Pawan Kalyan | సుమ ‘జయమ్మ పంచాయతీ’ ట్రైలర్ ను రిలీజ్ చేసిన పవన్ కళ్యాణ్...

సుదీర్ఘ విరామం తర్వాత యాంకర్ సుమ కనకాల ప్రధాన పాత్రలో నటిస్తున్న తాజా చిత్రం ‘జయమ్మ పంచాయతీ’. విజయ్ కుమార్ కలివారపు ఈ చిత్రానికి దర్శకత్వం వహిస్తున్నారు. మే 6న ఈ సినిమా రిలీజ్ కానుంది. సుమతో ఉన్న అనుబంధం కారణంగా ఈ సినిమా ప్రమోషన్స్ లో టాలీవుడ్ స్టార్ హీరోలందరూ భాగమయ్యారు. ఈ సినిమా టైటిల్, ఫస్ట్ లుక్ పోస్టర్ ను రామ్ చరణ్ రిలీజ్ చేశారు. తొలి సింగిల్ ను నాని, టీజర్ ను రానా దగ్గుబాటి ఆవిష్కరించారు. 

 ఈ సినిమా ట్రైలర్ ను శనివారం పవన్ కళ్యాణ్ రిలీజ్ చేశారు.  రా బావా మా ఊళ్లో పంచాయతీ సూద్దువు గానీ...ఏ ఊళ్లో జరగని వెరైటీ గొడవ ఒకటి జరుగుతోంది  అనే డైలాగ్ తో ఇంట్రెస్టింగ్ గా  ట్రైలర్ మొదలైంది. జయమ్మ నువ్వు పంచాయతీకి రావడం ఏంటి అని  ఓ వ్యక్తి అడిగిన ప్రశ్నకు నేనెందుకు వస్తాను మీరే వచ్చేటట్లు చేశారు అంటూ సుమ సమాధానం చెప్పడం ఆకట్టుకుంటోంది. క్యాస్ట్ ఫీలింగ్ తో పాటు పల్లెటూళ్లలో ఉండే పలు సమస్యలను వినోదాత్మకంగా ఈ సినిమాలో చర్చించబోతున్నట్లు తెలుస్తోంది. పూర్తిగా సుమ పాత్ర ప్రధానంగా ట్రైలర్ సాగింది. సుమ తనదైన శైలి కామెడీ టైమింగ్, పంచ్ లతో ట్రైలర్ లో చెప్పిన డైలాగ్స్ ఆకట్టుకుంటున్నాయి.  ఇందులో డబ్బు, అధికారదాహానికి లొంగని నిస్వార్థపరురాలైన పల్లెటూరి మహిళగా సుమ పవర్ ఫుల్ పాత్రలో  కనిపించింది.  ఈ సినిమాను ప్రేక్షకుల ముందుకు తీసుకొచ్చేందుకు సుమ కూడా భారీ ప్రమోషన్స్ చేస్తోంది. బుల్లితెరపై తనకున్న ఇమేజ్ ను ఉపయోగించుకుంటూ బిగ్ బాస్, జబర్ధస్థ్ తో పాటు పలు షోలలో చిత్రాన్ని ప్రమోట్ చేసింది. విలేజ్ బ్యాక్ డ్రాప్ లో రూపొందుతున్న ఈ సినిమాకు ఎం.ఎం.కీరవాణి సంగీతాన్ని అందిస్తున్నారు. బలగా ప్రకాష్ నిర్మించారు.