Prabhas | బిగ్ బి తో బాహుబ‌లి... క‌ల నెర‌వేరింద‌న్న ప్ర‌భాస్‌

చిరంజీవి హీరోగా న‌టించిన ‘సైరా న‌ర‌సింహారెడ్డి’ చిత్రంలో అతిథి పాత్ర‌లో క‌నిపించారు బాలీవుడ్ లెజెండ‌రీ యాక్ట‌ర్ అమితాబ్ బ‌చ్చ‌న్‌. ఈ సినిమాలో చిరంజీవికి గురువుగా క‌నిపించి మెప్పించారు. తెలుగులో ఫుల్ లెంగ్త్ పాత్ర‌లో అమితాబ్ బ‌చ్చ‌న్ న‌టిస్తున్న తాజా చిత్రం ‘ప్రాజెక్ట్ కె’. ప్ర‌భాస్ హీరోగా న‌టిస్తున్నఈ చిత్రానికి ‘మ‌హాన‌టి’ ఫేమ్ నాగ్ అశ్విన్ ద‌ర్వ‌క‌త్వం వ‌హిస్తున్నారు. సైంటిఫిక్ ల‌వ్ స్టోరీగా రూపొందుతున్న ఈ సినిమాలో దీపికా ప‌దుకోణ్ హీరోయిన్ గా న‌టిస్తోంది. ఈ సినిమాతోనే ఆమె తెలుగులోకి ఎంట్రీ ఇవ్వ‌బోతోంది. ఇందులో అమితాబ్ బ‌చ్చ‌న్ కీల‌క‌ పాత్ర‌ను పోషిస్తున్నారు. హీరోహీరోయిన్ల‌తో పాటు ఆయ‌న పాత్ర సినిమా మొత్తం క‌నిపిస్తుంద‌ని స‌మాచారం. ప్ర‌స్తుతం ఈ సినిమా షూటింగ్ హైద‌రాబాద్ లోని రామోజీ ఫిల్మ్ సిటీలో జ‌రుగుతోంది. గ‌త కొన్ని రోజులుగా ప్ర‌భాస్‌పై కీల‌క స‌న్నివేశాల‌ను చిత్రీక‌రిస్తున్నారు. శుక్ర‌వారం ఈ సినిమా సెట్స్ లోకి అమితాబ్ బ‌చ్చ‌న్ అడుగుపెట్టారు. ‘బాహుబ‌లి’ ప్ర‌భాస్ తో ఫ‌స్ట్ ఫిల్మ్‌..ఫ‌స్ట్ డే...ఫ‌స్ట్ షాట్ అంటూ ట్విట్ట‌ర్ ద్వారా అమితాబ్ బ‌చ్చ‌న్ పేర్కొన్నారు. ప్ర‌భాస్ టాలెంట్‌, విన‌యం త‌న‌ను ఎంత‌గానో ఆక‌ట్టుకున్నాయ‌ని తెలిపారు. అమితాబ్ బ‌చ్చ‌న్ తో క‌లిసి తొలిసారి న‌టించ‌డం ప‌ట్ల ప్ర‌భాస్ ఆనందాన్ని వ్య‌క్తం చేశారు. అమితాబ్ పాత ఫొటోను ఇన్‌స్టాగ్రామ్ లో షేర్ చేసిన ప్ర‌భాస్...బిగ్ బితో క‌లిసి న‌టించాల‌నే త‌న క‌ల నిజ‌మ‌వ్వ‌డం ఆనందంగా ఉంద‌ని పేర్కొన్నారు. సోష‌ల్ మీడియాలో అమితాబ్‌, ప్ర‌భాస్ పెట్టిన పోస్ట్ లు అభిమానుల‌ను ఆక‌ట్టుకుంటున్నాయి. కొద్ది రోజుల క్రితం అమితాబ్, ప్రభాస్ లపై విడివిడిగా దర్శకుడు నాగ్ అశ్విన్ కొన్ని సీన్స్ తెరకెక్కించారు. వీరిద్దరు కలిసి షూటింగ్ లో పాల్గొనడం ఇదే తొలిసారి. ఈ లెజెండ్స్ ను వెండితెరపై చూసేందుకు అభిమానులు ఆసక్తిగా ఎదురుచూస్తున్నారు.  దాదాపు 400 కోట్ల బ‌డ్జెట్ తో వైజ‌యంతీ మూవీస్ సంస్థ ఈ చిత్రాన్ని తెర‌కెక్కిస్తోంది. వ‌చ్చే ఏడాది ఈ సినిమా విడుద‌ల‌కానుంది.