Ram Charan Birthday | తనయుడికి వినూత్నంగా విషెస్ చెప్పిన మెగాస్టార్

మెగాపవర్ స్టార్ రామ్‌చరణ్ పుట్టిన రోజు నేడు. ఈ సందర్భంగా సినీ ప్రముఖులు, అభిమానులు ఆయనకు పెద్ద ఎత్తున శుభాకాంక్షలు చెబుతున్నారు. తనకు బర్త్ డే విషెస్ చెబుతున్న వారందరికి రామ్‌చరణ్ ధన్యవాదాలు చెప్పారు. ఆర్ఆర్ఆర్ సినిమాను పెద్ద హిట్ చేసి తనకు పుట్టిన రోజు కానుకను అందజేశారని సామాజిక మాధ్యమాల్లో పోస్ట్ పెట్టారు. అయితే వీరంత విషెస్ చెప్పడం ఒక ఎత్తయితే మెగాస్టార్ చిరంజీవి.. రామ్‌చరణ్‌కు శుభాకాంక్షలు చెప్పడం మరోక ఎత్తు. అందరికంటే విభిన్నమైన రీతిలో విషెస్ చెప్పారు. రామ్‌చరణ్ చిన్నతనంలోని ఫొటోతో పాటు.. ఆచార్య చిత్రంలోని ఇద్దరు కలిసి దిగిన ఫొటోను షేర్ చేశారు.

"రామ్‌చరణ్‌కు సోషల్ మీడియా ద్వారా బర్త్ డే విషెస్ చెప్పడం నాకు వింతగా అనిపిస్తుంది. అయితే ఈ అకేషన్‌లో రామ్‌చరణ్ పిక్ ఒకటి షేర్ చేస్తే అభిమానులు ఆనందిస్తారనిపించింది. కుమారుడుగా అతడు నా గర్వకారణం. అతడే నా గర్వం" అని ట్విట్టర్ వేదికగా పోస్ట్ పెట్టాడు.

ప్రస్తుతం రామ్‌చరణ్ ఆర్ఆర్ఆర్ సినిమా సక్సెస్‌ను ఎంజాయ్ చేస్తున్నాడు. ఎన్టీఆర్‌తో కలిసి మల్టీ స్టారర్‌గా తెరకెక్కిన ఈ చిత్రం మార్చి 25న ప్రపంచవ్యాప్తంగా ప్రేక్షకుల ముందుకు వచ్చింది. ఈ సినిమాలో రామ్‌చరణ్ సరసన సీత పాత్రలో ఆలియా భట్, తారక్ సరసన బ్రిటీష్ యాక్ట్రెస్ ఒలివియా మోరిస్ నటించారు. అజయ్ దేవగణ్ ప్రత్యేక పాత్రలో కనిపించారు. ఈ సినిమాను డీవీవీ దానయ్య నిర్మించారు. రాజమౌళి తెరకెక్కించిన ఈ చిత్రానికి ఎంఎం కీరవాణి సంగీతాన్ని సమకూర్చారు. మార్చి 25న ప్రపంచ వ్యాప్తంగా ప్రేక్షకుల ముందుకు వచ్చి సూపర్ హిట్ టాక్ తెచ్చుకుంది. తెలుగుతో పాటు తమిళం, హిందీ, కన్నడ, మలయళ భాషల్లో ఈ సినిమా ఒకేసారి విడుదలైంది.

మరోపక్క మన మెగాస్టార్ నటించిన ఆచార్య చిత్రం విడుదలకు సిద్ధంగా ఉంది. ప్రస్తుతం గాడ్ ఫాదర్, భోళా శంకర్ సినిమాల్లో నటిస్తూ బిజీగా ఉన్నారు. ఈ రెండు సినిమాలు చిత్రీకరణ దశలో ఉన్నాయి. ఇంతలోనే బాబీ దర్శకత్వంలో నటించేందుకు గ్రీన్ సిగ్నల్ ఇచ్చేశారు.