Ravi Teja look in Waltair Veerayya: మాస్ ట్రీట్‌కు రెడీ అవ్వండి.. మాస్ మహా రాజా వచ్చేస్తున్నాడు

Ravi Teja look in Waltair Veerayya: మెగాస్టార్ చిరంజీవి ఈ ఏడాది ఆచార్య, గాడ్ ఫాదర్ చిత్రాలతో ప్రేక్షకులను అలరించారు. ఇందులో గాడ్ ఫాదర్ సూపర్ హిట్‌గా నిలిచింది. ప్రస్తుతం ఆయన మరో సినిమాతో బిజీగా ఉన్నారు. అదే వాల్తేరు వీరయ్య. ఈ సినిమాలో మాస్ మహారాజా రవితేజ కూడా కీలక పాత్ర పోషించనున్న సంగతి తెలిసిందే. ఇప్పటి వరకు ఈ సినిమాలో చిరంజీవి ఫస్ట్ లుక్, పాటలు విడుదలయ్యాయి. ప్రస్తుతం ఈ చిత్రం నుంచి రవితేజ లుక్‌ను విడుదల చేసేందుకు చిత్రబృందం సిద్ధమైంది.

వాల్తేరు వీరయ్య చిత్రం నుంచి మాస్ మహారాజా లుక్‌ను ఈ నెల 12న ఉదయం 11.07 గంటలకు విడుదల చేయనున్నట్లు మేకర్స్ ప్రకటించారు. ఇప్పటి వరకు ఈ సినిమా నుంచి విడుదలైన టీజర్, పాటలు ప్రేక్షకులను విపరీతంగా అలరించాయి. దీంతో రవితేజ లుక్‌పై సర్వత్రా ఆసక్తి నెలకొంది. ఓ చేతిలో సూట్ కేసు, మరో చేతిలో కుక్కపిల్ల సన్ షాడో కింద రవితేజ స్టైలిష్ గా నడుస్తున్న లుక్ ఆకట్టుకుంటోంది.

ఇటీవలే ఈ సినిమా నుంచి బాస్ పార్టీ సాంగ్ విడుదలై ట్రెండింగ్‌లో నిలిచింది. ఊర్వశి రౌతేలా ఇందులో మెగాస్టార్ పక్కన చిందులు వేసింది. వీరిద్దరూ కలిసి మాస్ ప్రేక్షకులను ఉర్రూతలూగించారు. నకాశ్ అజీజ్, దేవిశ్రీ ప్రసాద్, హరిప్రియ ఆలపించారు. దేవిశ్రీ ప్రసాదే ఈ పాటను స్వరపరచడం కాకుండా.. సాహిత్యాన్ని కూడా అందించారు.

బాబీ(కేఎస్ రవీంద్ర) దర్శకత్వంలో రానున్న ఈ సినిమాలో మన మెగాస్టార్ సరసన శృతిహాసన్ హీరోయిన్‌గా చేస్తోంది. రవితేజ ఇందులో కీలక పాత్ర పోషిస్తున్నారు. కేథరిన్ థెరీసా మరో హీరోయిన్. ఈ సినిమాకు దేవిశ్రీ ప్రసాద్ సంగీతాన్ని అందిస్తున్నారు. మైత్రీ మూవీ మేకర్స్ పతాకంపై నవీన్ యర్నేని, వై రవిశంకర్ సంయుక్తంగా నిర్మిస్తున్నారు. జనవరి 13న ప్రపంచ వ్యాప్తంగా ప్రేక్షకుల ముందుకు రానుందీ చిత్రం.