Ram Charan: ముంబై సిద్ది వినాయకుడి సన్నిధిలో రామ్ చరణ్.. ఫొటోలు వైరల్

Ram Charan: టాలీవుడ్ మెగా పవర్ స్టార్ రామ్ చరణ్ ముంబైలోని సిద్ది వినాయకుడి ఆశీస్సులు తీసుకున్నాడు. మంగళవారం (అక్టోబర్ 3) అతడు ఈ ఆలయానికి వెళ్లిన ఫొటోలు, వీడియో సోషల్ మీడియాలో వైరల్ అవుతున్నాయి. స్థానిక రాజకీయ నాయకుడు రాహుల్ నారాయణ్ తో అతడు కలిసి వెళ్లాడు. ఈ ఫొటోలను రాహుల్ తన ఇన్‌స్టాగ్రామ్ లో షేర్ చేశారు.

ముంబైలోని సిద్ది వినాయకుడి ఆలయం చాలా ఫేమస్. ఇక్కడికి ఎంతోమంది రాజకీయ, సినీ, క్రీడా ప్రముఖులు వస్తుంటారు. తాజాగా రామ్ చరణ్ కూడా సిద్ది వినాయకుడి ఆశీస్సుల కోసం అక్కడికి వెళ్లాడు. ఈ ఆలయానికి వెళ్లిన సమయంలో మరోసారి అయ్యప్ప మాలలో కనిపించాడు చరణ్. ప్రతి ఏటా అతడు అయ్య మాలధారణ చేస్తాడన్న విషయం తెలిసిందే.

సిద్ది వినాయకుడికి ప్రత్యేక పూజలు నిర్వహించాడు. అక్కడి పూజారులు వారికి శాలువా కప్పి తీర్థ ప్రసాదాలు అందజేశారు. "గణపతి బప్ప మోరయా.. ఇండియన్ ఫిల్మ్ ఇండస్ట్రీలోని గ్రేటెస్ట్ నటుల్లో ఒకరైన అద్భుతమైన వ్యక్తి, మానవతావాది రామ్ చరణ్ భాయ్ తో కలిసి సిద్ది వినాయకుడి ఆలయానికి వెళ్లాం" అనే క్యాప్షన్ తో రాహుల్ ఈ ఫొటోలు, వీడియోను షేర్ చేశారు.

మరోవైపు ఈ మధ్యే రామ్ చరణ్ తన ఇంట్లో ఘనంగా వినాయక చవితి వేడుకలు జరుపుకున్నాడు. కూతురు క్లిన్ కారా, ఇతర కుటుంబ సభ్యులతో గణేషుడికి ప్రత్యేక పూజలు నిర్వహించాడు. రామ్ చరణ్ ప్రస్తుతం శంకర్ తో గేమ్ ఛేంజర్ మూవీ చేస్తున్న విషయం తెలిసిందే. రెండేళ్లుగా ఈ ప్రాజెక్ట్ కొనసాగుతూనే ఉంది. ఓవైపు ఇండియన్ 2 మూవీ షూటింగ్ లోనూ శంకర్ బిజీగా ఉండటంతో గేమ్ ఛేంజర్ ముందుకు సాగడం లేదు.

ఈ మధ్యే ఫిల్మ్ ఇండస్ట్రీలోకి అడుగుపెట్టి 16 ఏళ్లు పూర్తయిన సందర్భంగా సెలబ్రేట్ చేసుకున్న రామ్ చరణ్.. వచ్చే ఏడాది సమ్మర్ లో గేమ్ ఛేంజర్ మూవీతో అభిమానుల ముందుకు రానున్నాడు. ఈ సినిమా ఆలస్యం అవుతుండటం అతని ఫ్యాన్స్ ను తీవ్ర అసంతృప్తికి గురి చేస్తోంది.