Ram Charan in Leo: దళపతి విజయ్ లియో మూవీలో రామ్ చరణ్.. ఇదిగోండి ప్రూఫ్

Ram Charan in Leo: దళపతి విజయ్ నటించిన మూవీ లియో. అక్టోబర్ 19న ఈ సినిమా ప్రపంచవ్యాప్తంగా రిలీజ్ కాబోతోంది. ఈ సినిమాపై ఇప్పటికే భారీ అంచనాలు ఏర్పడగా.. ఇప్పుడు టాలీవుడ్ మెగా పవర్ స్టార్ రామ్ చరణ్ కూడా అతిథి పాత్రలో కనిపించాడన్న వార్త మరోసారి తెరపైకి వచ్చింది. నిజానికి గతంలోనే ఓసారి ఈ వార్త వచ్చినా.. తర్వాత మెల్లగా అది సైడైపోయింది.

తాజాగా చరణ్ పేరు మరోసారి లియో మూవీతో లింకవడానికి ఓ బలమైన కారణమే ఉంది. ఈ మూవీ అడ్వాన్స్ బుకింగ్స్ అమెరికాలో ప్రారంభమయ్యాయి. అందులో ఓ టికెట్ బుకింగ్ వెబ్‌సైట్ లియో మూవీలోని నటీనటుల వివరాలు చెబుతూ.. రామ్ చరణ్ పేరు కూడా రాయడం విశేషం. ఈ వెబ్‌సైట్లోని సమాచారం తప్పయ్యే అవకాశం కూడా ఉంది.

కానీ ఒకవేళ అదే నిజమైతే మాత్రం అభిమానులకు పండగే. దళపతి విజయ్, రామ్ చరణ్ కలిసి సిల్వర్ స్క్రీన్ పై కనిపించడం ఇటు తెలుగు, అటు తమిళ ప్రేక్షకులకు కనులపండుగలా ఉంటుందనడంలో సందేహం లేదు. సదరు టికెట్ బుకింగ్ వెబ్ సైట్లో జోసెఫ్ విజయ్ పేరుతోపాటు రామ్ చరణ్, త్రిష, అనురాగ్ కశ్యప్, గౌతమ్ మేనన్, అర్జున్ సర్జా, మాథ్యూ థామస్, సంజయ్ దత్ పేర్లు ఉన్నాయి.

లోకేష్ కనగరాజ్ డైరెక్షన్లో వస్తున్న లియో మూవీ బాక్సాఫీస్ రికార్డులు తిరగ రాయడం ఖాయమన్న అంచనాలు ఉన్నాయి. గతేడాది అతడు డైరెక్ట్ చేసిన విక్రమ్ మూవీ ఎంత పెద్ద హిట్ అయిందో తెలిసిందే. అతని సినిమాటిక్ యూనివర్స్ నుంచి వస్తున్న మరో మూవీ లియో. ఇందులో కోలీవుడ్, బాలీవుడ్ కు చెందిన ప్రముఖ నటీనటులు నటించారు.

వీళ్లకు టాలీవుడ్ స్టార్ హీరో రామ్ చరణ్ కూడా తోడైతే అది మరో లెవల్లో ఉండబోతోంది. మరోవైపు లియో మూవీ ట్రైలర్ ఈ మధ్యే రిలీజైంది. ఈ ట్రైలర్ కు మిశ్రమ స్పందన వచ్చింది. ఇది జగపతి బాబు నటించిన గాయం 2లాగా అనిపిస్తోందని కొందరు, హాలీవుడ్ మూవీ ఎ హిస్టరీ ఆఫ్ వయోలెన్స్ ఆధారంగా తెరకెక్కిందని మరికొందరు కామెంట్స్ చేస్తున్నారు.