Kannappa Movie: కన్నప్ప నుంచి ప్రభాస్ లుక్ లీక్ - దొంగ‌ను ప‌ట్టించిన వారికి ఐదు ల‌క్ష‌లు ఇస్తాన‌న్న మంచు విష్ణు

మంచు విష్ణు క‌న్న‌ప్ప మూవీ నుంచి ప్రభాస్ వ‌ర్కింగ్ స్టిల్ లీక‌యింద‌ట‌. లీక్ చేసిన వారిని ప‌ట్టిస్తే ఐదు ల‌క్ష‌లు బ‌హుమానంగా అంద‌జేస్తామ‌ని మంచు విష్ణు ప్ర‌క‌టించాడు. ఈ లుక్ లీక్‌పై చ‌ట్ట ప్ర‌కారం చ‌ర్య‌లు తీసుకోబోతున్న‌ట్లు వెల్ల‌డించాడు. లీకు దొంగ‌ల‌పై పోలీస్ కేసు పెట్ట‌బోతున్నట్లు తెలిపాడు.

ఎనిమిదేళ్ల క‌ష్టం...

క‌న్న‌ప్ప కోసం గ‌త ఎనిమిది సంవ‌త్స‌రాలుగా మేము మా హృద‌యాల‌ను, ప్రాణాల‌ను అర్పించాము. గ‌త రెండు సంవ‌త్స‌రాలు నిబ‌ద్ధ‌త‌తో ఈ ప్రాజెక్ట్‌ను పూర్తిచేయ‌డానికి మా టీమ్ నిరంత‌రం కృషి చేస్తోంది. ఇలాంటి క్ష‌ణంలో క‌న్న‌ప్ప సినిమా నుంచి వ‌ర్క్ ఇన్ ప్రోగ్రెస్ ఇమేజ్ అన‌ధికారికంగా లీక్ అయినందుకు చాలా బాధ‌ప‌డుతున్నాము.

ఈ లీక్ మా క‌ష్టాన్ని మాత్ర‌మే కాకుండా సినిమా కోసం నిరంత‌రం కృషిచేస్తోన్న 2000 మంది వీఎఫ్ఎక్స్ క‌ళాకారుల జీవితాల‌ను కూడా ప్ర‌భావితం చేస్తోంది. ఈ లీక్ ఎలా జ‌రిగింది అనేది క‌నుగొనేందుకు మేము పోలీస్ కేసు పెట్ట‌డం జ‌రుగుతోంది. ఈ లీక్ అయిన ఇమేజ్ ఫుటేజ్‌ను ఎవ‌రైనా షేర్ చేస్తూఉంటే ఆ దొంగ‌ల్ని ప‌ట్టుకోమ‌ని అభిమానుల‌ను మ‌న‌స్ఫూర్తిగా కోరుతున్నాం.

ఐదు ల‌క్ష‌లు బ‌హుమానం...

ఈ లీక్‌డ్ ఇమేజ్ షేర్ చేయ‌డం ద్వారా చ‌ట్ట‌ప‌ర‌మైన చ‌ర్య‌ల‌కు గురికావాల్సి ఉంటుంది. ఈ లీక్ చేసిన వారిని ఎవ‌రైనా క‌నుగొంటే వారికి ఐదు ల‌క్ష‌ల రూపాయ‌లు బ‌హుమానంగా అంద‌జేస్తాం. వారి వివ‌రాల్ని 24 ఫ్రేమ్స్ ఫ్యాక్ట‌రీ ట్విట్ట‌ర్ అకౌంట్‌కు డైరెక్ట్‌గా మెసేజ్ పంపండి అంటూ మూవీ టీమ్ ఓ ప్ర‌క‌ట‌న‌ను జారి చేసింది.

ప్ర‌భాస్ గెస్ట్ రోల్‌...

మైథ‌లాజిక‌ల్ క‌థాంశంతో రూపొందుతోన్న క‌న్న‌ప్ప మూవీలో మంచు విష్ణు, మోహ‌న్‌బాబు కీల‌క పాత్ర‌ల్లో న‌టిస్తోన్నారు. ప్ర‌భాస్‌, మోహ‌న్‌లాల్‌, అక్ష‌య్‌కుమార్, కాజ‌ల్ అగ‌ర్వాల్ గెస్ట్ రోల్స్‌లో న‌టిస్తున్నారు. శ‌ర‌త్‌కుమార్‌, మ‌ధుబాల‌, శివ‌బాలాజీ, బ్ర‌హ్మానందంతో పాటు ప‌లువురు టాలీవుడ్ న‌టులు కీల‌క పాత్ర‌ల్లో క‌నిపించ‌బోతున్నారు.

ముఖేష్ కుమార్ సింగ్ ద‌ర్శ‌క‌త్వం వ‌హిస్తోన్న ఈ సినిమాకు మంచు విష్ణు స్వ‌యంగా నిర్మిస్తోన్నాడు. మంచు విష్ణు కెరీర్‌లోనే భారీ బ‌డ్జెట్ మూవీగా దాదాపు వంద కోట్ల బ‌డ్జెట్‌తో క‌న్న‌ప్ప మూవీ తెర‌కెక్కుతోంది. డిసెంబ‌ర్‌లో క‌న్న‌ప్ప మూవీ రిలీజ్ చేయ‌బోతున్న‌ట్లు మంచు విష్ణు గ‌తంలో ప్ర‌క‌టించాడు. ప్ర‌స్తుతం ఈ మూవీ రిలీజ్ డేట్ మారిన‌ట్లు స‌మాచారం.