షూటింగ్ ప్రస్తుతం జోరుగా సాగుతోంది. దేవీ శ్రీ ప్రసాద్ ఈ చిత్రానికి సంగీతం అందిస్తున్నారు.

తమిళ స్టార్ హీరో శివ కార్తికేయన్ తదుపరి సినిమా (SK21)లోనూ సాయి పల్లవి నటిస్తున్నారు. రాజ్‍కుమార్ పెరియసామి దర్శకత్వంలో యాక్షన్ డ్రామా మూవీగా ఉండనుంది. ఇప్పటికే ఈ చిత్రానికి పూజా కార్యక్రమాలు కూడా జరిగాయి. తమిళ దిగ్గజ నటుడు కమల్ హాసన్ ఈ కార్యక్రమానికి హాజరయ్యారు. ఎస్‍కే21 చిత్రానికి జీవీ ప్రకాశ్ కుమార్ సంగీతం అందించనున్నారు.

బాలీవుడ్ స్టార్ హీరో ఆమిర్ ఖాన్ కుమారుడు జునైద్ ఖాన్.. మహారాజ్ సినిమాతో తెరంగేట్రం చేయనున్నారు. ఈ పీరియాడిక్ మూవీకి సిద్ధార్థ మల్హోత్రా దర్శకత్వం వహించారు. అయితే, ఈ చిత్రం రిలీజ్ కాక ముందే జునైద్ ఖాన్ మరో చిత్రం మొదలుపెట్టారు. ఈ సినిమాకు ఇంకా టైటిల్ ప్రకటించలేదు. ఈ చిత్రంలోనే అతడితో కలిసి సాయిపల్లవి నటిస్తున్నారు.

బాలీవుడ్ స్టార్ డైరెక్టర్ నితేశ్ తివారీ దర్శకత్వం వహించే రామాయణం చిత్రంలో సీతాదేవీగా సాయిపల్లవి నటించనున్నారు. రామాయణం ఆధారంగా తెరకెక్కే ఈ చిత్రంలో రణ్‍బీర్ కపూర్.. రాముడి పాత్ర చేయనున్నారు. రావణుడిగా కేజీఎఫ్ స్టార్ యశ్ నటించనున్నారు. ఇంకా ఈ రామాయణం మూవీలో సన్నీ డియోల్ కూడా కీలకపాత్ర చేయనున్నారు. అలాగే, బాలీవుడ్ దిగ్గజ నటుడు అమితాబ్ బచ్చన్ కూడా ఈ చిత్రంలో నటించనున్నారని రూమర్లు వస్తున్నాయి.

మొత్తంగా వరుస సినిమాలతో సాయిపల్లవి మళ్లీ ఫుల్ బిజీ అయ్యారు. ఈ చిత్రాల్లో తండేల్ మూవీ ముందుగా రిలీజ్ అయ్యే అవకాశం ఉంది. దీంతో మూవీ కోసం సాయిపల్లవి అభిమానులు వేచిచూస్తున్నారు.